Help - Search - Members - Calendar
Full Version: ბჰაგავადგიტა
ეზოთერიული ცოდნის ფორუმი > ძირითადი განყოფილება > პიროვნებები, გაერთიანებები, სწავლებები > ვედები
Pages: 1, 2
tikoroma
http://files.ge/file/450875/bhagavadatgita-doc.html

ქართულ ენაზე ბჰაგავადატგიტა...

(მგონი სწორად ავტვირთე)
Atman
tikoroma

რაღაც ჭედავს, სხვა საიტზეც ატვირთო რა იქნებ და მოგვაწოდო ლინკი. გმადლობ წინასწარ wink.gif
Atman
უკვე გადმოვტვირთე, აღარ ჭედავს, მაგრამ შესწორებას შევიტან, ეს თავად ბჰაგავატ გიტა კი არა კომენტარია ბჰაგავატ გიტასი... ძალიან საინტერესო და ვრცელი. გმადლობ wink.gif
tikoroma
Atman
გმადლობ რომ შემისწორე. ტექსტი მქონდა და მეგონა ის ავტვირთე shipwrecked.gif

მოვძებნი მაგასაც
Atman
tikoroma

კარგი იქნება ტექსტსაც თუ ატვირთავ. გმადლობ smile.gif
mata
ბჰაგავატ გიტა და სხვა დანარჩენი კრშნას ცნობიერების წიგნები (ქართულად რაც არის გამოცემული) თუ ვინმეს გინდოდეთ შემეხმიანეთ
Atman
mata

ელექტრონული ვერსია თუ გაქვს დადე აქ.
mata
Atman
არა, მე ჩვეულებრივ წიგნზე ვამბობ
tikoroma
პირველი თავი ვიპოვე ვიკიპედიაში smile.gif


საუბარი პირველი


დჰრიტარაშტრამ თქვა:
1:1. დჰარმას ველზე, კურუს ველზე შეყრილნი ერთურთის წინააღმდეგ ბრძოლის ჟინით ანთებულნი, რას იქმან, ჩემო სანჯაია, შვილნი ჩემნი და პანდუს ძენი?

