ჭალადიდელების ერთი ნაწილი ამტკიცებს, რომ არსება, რომელიც უცნაურ ქმედებებს ჩადის მეგრუკლი მითების ერთ-ერთი გმირი ტყაშმაფაა.
ტყაშმაფა (მეგრ. ტყის მბრძანებელი) მითოლოგიაში ტყის მეფე-ქალია, გარეულ ცხოველთა მბრძანებელი.
ხალხური წარმოდგენებით ტყაშმაფა ოქროსთმიანი (ზოგჯერ შავთმიანი) მშვენიერი ქალია, რომელიც ტყეში ცხოვრობს. მასზეა დამოკიდებული მონადირის იღბალი. ტყაშმაფა მონადირესთან საიდუმლო სასიყვარულო კავშირს ამყარებს; საიდუმლოს გაცემის შემთხვევაში იგი მის რჩეულს სიკვდილს მოუვლენს (ზოგჯერ ქვად აქცევს), ხოლო მის ოჯახს გააღატაკებს. ტყაშმაფას სიყვარულს ეძიებს ოჩოკოჩი, რომლის ძალადობის გამო ტყაში-მაფა კვდება (ან მონადირის ხელშეწყობით შველის თავს). ზოგი მკვლევარი ტყაშმაფას დალისთან და უსახელო “ტყის ქალის” სახელთან აკავშირებს, რომელიც საქართველოს სხვადასხვა რაიონებში გავრცელებულ გადმოცემებსა და რიტუალურ სიმღერებში გვხვდება.
პოპულარული აღწერით, ტყაშმაფას გრძელი თეთრი თმები აქვს, რომელიც შიშველ ტანს უფარავს და კოჭებამდე წვდება, ხშირად უჩინარია. როცა ტყაშმაფა იცინის რძესავით თეთრი კბილები უჩანს. მითის თანახმად ტყაშმაფა ტყეში ცხოვრობს და ღამეულ მგზავრებს თუ შეხვდება და გამოელაპარაკება პასუხი არ უნდა გასცენ, ხელებით უნდა ელაპარაკონ, თორემ ჭკუაზე შეგშლის ადამიანს”...
ჩვენ სოფელ ჭალადიდს ესტუმრეთ და ადგილობრივ მოსახლეობას გაესაუბრეთ:
ნორა სახოკია: “ოთხ დღეზე მეტია ჩემს სახლში საოცრებები ხდება. ჯერ კარის სახელურს ათამაშებდა გაურკვეველი ძალა და აკაკუნებდა გარეთ რომ გავდიოდით არავინ გვხვდებოდა. წუხელ გვიან ღამით ძაღლებმა ყეფა დაიწყეს, სწორედ ამ დროს ჩემს სახლს დიდი ქვა მოხვდა – სახლის სარკმელი ჩაამსხვრია. სახურავს ქვები ზემოდანაც ეცემა. მთელი სოფელი შეშინებულია, ვერ გავიგეთ რა ხდება ჩვენს თავს.
დავიღალე ბებო, აღარ შემიძლია. ერთი დიდი ქვა ჩემს რძალს მაშინ მოხვდა, როდესაც შვილს ასადილებდა, ამიტომ ოჯახიდან ბავშვები და მოზარდები გავხიზნეთ, არ ვიცით რა ვქნათ. თავიდან ისიც კი ვიფიქრეთ იქნებ მეზობლები გვაწვალებენთქო, მაგრამ საქმეში პოლიცია, რომ ჩაერია და ადამიანური დანაშაულის ნიშანწყალიც ვერ აღმოაჩინეს დავრწმუნდი, რომ აქ რაღაც ამოუცნობი ხდება. ადამიანებს არაფერს ერჩის.
77 წლის ქალი ვარ და მსგავსი არაფერი გამიგია ცხოვრებაში, ყველა მიყვარს და ადამიანებს პატივს ვცემ, ასეთი რამ რატომ უნდა დამართნოდა ჩემს ოჯახს?! რამოდენიმე დღის წინ სტუმრები გვყავდნენ თბილისიდან და იფიქრეს მოჩვენებას გადავიღებთო ქვა მათ კამერასაც მოხვდა, როგორც თვითონ თქვეს უცნაური ხმა გაიგონეს. ძალიან შეეშინდათ.”
მამუკა დემანია, საკრებულოს წევრი: “ახსნას ვერ ვპოულობთ, მიჭირს ამ ყველაფრის დაჯერება, მაგრამ ფაქტია. უჩინარი ძალა მოსახლეობის სახლებს ქვებს ესვრის. პოლიცია საქმის კურსშია, მაგრამ ვერაფერს მიაგნეს. 15 დღეზე მეტია რაც ეს თავდასხმები დაიწყო და ხალხი პანიკაშია. ფოტო და ვიდეოგადაღება არ ხერხდება”.