სანჯაიამ თქვა:
1:2. პანდავთა განლაგებულ ჯარს თვალი რომ შეავლო, რაჯა დურიოდჰანა თავის მოძღვარს დრონას მიუახლოვდა და უთხრა:
1:3. შეხედე, მოძღვარო, პანდავთა ეს რამოდენა ჯარი შეუკრებია შენს ბრძენ მოწაფეს, დრაუპადას შვილს.
1:4. იუდჰანას, ვირატას და დიდი საბრძოლო ეტლის მმართავ დრუპადას, ამ ვაჟკაცებს, მარჯვე მშვილდოსნებს, ბჰიმას და არჯუნას რომ უტოლდებიან ბრძოლაში,
1:5. დჰრიშტაკეტუს, ჩეკიტანას, მამაც რაჯა კეში პურუჯიტს, კუნტიბჰოჯას და შაივიას, კაცთა შორის ხარებს,
1:6. ტანძალად იუდჰამანიუს, სუბჰადრას უშიშარ ძეს უტამოჯას, დიად საბრძოლო ეტლებზე ამხედრებულ დრაუპადას შვილებს.
1:7. იცოდე ასევე ჩემი ჯარის მთავარსადლები, ორჯერშობილთა შორის უდიადესო, შეიტყვე მათი სახელებიც:
1:8. თავად შენ, უფალო, და ბჰიშმა, ყოვლადგამარჯვებული კარნა და კრიპა, ასევე აშვათამანი, ვიკარნა და საუმადატას ძე,
1:9. და მრავალი სხვა გმირი, ჩემთვის თავის გამწირავი, მრავალგვარად შეიარაღებული. ყველა მათგანი გამოცდილი მებრძოლია.
1:10. საეჭვოდ მეჩვენება ჩვენი ჯარის ძლიერება, მიუხედავად ბჰიშმას მთავარსარდლობისა. და უდავოდ შესამჩნევია მისი ძლიერება, მიუხედავად ბჰიმას მთავარსარდლობისა.
1:11. ლაშქრის რიგებში მყოფმა ყოველმა მდომმა, და თქვენც, მთავარსარდლებო, დაე ყოველმა დაიცვას ბჰიშმა!
1:12. მის [დურიოდჰანას] გასამხნევებლად, კურუთა შორის უმთავრესო, დიადმა ბჰიშმამ ნიჟარაში ჩაბერა, რომლის ხმა ლომის ყივილს ჰგავდა.
1:13. მის პასუხად იმწამსვე გაისმა ხმა ნიჟარათა და ლიტავრათა, დოლთა და რქათა. მათი გრუხუნი შიშისმომგვრელი იყო.
1:14. მაშინ მადჰავამ და პანდავამ, რომლებიც თეთრ რაშშებმულ დიად საომარ ეტლზე იდგნენ, თავიანთ ღვთაებრივ ნიჟარებში ჩაბერეს.
1:15. ჰრიშიკეშამ ჩაბერა ნიჟარა პანჩაჯანიაში, ჯანანჯაიამ – დევადატაში, ხოლო საგმირო საქმეებში შიშისმგვრელმა ვრიკოდარამ - თავის რქაში.
1:16. კუნტის შვილი მეფე იუდჰიშტირა ნიჟარა ანანტავიჯაიაში უბერავდა, ნაკულა – სუჰოშაში, ხოლო საჰადევა – მანუპუშპაკაში.
1:17. დიადი მშვილდოსანი კეშიაც, საბრძოლო ეტლზე მეომარი მძლევარე შიქანდაც, ასევე დაუმარცხებელი დჰრიშტადიუმნა, ვირატა, სატიაკი,
1:18. დრუპადაც ძეთურთ და მძიმედ აღჭურვილი სუბჰადრაც – ყველანი ყოველი კუთხიდან უბერავენ თავიანთ ნიჟარებში, ჩემო დედამიწის მეუფევ!
1:19. ეს შიშისმომგვრელი ყივილი დჰრიტარაშტრას შვილთა გულებს თრგუნავს, ცას და დედამიწავს გრუხუნით ავსებს.
1:20. მაშინ, საომრად მომზადებულ დჰრიტარაშტრას ძეთა შემყურე პანდავამ, რომლის მუზარადზე ჰანუმანია გამოსახული, მშვილდი აწია.
1:21. და ჰრიშიკეშას, დედამიწის მეუფეს, ამ სიტყვებით მიმართა:
1:22. შეუდრეკელო, ორ ჯარს შორის დგას ჩემი საბრძოლო ეტლი, და მე ვხედავ საომრად მომზადებულ აქ შეკრებილ მოლაშქრეებს, რომლებთანაც მძიმე ბრძოლაში შეტაკება მომიწევს.
1:23. ვხედავ დჰრიტარაშტრას პირმშოს ავ ნებას აყოლილთ.
სანჯაიამ თქვა:
1:24. შეისმინა რა არჯუნას ეს სიტყვები, ჩემო ბჰარატავ, ჰრიშიკეშამ მათი უმშვენიერესი საბრძოლო ეტლი ორ ლაშქარს შორის ჩააყენა,
1:25. და დაანახა რა მას ბჰიშმა და მსოფლიოს ყველა მბრძანებელი, თქვა: შეხედე აქ შეკრებილ კურუთ!
1:26. და პართამ იხილა ერთმანეთს დაპირისპირებული მამა-პაპანი, მოძღვარნი, ბიძანი, ბიძაშვილნი, შვილნი, შვილიშვილნი და მეგობარნი.
1:27. სიმამრნი და ძველი მეგობარნი, რომელნიც ორ მტრულ ბანაკად დაიყვნენ. ლაშქართა მწყობრში ჩამდგარ ყველა ამ ნათესავთა შემყურე კაუნტეია სიბრალულით აღივსო და დიდი გულისტკივილით შეიცხადა:
1:28. ჩემო კრიშნა, სალაშქრო მწყობრში მდგარ და ბრძოლის ჟინით ანთებულ ჩემიანებს რომ ვუყურებ,
1:29. მუხლნი მეკვეთება და ყელი მიშრება, ტანი მიკანკალებს და თმა ყალყზე მიდგება,
1:30. განდივა ხელთ მივარდება, მთელი კანი მეწვის, ზე ვეღარ ვდგავარ და თავბრუ მესხმის.
1:31. და ვხედავ ავ ნიშნობებს, ჩემო კეშავა. და ვერავითარ სიკეთეს ვჭრეტ ამ ძმათშორის ომში.
1:32. არ მსურს გამარჯვება, ჩემო კრიშნა, არც სამეფო, არც მისით ტკბობა. არაფრად ღირს სამეფო! ჩემო გოვინდა! რად ველტვით ტკბობას ან თავად სულდგმულებას?
1:33. ვისი დატკბობაც გვსურს ამ სამეფოთი, კეთილი ბედისყოფით, აგერ აქ დგანან საბრძოლო მზადყოფნაში, დათმეს რა ყოფა და სიმდიდრენი,
1:34. აგერ მოძღვარნი, მამა-პაპანი, ძენი და ბიძანი, სიმამრნი, შვილიშვილნი, მძახალნი და სხვა ნათესავნი.
1:35. არ მსურს მათი სული, თუნდაც თავად მე ვიყო მოკლული მათ მიერ, ჩემო მადჰუსუდანა! არ მსურს ეს, თუნდაც ამას ჩემთვის სამივე სამყაროზე ძალაუფლeბა მოეცა! და მხოლოდ მიწიური ძალაუფლებისთვის რად ვქნა ეგ?
1:36. რა სიამოვნებას ვიხილავთ დჰრიტარაშტრას შვილთა დახოცვით, ჩემო ჯანარდანა? დიდ ცოდვას ჩავიდენთ, ამ აჯანყებულებს სიცოცხლეს თუ გამოვასალმებთ.
1:37. არ უნდა დავხოცოთ დჰრიტარაშტრას შვილნი, ნათესავნი ჩვენნი! ჩვენიანები თუ მოვკალით, ბედნიერნი როგორ ვიქნებით, ჩემო მადჰავა?
1:38. თუკი მათი ვნებით გატაცებული გონება ოჯახის ფუძის მოსპობაში ბოროტებას ვერ ხედავს, და თუკი მეგობრის მტრად აღიარებაში იგი ვერავითარ დანაშაულს პოულობს,
1:39. მაშ ჩვენ მაინც ამ საყოველთაო ნგრევაში რახან მხოლოდ სიავეს ვთესთ, - არ შევიცნოთ იგი და თავი შორს არ დავიჭიროთ ცოდვისგან, ჩემო ჯანარდანა?
1:40. საგვარეულოს განადგურებით საუკუნო გვაროვნული წეს-ჩვეულება ირღვევა; წეს-წყობილების მოსპობით მთელ საგვარეულოს უკანონობა მოიცავს;
1:41. უკანონობის დამკვიდრებით, ჩემო კრიშნა, საგვარეულოს დედაკაცნი ირყვნებიან; დედაკაცთა გარყვნილeბისგან, ჩემო ვარშნეია, ირევა ვარნები.
1:42. ეს არევა საგვარეულოს მკვლელებს ჯოჯოხეთს უმზადებს, ვინაიდან აღარავინ წირავს წინაპრებს ბრინჯსა და წყალს, და ისინი წუხდებიან ამის გამო.
1:43. ვარნების ამრევ ამ მკვლელთა ცოდვით ნადგურდება უძველესი საგვარეულო და კასტური წეს-წყობილება.
1:44. ხოლო საგვარეულოს წესთა განმანადგურებელნი სამუდამოდ ჯოჯოხეთში რჩებიან, ჩემო ჯანარდანა! ასე გაგვიგია ჩვენ ყველას.
1:45. ვაჰ მე! სამეფოს მრძანებლობის ჟინით შეპყრობილნი მზად ვართ ცოდვა ჩავიდინოთ და ჩვენნი აჯანყებულნი ნათესავნი დავხოცოთ!
1:46. უფრო ის მემსუბუქება, რომ ბრძოლაში შეუიარაღებელი თავად დავიღუპო დჰრიტარაშტრას იარაღით აღჭურვილ შვილთა ხელით.
სანჯაიამ თქვა:
1:47. წარმოთქვა რა ბრძოლის ველზე ეს სიტყვები, გულისტკივილით აღსავსე არჯუნა საბრძოლო ეტლში დაეშვა. მან ხელი უშვა მშვილდს და ისრებს.
დალოცვილი ბჰაგავადგიტას, მეცნიერების ჭეშმარიტების შესახებ, იოგას წმინდა წერილის მართლმადიდებელ უპანიშადებში ასე და ამგვარად სრულდება პირველი თავი სახელწოდებით:
არჯუნას სასოწარკვეთილება

კრიშნა და არჯუნა


მეც მაქვს კარგი წიგნი კრშნაზე, ვისაც უნდა ვათხოვებ
tikoroma
Atman
შენ აუდიო წიგნები გიყვარს და რაღაც ვიპოვე შენთვის smile.gif
ბჰაგავატ გიტას აუდიო თეატრალური ვერსია (რუსულ ენაზე)

http://forum.ge/?f=84&showtopic=34009520&st=15
ამ გვერდზე ნახავ ლინკებს
Atman
tikoroma

ეგენი მე დავდე მაგ საიტზე biggrin.gif თან ლინკები უკვე აღარ მუშაობს. თუ ვინმეს მოუნდება თავიდან ავტვირთავ...
tikoroma
biggrin.gif biggrin.gif
აუ, ვიფიქრე ეს ის ხო არაა-მეთქი, მაგრამ რომ გინდოდა გიტას ტექსტი ეგ გამახსენდა და გადავიფიქრე smile.gif
Atman
tikoroma

ხო, გიტას ქართული ტექსტი სხვებისთვის მინდა თორე მე რუსულად მირჩევნია wink.gif
Atman
ბჰაგავატ გიტა (აუდიოწიგნი რუსულად)




http://bin.ge/file/96146/1.zip.html
http://bin.ge/file/96151/2.zip.html
http://bin.ge/file/96162/3.zip.html
http://bin.ge/file/96171/4.zip.html
Atman
დავიწყებ პირველი და მეორე თავით. თანდათან შემოვამატებ... ელექტრონული ვერსია არსადაა სხვაგან, ასე რომ ექსკლუზივია wink.gif



ბჰაგავატ გიტა
(ბჰაქტივედანტა სვამი შრილა პრაპჰუპადას თარგმანი)
(კომენტარების გარეშე)


თავი პირველი
კურუკშეტრას ბრძოლის ველზე შეკრებილ
ლაშქართა დათვალიერება

1. დჰრტარაშტრამ თქვა: ო სანჯაია, როგორ მოიქცნენ მწირობის ადგილას, კურუკშეტრაზე შეკრებილი ბრძოლის ჟინით აღსავსე ჩემი და პანდუს შვილები?
2. სანჯაიამ თქვა: ო, მეფეო! თვალი მოავლო რა პანდუს შვილთა მიერ განლაგებულ ლაშქარს, მეფე დურიოდჰანა თავის მოძღვარს მიუახლოვდა და შემდეგი სიტყვები წარმოთქვა.
3. ო ჩემო მოძღვარო, შეხედე პანდუს შვილთა ძლევამოსილ ლაშქარს, ასე უნარიანად რომ განულაგებია შენს გონიერ მოწაფეს, დრუპადას ძეს.
4. ამ ლაშქარში მრავალი გმირი მშვილდოსანია, რომელიც ბრძოლაში ბჰიმასა და არჯუნას არ ჩამოუვარდება. მათ შორის არიან იუიუდჰანა, ვირატა და დრუპადას დარი დიადი მებრძოლები.
5. იქ არიან დჰრშტაკეტუს, ჩეკიტანას, კაშიჯარას, პურუჯიტის, კუნტიბჰოჯასა და შაიბიას მსგავსი დიადი, გმირი, ძლევამოსილი მეომრები.
6. იქ არიან ძლევამოსილი იუდჰამინიუ და უძლიერესი უტტამაუჯა, სუბჰადრას ძედ ა დრაუპადის ვაჟიშვილები. ყოველ ამ მეომარს ეტლზე ბრძოლის დიდი გამოცდილება აქვს.
7. ო შეუდარებელო ბრაჰმანო, ნება მიბოძე ჩვენი მხედართმთავრების შესახებაც მოგახსენო, ისინი განსაკუთრებული თვისებებით არიან შემკული და ჩემი სამხედრო ძალების წინამძღოლობას იმსახურებენ.
8 ესენი ხართ შენ, ბჰიშმა, კარმა, კრპა, აშვატთჰამა, ვიკარნა და სომადატტას ვაჟი, სახელად ბჰურიშრავა, რომელთაც მუდამ თაბნ ახლავთ გამარჯვება.
9. აქ შეხვდები მრავალ სხვა გმირსაც, რომლებიც მუდამ მზად არიან თავი გასწირონ ჩემთვის. ყველა შესაფერისადაა ათასგვარი იარაღით აღჭურვილი და გამოცდილია სამხედრო ხელოვნებაში.
10. ჩვენი ძალები განუზომელია და ბაბუა ბჰიშმა მშვენივრად გვიცავს, მაშინ როცა შეზღუდულია პანდავთა ძალები, რომელთაც საგულდაგულოდ მფარველობს.
11. ახლა ყველანი ბოლომდე მხარში უნდა ამოუდგეთ ბაბუა ბჰიშმას, როგორც კი ლაშქარის რიგების შესასვლელში სათანადო სტრატეგიულ ადგილებს დაიკავებთ.
12. მაშინ კურუთა დინასტიის დიდმა, მამაცმა მამამთავარმა, მეომართა ბაბუა ბჰიშმამ ხმამაღლა ჩაბერა თავის ნიჟარას და გამოსცა ლომის ღრიალის მაგვარი ხმა, რამაც სიხარულით აავსო დურიოდჰანას გული.
13. ამის შემდეგ უეცრად გაისმა მთელი ნიჟარების დოლების, ბუკების, საყვირებისა და რქების ყურისწამღები ხმა.
14. მოპირდაპირე მხრიდან, თეთრი ცხენებით შებმულ ეტლში მსხდომმა უფალმა კრშნამ და არჯუნამ თავიანთ ტრანსცენდენტალ ნიჟარებს ჩაბერეს.
15. უფალმა კრშნამ ჩაბერა თავის ნიჟარას, რომელსაც პანჩაჯანია ერქვა; არჯუნამ თავისას, დევადატტას, ბჰიმამ კი, გაუმაძღარმა და დევგმირულ საქმეთა ჩამდენმა, - თავის შიშისმომგვრელ ნიჟარას, რომელსაც პაუნდრა ერქვა.
16-18. კუნტის ვაჟიშვილმა, მეფე იუდჰიშთჰირამ ჩაბერა თავის ნიჟარა ანანტავიჯაიას, ნაკულამ და საჰადევამ ჩაბერეს სუგჰოშასა და მანიპუშპაკას. აგრეთვე დიადმა მშვილდოსანმა კაშის მეფემ, ძლევამოსილმა მებრძოლმა შიქჰანდიმ, დჰრშტადიუმნამ, ვირატამ, დაუმარცხებელმა სატიაკიმ, დრუპადიმ, დრუპადის ვაჟიშვილებმა და სხვებმა, ო მეფეო, სუბჰადრას მკლავმაგარმა შვილმა, ყველამ თავის ნიჟარას ჩაბერა.
19. ამ ნიჟარების ხმები საშინელ ხმაურში გადაიზარდა, ცა და დედამიწა შეარყია და შეძრა დჰრტარაშტრას ვაჟიშვილთა გულები.
20. ამ დროს პანდუს ვაჟიშვილმა არჯუნამ, რომლის ეტლზეც ჰანუმანის გამოსახულებით დამშვენებული დროშა იყო აღმართული, აიღო მშვილდი და ისრები სასროლად მოამზადა. ო მეფეო, მებრძოლ რიგებად დაწყობილი დჰრტარაშტრას შვილების დანახვაზე არჯუნამ ასე მიმართა უფალ კრშნას.