ჭალადიდში არიან პიროვნებები, რომლებიც ამბობენ, რომ დაინახეს ადამიანის მსგავსი ფიგურის მქონე არსება, რომელიც ანათებდა.
გიზო ბირბიჩაძე: “საღამო ყანაში ვმუშაობდი, ჩემი ყურადღება ელვისმაგვარმა ნათებამ მიიპყრო. არსება დავინახე, რომელიც ადამიანს ჰგავდა და თეთრად ბრწყინავდა, მიახლოვებისთანავე გაქრა. კომენტარის გაკეთება მიჭირს, თვითონაც არ ვიცი ეს რა იყო."
თინა გვასალია: “პირველად ეს ამბები ჯალაღონიების ოჯახში დაიწყო ახლა კი გერსამიების ოჯახს არ შორდება მოჩვენება.
სოფელში ამ ყველაფრის ახსნაც გვაქვს; რამოდენიმე ხნის წინ ტყისმჭრელი თემურ ჯალაღონია ტყეში იყო და ერთი დიდი ხე მოჭრა. ამ ხის ძირში ყოფილა დიდი ბუნაგი, რომელიც ჩვენი აზრით ტყაშმაფას ეკუთვნოდა. ხის მჭრელმა შეშა სახლში, რომ მიიტანა ამის შემდეგ დაიწყო მთელი უბედურება. ოჯახის უფროსს იმ საღამოს ლეღვის ნაყოფი დაუშინა ვიღაცამ. ძალიან შეეშინდათ, მაგრამ ყველაფერი ბოროტ ხუმრობას მიაწერეს. მეორე დღეს კი სახლს დიდი რიყის ქვები მოხვდა. ადამიანს ასეთი ძალით არ შეუზლია მოზრდილი ქვის სროლა..."
შემდეგ სოფლიოს მოსახლეობა შევიკრიბეთ და ვიმსჯელეთ ამ საკითხზე. ბევრი ფიქრობს, რომ ხის ფუღუროში ტყაშმაფას ბუნაგი იყო და ის ძალიან გაბრაზდა – ამიტომ გამოჰყვა ტყისმჭრელს”.
ნათია ბერბიჭავა: “წუხელ საღამოს 9 საათზე ჩვენს სახლს ყველა მხრიდან, უამრავი ქვა მოხვდა. ბავშვებს ძალიან შეეშინდათ და ტირილით გამოიქცნენ სახლის შემოგარენიდან. მთელი ღამე ქუჩაში უბნის ინსპექტორის ავტომანქანა პატრულირებდა - ვერაფერი ნახეს. ღამე შიშით არ გვძინავს. ჩვენი აზრით ეს ტყაშმაფაა ან ოჩოკოჩი. ორი დღის წინ მამაჩემმა არსება დაინახა, და გაედევნა. ტყემდე სდია, შემდეგ ის გაქრა. ადამიანს ჰგავს."
სოფლის გამგებელი, ირწმუნება, რომ სამართალდამცავებმა ყველაფერი გააკეთეს, რათა დანაშაულის ჩამდენი დაეპატიმრებინათ, თუმცა ადამიანური ქმედებას ნიშანწყალსაც ვერ მიაგნეს.
ჯოტო გიგაშვილი, ჭალადიდის გამგებელი: “უხილავმა არსებამ უკვე 15 დღეა მოსახლეობაზე მასიური შეტევები დაიწყო. ვენახის კონსტრუქციები თითქმის განადგურებულია. თავიდან, მოსახლეობას არ სჯეროდა, ჩემი მაგრამ, როდესაც ფაქტის მომსწრე გახდნენ ირწმუნეს. ჯერჯერობით მსხვერპლი არ არის, მართალია, მოჩვენება ქვებს ხალხის მიმართულებით ისვრის, მაგრამ არავინ დაღუპულა. არ ვიცით რა ხება.”
მოკლე კომენტარს აკეთებს, ჭალადიდის წმინდა ნინოს სახელობის ტაძრის წინამზღვარი მამა გიორგი. სასულიერო პირი აცხადებს, რომ ეკლესია ისევე, როგორც მოსახლეობა დაინტერესებულია გაირკვეს თუ რა ხდება სოფელში.
წყარო: http://boqlomi.blogspot.com/2009/09/blog-post_14.html
ამაზე იყო თემა?