21-22. არჯუნამ თქვა: ო შეუცდომელო, გთხოვ გაიყვანე ჩემი ეტლი ლაშქართა შორის, რათა ვიხილო აქ შეკრებილნი, ბრძოლას მოწყურებულნი, რომლებთანაც მომიწევს შეტაკება ამ დიდ ომში.
23. მაჩვენე ისინი, ვინც საბრძოლველად შეიკრიბნენ აქ, რათა სიამოვნება მოჰგვარონ დჰრტარაშტრას ბოროტ შვილს.
24. სანჯაიამ თქვა: ო ბჰარატას შთამომავალო, არჯუნას ამ მიმართვის შემდეგ, უფალმა კრშნამ მშვენიერი ეტლი მოწინააღმდეგეთა ლაშქართა შუა გაიყვანა.
25. ბჰიშმას, დრონასა და მსოფლიოს დანარჩენი სარდლების თანდასწრებით უფალმა თქვა: ხედავ, პართჰა, ყველა კურუ აქაა შეკრებილი.
26. იქ, ლაშქართა ორივე მხარეს არჯუნამ თავის მამები, ბაბუები, მოძღვრები, დედის მხრიდან ბიძები, ძმები, შვილები, შვილიშვილები, მეგობრები, აგრეთვე სიმამრები და კეთილმსურველები იხილა.
27. ამდენი მეგობრის და ნათესავის ხილვამ კუნტის შვილი სიბრალულით აღავსო და მან თქვა.
28. არჯუნამ თქვა: ჩემს წინაშე მდგომი ბრძოლის სურვლით შეპყრობილი მეგობრებისა და ნათესავების შემყურე ვგრძნობ, რომ კიდურები მიკანკალებს და პირი მიშრება.
29. მთელი ტანი მიკანკალებს, თმები ყალყზე მიდგება, მშვილდი განდივა ხელიდან მივარდება და კანი მეწვის.
30. აქ გაჩერება აღარ შემიძლია, თავი მავიწყდება და გონება მერევა. ამის შედეგად მხოლოდ უბედურება მესახება, ო კრშნა, დემონ კეშის მკვლელო.
31. ვერ გამიგია რას გვარგებს ბრძოლაში საკუთარი ნათესავების დახოცვა, ძვირფასო კრშნა. ამის შემდეგ ხომ ვერც ვისურვებ რაიმე გამარჯვებას, სამეფოს ან ბედნიერებას.
32-35. ო გოვინდა, რას გვარგებს სამეფო, ბედნიერება, ან თვით სიცოცხლეც კი, როდესაც ბრძოლის ველზე ჩვენს წინააღმდეგ ამხედრებულან ისინი, ვისთან ერთადაც ყოველივე ეს გვინდოდა. ო მადჰუსუდანა, როდესაც მოძღვრები, მამები, შვილები, ბაბუები, დედის მხრიდან ბიძები, სიმამრები, შვილიშვილები, სიძეები და სხვა ნათესავები მზად არიან თავი და საკუთრება გასწირონ და ჩემს წინაშე დგანან, რად უნდა მსურდეს მათი მოკვლა, მაშინაც კი, თუკი შეიძლება მათ მომკლან. ო ყოველი ცოცხალი არსების მასულდგმულებელო, მე არ შევებრძოლები მა თარა მარტო დედამიწის, არამედ სამი სამყაროს სანაცვლოდაც კი. რა სიხარულს მოგვიტანს დჰრტარაშტრას ვაჟიშვილების დახოცვა?
36. ასეთ ბოროტმოქმედთა მკვლელობით ცოდვა მოგვეწევა. ჩვენ არ შეგვფერის დჯრტარაშტრას შვილებისა და ჩვენი მეგობრების დახოცვა. ო კრშნა, ბედის ქალღმერთის მეუღლევ, როგორ ვიქნებით ბედნიერი, თუკი საკუთარ ნათესავებს სიცოცხლეს გამოვასალმებთ?
37-38. ო ჯანარდანა, თუმცა ეს ადამიანები, გულები რომ სიხარბით აქვთ აღსავსე, საკუთარი ოჯახის მოსპობაში, ან მეგობრებთან ჩხუბში ცუდს ვერაფერს ხედავენ, რატომ უნდა ჩავიდინოთ ეს ცოდვა ჩვენ, ოჯახის განადგურებაში დანაშაულს რომ ვხედავთ?
39. საგვარეულოს მოსპობით ოჯახის საუკუნო ტრადიციები ისპობა, რის გამოც ოჯახის დარჩენილი წევრები არარელიგიურ საქმეებში ებმებიან.
40. როდესაც ოჯახში არარელიგიურობა ბატონობს, ო კრშნა, ოჯახის ქალები იბილწებიან და ქალთა დეგრადაციის შედეგად, ო ვრშნის შთამომავალო, არასასურველი შთამომავლობა ჩნდება.
41. არასასურველი მოსახლეობის მოჭარბება უთუოდ აუტანელს ხდის ოჯახისა და საოჯახო ტრადიციების დამანგრეველთა სიცოცხლეს. ასსეტ წახდენილ ოჯახთა წინაპრები ეცემიან, ვინაიდან მათთვის საჭმლისა და წყლის შეთავაზება წყდება.
42. ოჯახური ტრადიციების დამანგრეველთა ავი საქმეებით დასაბამი ეძლევათ არასასურველ შვილებს, ისპობა ერთობათა ყოველგვარი გეგმები და ოჯახური კეთილდღეობის საქმიანობები.
43. ო კრშნა, კაცობრიობის მასულდგმულებელო, მოწაფეობრივი თანმიმდევრობისაგან მსმენია, რომ ჯოჯოხეთია ოჯახური ტრადიციების დამრღვევთა საუკუნო საცხოვრებელი.
44. ვაი, რა საოცარია, რომ მზად ვართ უმძიმესი ცოდვები ჩავიდინოთ. სამეფო ბედნიერებით განცხრომას მოწყურებულთ საკუთარი ნათესავების დახოცვა განგვიზრახავს.
45. მირჩევნია უიარაღო და წინააღმდეგობის სურვილს მოკლებული იარაღასხმულმა დჰრტარაშტრას შვილებმა მომკლან ბრძოლის ველზე.
46. სანჯაიამ თქვა: წარმოთქვა რა ეს ბრძოლის ველზე, არჯუნამ მშვილდ-ისარი გადადო და ეტლში ჩაჯდა. სევდას მოეცვა მისი გონება.
Atman
თავი მეორე
გიტას მოკლე შინაარსი

1. სანჯაიამ თქვა: გონებადათრგუნული, სიბრალულით აღსავსე და თვალცრემლიანი არჯუნას დანახვაზე მადჰუსუდანამ, კრშნამ შემდეგი სიტყვები წარმოთქვა.
2. ღმრთეების უზენაესმა პიროვნებამ თქვა: ჩემო ძვირფასო არჯუნა, როგორ დაგეუფლა ასეთი უწმინდურება? ეს სრულიად არ შეშვენის მას, ვისაც შეგნებული აქვს ცხოვრების მნიშვნელობა. ეს გზა უმაღლეს პლანეტებამდე კი არა, სირცხვილამდე მიგიყვანს.
3. ო პრთჰას შვილო, ნუ დანებდები ამ დამამცირებელ უძლურებას. ეს შენ არ შეგფერის. არ აჰყვე დამაკნინებელ გულის სისუსტეს და აღსდექ, ო მტრის შემმუსვრელო.
4. არჯუნამ თქვა: ო მტრის შემმუსვრელო, ო მადჰუს მკვლელო, ბრძოლაშიისრებით როგორ მოვიგერიო სეთი ხალხი, როგორიც არიან ბჰიშმა და დრონა, ჩემი თაყვანისცემის ღირსნი?
5. უმჯობესია ამქვეყნად თავი მათხოვრობით გავიტანო, ვიდრე ჩემს მოძღვართა, დიად სულთა სიცოცხლის ფასად ვიარსებო. ამქვეყნიური მოგების სურვილიც რომ ამოძრავებდეთ, მაინც უფროსები არიან. თუკი მათ მოვკლავთ, ყველაფერი, რითაც დავტკბებით, სისხლით იქნება შეღებილი.
6. არც ის ვიცით რა გვიჯობს – დავამარცხოთ ისინი, თუ დაგვამარცხონ მათ. თუკი დჰრტარაშტრას შვილებს მოვკლავთ, სიცოცხლე არ უნდა გვინდოდეს. ახლა კი ისინი ბრძოლის ველზე ჩვენს წინააღმდეგ ამხედრებულან.
7. ახლა მოვალეობამ საგონებელში ჩამაგდო და მდაბიურმა სისუსტემ მოსვენება დამიკარგა. გთხოვ, დანამდვილებით მითხარი, რა არის ჩემთვის უკეთესი. ახლა შენი მოსწავლე და შენზე მინდობილი სული ვარ. გთხოვ, მასწავლე.
8. არ ვიცი რით გავიქარვო სევდა, რომელიც გრძნობებს მიშრობს. მას მაშინაც ვერ ვძლევ, თუკი დედამიწაზე აყვავებულ, სწორუპოვარ სამეფოს დავიპყრობ, ისეთსავე დამოუკიდებელს, როგორიც ნახევარღმერთებს აქვ ზეცაში.
9. სანჯაიამ თქვა: ეს სიტყვები რომ წარმოთქვა, არჯუნამ, მტრის შემმუსვრელმა მიმართა კრშნას, “გოვინდა, მე არ ვიბრძოლებ” და ჩაჩუმდა.
10. ო ბჰარატას შთამომავალო, ამ დროს ორ ლაშქარს შუა მდგომმა პირმოცინარმა კრიშნამ ასეთი სიტყვებით მიმართა სევდით განგმირულ არჯუნას.
11. ღმრთეების უზენაესმა პიროვნებამ თქვა: ბრძენივით ლაპარაკობ, მაგრამ დასტირი იმას, რაც მწუხარებად არა ღირს. ბრძენნი არ გლოვობენ არც ცოცხალზე და არც მკვდარზე.
12. არასოდეს ყოფილა ისეთი დრო, როცა მე, შენ ან ყველა ეს მეფეები არ ვარსებობდით; მომავალშიც არც ერთ ჩვენგანს სიკვდილი არ გვიწერია.
13. როგორც ხორცშესხმული სული გამუდმებით გადადის ამ სხეულში ბავშვობიდან სიჭაბუკეში და სიჭაბუკიდან სიბერეში, სწორედ ასევე სიკვდილის ჟამს სული გადადის სხვა სხეულში. გონიერ ადამიანს არ ატყუებს ასეთი ცვლილება.
14. ო კუნტის შვილო, ბედნიერებისა და უბედურების წარმავალი გამოჩენა და დროთა ვითარებაში მათი გაუჩინარება ზამთრისა და ზაფხულის გამოჩენა-გაუჩინარებას ჰგავს. ისინი გრძნობათა აღქმიდან აღმოცენდება, ო ბჰარატას შთამომავალო და ადამიანმა უნდა ისწავლოს შეუშფოთებლად მათი მოთმენა.
15. ო კაცთა შორის საუკეთესოვ (არჯუნა), პიროვნება, რომელსაც არ აწუხებს ბედნიერება და ტანჯვა და რომელიც ორივეს მიმართ მტკიცეა, უდაოდ ღირსია განთავისუფლებისა.
16. ჭეშმარიტების მხილველებმა დაასკვნეს, რომ არარსებული (მატერიალური სხეული) დღეგრძელი არ არის და რომ მარადიულს (სულს) ცვლილება არ უწერია. ამ დასკვნამდე ისინი ორივეს ბუნების შესწავლის საფუძველზე მივიდნენ.
17. იცოდე, რომ ის, რაც მთელ სხეულს გამსჭვალავს, ურღვევია. არავის ძალუძს ამ უხრწნადი სულის განადგურება.
18. უხრწნადი, განუზომელი და მარადიული ცოცხალი არსების მატერიალურ სხეულს აუცილებლად სიკვდილი უწერია; ამიტომ იბრძოლე, ბჰარატას შთამომავალო!
19. ცოდნა არა აქვს მას, ვინც თვლის, რომ ცოცხალი არსება მკვლელია და არც მას, ვისაც ჰგონია, რომ ცოცხალი არსება კვდება, ვინაიდან სული არც არავის კლავს და არც კვდება.
20. სულისათვის არასოდეს არსებობს დაბადება ან სიკვდილი. იგი არც გაჩენილა, არც ჩნდება და არც გაჩნდება. არშობილი, მარადიული, მუდამ არსებული და თავდაპირველია. იგი არ კვდება სხეულის მოკვლასთან ერთად.
21. ო პართჰა, როგორ უნდა მოკლას ვინმე ან მკვლელობის მიზეზი გახდეს ის, ვინც იცის, რომ სული ურღვევი, მარადიული, არშობილი და უცვლელია?
22. ასევე როგორც ადამიანი იხდის ძველ ტანსაცმელს და ახლით იმოსება, სულიც ასევე ღებულობს ახალ მატერიალურ სხეულებს, როცა ძველსა და უვარგისს ტოვებს.
23. სული არც რაიმე იარაღით იჭრება, არც ცეცხლით იწვის, არც წყალში სველდება და არც ქარში შრება.
24. ეს ინდივიდუალური სული დაუნაწევრებელი და უხსნადია და შეუძლებელია მისი დაწვა ან გამოშრობა. იგი მარადიული, ყველგანმყოფი, უცვლელი, უძრავი და მუდამ ერთი და იგივეა.
25. ამბობენ, რომ სული უხილავი, წარმოუდგენელი და უცვლელია. თუკი ეს იცი, სხეულზე არ უნდა იდარდო.
26. თუკი მაინც ფიქრობ, რომ სული (ან სიცოცხლის ნიშნები) მუდამ იბადება და მარად კვდება, მაინც არა გაქვს გლოვეს მიზეზი, ო მკლავმაგარო.
27. ვინც იბადება მისთვის სიკვდილი გარდუვალია და სიკვდილის შემდეგ კვლავ დაბადება მოელის. ამიტომ ნუ იგლოვებ შენი გარდაუვალი მოვალეობის აღსრულებისას.
28. ყოველი შექმნილი არსება დასაწყისში გამოუვლენელია, შუალედურ მდგომარეობაში ვლინდება და მოსპობისას კვლავ გამოუვლენელი ხდება. მა შრა საჭიროა გლოვა?
29. ზოგი შეჰყურებს სულს, როგორც საოცრებას, ზოგი აღწერს მას, როგორც საოცრებას და ზოგი ისმენს მასზე, როგორც საოცრებაზე, მაშუინ როცა სხვები მოსმენის შემდეგაც კი საერთოდ ვერ ხვდებიან მას.
30. ო ბჰარატას შთამომავალო, შეუძლებელია იმის მოკვლა, ვინც ამ სხეულში ცხოვრობს. ამიტომ ნურც ერთ ცოცხალ არსებაზე ნუ იდარდებ.
31. შენი, როგორც კშატრიას განსაკუთრებულ მოვალეობაზე ფიქრისას იცოდე, რომ შენთვის არ არსებობს რელიგიური პრინციპებისთვის ბრძოლაზე უკეთესი საქმიანობა; ამიტომ ყოყმანი საჭირო არ არის.
32. ო პართჰა, ბედნიერი არიან კშატრიები, რომელთაც ძებნის გარეშე ეძლევათ ბრძოლის ასეთი შესაძლებლობა, რომელიც ზეციური პლანეტებისაკენ უხსნის მათ გზას.
33. მაგრამ თუკი ბრძოლის რელიგიურ ვალს არ მოიხდი, აუცილებლად ცოდვას მოიწევ საკუთარ მოვალეობათა უგულველყოფის გამო და მეომრის სახელს წაიხდენ.
34. ხალხი მუდამ შენ სირცხვილზე ილაპარაკებს, პატივცემულ ადამიანს კი უსახელობას სიკვდილი ურჩევნია.
35. დიადი მხედარმთავრები, რომლებიც ფრიად აფასებენ შენს სახელსა და დიდებას, იფიქრებენ, რომ მხოლოდ შიშმა დაგვატოვებინა ბრძოლის ველი და არარაობად ჩაგთვლიან.
36. მტრები აუგად მოგიხსენიებენ და აბუჩად აიგდებენ შენს უნარს. რა მოგაყენებს ამაზე მეტ ტანჯვას?
37. ო კუნტის შვილო, შენ ან ბრძოლის ველზე მოკვდები და ზეციურ პლანეტებს მიაღწევ, ან მიწიერ სამეფოს დაიმორჩილებ და მით დატკბები. ამიტომ მოუხმე სიმტკიცეს, აღსდექი და იბრძოლე.
38. იბრძოლე ბრძოლისათვის. ნუ იფიქრებ ბედნიერებისა და უბედურებაზე, ზარალსა და მოგებაზე, გამარჯვებასა და მარცხზე. ამ გზით არასოდეს დაიდებ ცოდვას.
39. აქამდე ეს ცოდნა ანალიტიკური შAესწავლის გზით დაგიხასიათე. ახლა ამ ცოდნას კარმიული შედეგების გარეშე შრომის ცნებებით აგიხსნი. ო პართჰას შვილო, ამგვარი ცოდნით მოქმედების შედეგად შრომის მარწუხებიდან განთავისუფლდები.
40. ამგვარი მცდელობისას არ არსებობს ზარალი ან დანაკარგი. ამ გზაზე მცირეოდენ წინსვლასაც შეუძლია ადამიანი ყველაზე სახიფათო შიშისგან დაიფაროს.
41. ამ გზაზე მდგომთ მტკიცე მისწრაფება ამოძრავებთ და მათი მიზანი ერთია. ო კურუთა საყვარელო შვილო, მრავლად განტოტვილია არამტკიცეთა გონება.
42-43. ღარიბი ცოდნის მქონე ადამიანები ძლიერად არიან მიჯაჭვულნი ვედების ყვავილოვან სიტყვებს, რომლებიც ზეციურ პლანეტებზე ამაღლების, კარგი დაბადების, ძალაუფლების და სხვათა მოსაპოვებლად სხვადასხვა კარმიული საქმიანობების რჩევას იძლევა. გრძნობათა დაკმაყოფილებისა და მდიდრული ცხოვრების მოსურნენი, ისინი აცხადებენ, რომ ამაზე მაღლა აღარაფერი არსებობს.
44. მათ, ვისი ჭკუაც მეტისმეტად არის მიჯაჭვული გრძნობათა დაკმაყოფილებასა და მატერიალურ სიმდიდრეს, ვინც ამგვარი საგნებით არიან მოტყუებული, მტკიცედ ვერ გადაუწყვეტიათ უზენაესი უფლისადმი ერთგული სამსახური.
45. ვედები უმთავრესად მატერიალური ბუნების სამ მოდუსს ეხება. ო არჯუნა, აღიმართე ამ სამ მოდუსზე მაღლა. განთავისუფლდი ყოველგვარი ორმაგობის, მოხვეჭისა და უსაფრთხოების გამო შფოთვისაგან და განმტკიცდი მეობაში.
46. დიდ წყალსაცავს შეუძლია შეასრულოს ყველა მიზანი, რომელსაც პატარა ჭა ემსახურება. სწორედ ასევე, ვინც ვედების საბოლოო მიზანი იცის, მისთვის ვედების ყოველი მიზანი სრულდება.
47. შენ უფლება გაქვს შეასრულო შენზე დაწესებული მოვალეობები, მაგრამ მოქმედების ნაყოფები შენ არ გეკუთვნის. ნურასოდეს მიიჩნევ თავს საკუთარ მოქმედებათა შედეგების მიზეზად და ნურც მოვალეობის შესრულებას აირიდებ.
48. გაწონასწორებულმა შეასრულე შენი მოვალეობა, ო არჯუნა, თავი ანებე ყოველგვარ მიჯაჭვულობას წარმატებასა და მარცხზე. ამგვარ სიდინჯეს იოგა ეწოდება.
49. ო დჰანანჯაია, ერთგული სამსახურით აირიდე ყოველგვარი საძულველი საქმიანობა და ამ ცნობიერებით მიენდე უფალს. ისინი, ვისაც საკუთარი შრომის შედეგებით ტკბობა სურთ, ძუნწები არიან.
50. ერთგული სამსახურით დაკავებული ადამიანი ამ ცხოვრებაშივე აღწევს თავს როგორც კარგს, ასევე ცუდ საქმიანობასაც. ამიტომ მიესწრაფე იოგას, რომელიც ყოველგვარი შრომის ხელოვნებაა.
51. უფლის ამგვარი სამსახურით დიადი ბრძენები, ანუ ერთგულები, მატერიალურ სამყაროში შრომის შედეგებისგან განთავისუფლდნენ. ამგვარად, მათ თავი დააღწიეს დაბადება-სიკვდილის ციკლს და ყოველ გაჭირვებაზე ამაღლდნენ (დაუბრუნდნენ რა ღმრთეებას).
52. როდესაც შენი გონება ილუზიის უღრანი ტყიდან გამოვა, გულგრილი გახდები ყველაფრის მიმართ, რაც მოგისმენია და რასაც მოისმენ.
53. როდესაც შენ ჭკუას აღარ შეაშფოთებს ვედების ყვავილოვანი ენა და თვითრეალიზაციის ტრანსში განმტკიცდება, მაშინ ღვთაებრივ ცნობიერებას მიაღწევ.
54. არჯუნამ თქვა: ო კრშნა, რა ნიშნები ახასიათებს მას, ვისი ცნობიერებაც ასე ჩაძირულია ტრანსცენდენციაში? როგორ ლაპარაკობს იგი და როგორია მისი ენა? როგორ ზის და როგორ დადის?
55. ღმრთეების უზენაესმა პიროვნებამ თქვა: ო პართჰა, როდესაც ადამიანი უარს ამბობს ჭკუის მიერ წარმოსახულისგან აღმოცენებულ გრძნობათა დაკმაყოფილების ყოველგვარ სურვილზე და როდესაც მისი ამგვარად განწმენდილი ჭკუა კმაყოფილებას მხოლოდ საკუთარ თავში პოულობს, მაშინ ამბობენ, რომ იგი წმინდა ტრანსცენდენტალ ცნობიერებაში იმყოფება.
56. ვისი ჭკუაც არ ღელავს სამგვარი ტანჯვების დროს და არც ბედნიერების ჟამს არის აღფრთოვანებული, ვინც თავისუფალია მიჯაჭვულობის, შიშისა და მრისხანებისაგან, მას მტკიცე ჭკუის ბრძენი ეწოდება.
57. ვისზედაც არ მოქმედებს მატერიალურ სამყაროში მომხდარი კარგი ან ცუდი, ვინც არც აქებს ამას და არც სძულს, მყარად არის განმტკიცებული სრულყოფილ ცოდნაში.
58. ვისაც საკუთარი გრძნობების გრძნობათა ობიექტებისგან ჩამოცილება შეუძლია ისევე, როგორც კუს შეაქვს კიდურები ჯავშანში, მყარად არის განმტკიცებული სრულყოფილ ცნობიერებაში.
59. ხორცშესხმულმა სულმა შეიძლება თავი შეიკავოს გრძნობათა დაკმაყოფილებისგან, მაგრამ გრძნობათა საგნების გემოს მაინც არ კარგავს. ხოლო უმაღლესი გემოს გამოცდის შედეგად ამგვარი საქმიანობების შეწყვეტით იგი ცნობიერებაში მტკიცდება.
60. გრძნობები იმდენად ძლიერი და მგზნებარეა, ო არჯუნა, რომ ისინი იძულებით წარიტაცებენ განრჩევის უნარის მქონე ადამიანის ჭკუას, რომელიც მათ მართვას ცდილობს.
61. ის, ვისაც ალაგმული აქვს გრძნობები მათი სრული დამორჩილების გზით და ვისი ცნობიერებაც ჩემსკენაა მომართული, მტკიცე გონების ადამიანად არის ცნობილი.
62. გრძნობათა ობიექტების განჭვრეტისას პიროვნებას მათდამი მიჯაჭვულობა უჩნდება, ასეთი მიჯაჭვულობისგან ავხორცობა ვითარდება, ავხორცობისგან კი წარმოიშვება მრისხანება.
63. მრისხანებისგან ილუზია წარმოიშვება, ილუზიისგან კი – მეხსიერების დაბნევა. როდესაც მეხსიერება დაბნეულია, გონიერება იკარგება, რის შედეგადაც ცოცხალი არსება კვლავ მატერიალურ ტბორში ვარდება.
64. მაგრამ მას, ვინც თავისუფალია ყოველგვარი მიჯაჭვულობისა და ზიზღისგან და ვინც გრძნობებს თავისუფლების მარეგულირებელი პრინციპებით მართავს, უფლის სრული წყალობის მოპოვება შეუძლია.
65. მასზე, ვინც ამგვარად არის დაკმაყოფილებული (კრშნას ცნობიერებაში), აღარ მოქმედებს მატერიალური ყოფიერების სამგვარი ტანჯვები; ასსეტ დაკმაყოფილებულ ცნობიერებაში მისი გონიერება მალე მტკიცდება.
66. მას, ვინც უზენაესთან არ არის დაკავშირებული (კრშნას ცნობიერებაში), ვერც ტრანსცენდენტული გონება ექნება და ვერც მტკიცე ჭკუა, რის გარეშეც წარმოუდგენელია მშვიდობა. და განა შესაძლოა რაიმე ბედნიერება მშვიდობის გარეშე?
67. როგორც ძლიერი ქარი იტაცებს წყალში მოცურავე ნავს, ერთ მოხეტიალე გრძნობასაც კი, რომლისკენაც ჭკუაა მიმართული, შეუძლია წარიტაცოს კაცის გონიერება.
68. ამიტომ ო მკლავმაგარო, მას, ვისი გრძნობებიც ალაგმულია მათი ობიექტებისაგან, უდაოდ მტკიცე გონიერება აქვს.
69. ის, რაც ღამეა ყოველი არსებისთვის, თვითკონტროლირებულისთვის გამოღვიძების დროა; და ყოველი არსების გამოღვიძების დრო ღამეა თვითდაკვირვებული ბრძენისათვის.
70. მხოლოდ ის, ვისა ცარ აწუხებს სურვილების განუწყვეტელი ნაკადი, რომელიც მდინარეების მსგავსად მუდამ სავეს და წყნარ ოკეანეში ჩადის, აღწევს მშვიდობას და არა ის, ვინც ასეთ სურვილთა დაკმაყოფილებას ესწრაფვის.
71. მხოლოდ ის, ვინც უარი თქვა გრძნობათა დაკმაყოფილების ყოველგვარ სურვილზე, ვინც თავისუფალია სურვილებისგან, ვინც დაკარგა ყოველგვარი საკუთრების გრძნობა და ვინც მოკლებულია ცრუ ეგოს, აღწევს ჭეშმარიტ სიმშვიდეს.
72. ასეთია სულიერი და საღმრთო ცხოვრება, რომლის მიღწევის შემდეგაც ადამიანი აღარ ცდება. თუკი კაცი ამ მდგომარეობამდე სიკვდილის ჟამს მაინც მივა, ღმერთის სასუფეველში შეაღწევს.
Atman
თავი მესამე
კარმა იოგა

1. არჯუნამ თქვა: ო ჯანარდანა, ო კეშავა, რატომ გვსურს ამ საშინელ ომში ჩამაბა, თუკი თვლი, რომ გონება ჯობს კარმიულ მოღვაწეობას?
2. შენი ორაზროვანი დარიგებების გამო ჩემი გონება საგონებელშია ჩავარდნლი. ამიტომ გთხოვ დანამდვილებით მითხარი. რა იქნება ჩემთვის ყველაზე სასიკეთო.
3. ღმრთეების უზენაესმა პიროვნებამ თქვა: ო უცოდველო არჯუნა, მე უკვე განვმარტე, რომ არსებობენ ორი სახის ადამიანები, რომლებიც საკუთარი მეობის შეცნობას ცდილობენ. ამას ზოგი ემპირიული, ფილოსოფიური სპეკულაციებით ესწრაფვის, ზოგიც – ერთგული სამსახურით.
4. ადამიანი რეაქციებისგან ვერც შრომაზე უბრალო უარის თქმით განთავისუფლდება და ვერც მხოლოდ განდეგილობით მიაღწევს სრულყოფილებას.
5. ყოველი ცოცხალი არსება იძულებულია იმოქმედოს უმწეოდ იმ თვისებათა თანახმად, რომელიც მატერიალური ბუნებისგან შეიძინა; ამიტომ წამითაც შეუძლებელია მოქმედებისგან თავის შეკავება.
6. ის, ვინც სამოქმედო გრძნობებს აკავებს, მაგრამ ვისი ჭკუაც გრძნობათა ობიექტებზე ფიქრობს, უდაოდ თავს იტყუებს და თვალთმაქცი ჰქვია.
7. მეორე მხრივ თუკიუ გულწრფელი ადამიანი ჭკუის საშუალებით ცდილობს მოქმედი გრძნობების მართვას და მიჯაჭვულობის გარეშე იწყებს კარმა-იოგას (კრშნას ცნობიერებაში), იგი გაცილებით მაღლა დგას.
8. შეასრულე შენზე დაწესებული მოვალეობა, ვინაიდან ასეთი მოქმედება ჯობია უშრომლობას. შრომის გარეშე შეუძლებელია ფიზიკური სხეულის შენარჩუნებაც კი.
9. შრომა ვიშნუს სამსხვერპლოდ უნდა შესრულდეს; წინაარმდეგ შემთხვევაში შრომას მატერიალურ სამყაროში ტყვეობა მოჰყვება. ამიტომ, ო კუნტის შვილო, მის დასაკმაყოფილებლად შეასრულე შენზედ დაწესებული მოვალეობები და არასოდეს მოექცევი ტყვეობაში.
10. სამყაროს შექმნის დასაწყისში ყოველი არსების უფალმა დასაბამი მისცა კაცთა და ნახევარღმერთთა მოდგმას და ამ სიტყვებით აკურთხა ისინი: “იბედნიერეთ ამ იაჯნათი (მსხვერპლშეწირვით), ვინაიდან მისი შესრულება მოგიტანთ ყველაფერს ბედნიერი ცხოვრებისა და განთავისუფლებისათვის.”
11. მსხვერპლშეწირვებით დაკმაყოფილებული ნახევარღმერთები შენც დაგაკმაყოფილებენ და კაცთა და ნახევარღმერთთა თანამშრომლობით ქვეყანა ყველასთვის აყვავდება.
12. იაჯნას (მსხვერპლშეწირვლის) ჩატარებით დაკმაყოფილებული ნახევარღმერთები, რომელთაც სხვადასხვა სასიცოცხლო საჭიროებანი ავალიათ, ყოველივე აუცილებელს მოგცემენ. მაგრამ ის, ვინც ტკბება ასეთი საჩუქრებით და სანაცვლოდ ნახევარღმერთებს არ სთავაზობს მატ, უდაოდ ქურდია.
13. უფლის ერთგულებს მოხსნილი აქვთ ყოველგვარი ცოდვის სიმძიმე, რამეთუ თავიდან სამსხვერპლოდ შეთავაზებული საჭმლით იკვებებიან. სხვები, ვინც საკვებს საკუთარ გრძნობათა დასაკმაყოფილებლად ამზადებენ, სინამდვილეში ცოდვას მიირთმევენ მხოლოდ.
14. ყოველი ცოცხალი არსება საკვები მარცვლეულით საზრდოობს, რომელიც წვიმისგან წარმოიქმნება. წვიმას წარმოშობს იაჯნას (მსხვერპლშეწირვის) შესრულება, იაჯნა კი დაწესებული მოვალეობებისგან არის შობილი.
15. მოწესრიგებული საქმიანობა დაწესებულია ვედებში, ვედები კი უშუალოდ ღმრთეების უზენაესი პიროვნებისგან ვლინდება. ამიტომ მსხვერპლშეწირირვის აქტებში მარადიულად იმყოფება ყოვლისგამჭოლი ტრანსცენდენცია.
16. ჩემო ძვირფასო არჯუნა, ის, ვინც ადამიანის სიცოცხლეში არ მიჰყვება ვედების მიერ დაწესებულ მსხვერპლშეწირვის ციკლს, უთუოდ დიდად ცოდვილ ცხოვრებას ეწევა. ასეთი ადამიანის ცხოვრება ამაოა, რადგან მხოლოდ გრძნობათა დაკმაყოფილებაში ხედავს აზრს.
17. მაგრამ ვინც სიამოვნებას საკუთარ თავში პოულობს, ვინც ადამიანის სიცოცხლეს თვითრალიზაციისთვის იყენებს და ვინც მხოლოდ საკუთარ მეობაშია კმაყოფილი, მას ყოველგვარი მოვალეობა მოხსნილი აქვს.
18. დაწესებული მოვალეობიოს შესრულებისას თვითრეალიზებულ პიროვნებას არავითარი მიზნის მიღწევა არ სურს და არც ამგვარი შრომის შეუსრულებლობისათვის გააჩნია რაიმე მიზეზი. იგი არც სხვა ცოცხალ არსებებზეა დამოკიდებული.
19. ამიტომ ადამიანმა უნდა იმოქმედოს მოვალეობის გამო, მოქმედების ნაყოფზე მიჯაჭვულობის გარეშე, ვინაიდან მიჯაჭვულობის გარეშე შრომით იგი უზენაესს აღწევს.
20. ისეთმა მეფეებმა, როგორიც იყო ჯანაკა, სრულქმნას მიაღწიეს მხოლოდ დაწესებულ მოვალეობათა შესრულებით. ამიტომ ხალხის განათლების მიზნით მაინც უნდა შეასრულო შენი საქმიანობა.
21. რასაც დიდი ადამიანი ჩადის, უბრალო ხალხიც მას მიჰყვება. და რა ნორმებსაც ამკვიდრებს მაგალითით, მთელი მსოფლიოც იმ გზას ადგას.
22. ო პრთჰას შვილო, სამივე პლანეტარულ სისტემაში არ არსებობს ჩემთვის დაწესებული საქმე. მე არც არაფერი მსურს და არც არაფრის მოპოვება მჭირდება – და მაინც, ვასრულებ დაწესებულ მოვალეობებს.
23. ვინაიდან ოდესმე განუხრელად რომ არ შემესრულებინა დაწესებული მოვალეობები, ო პრთჰა, მთელი ხალხი უდაოდ ჩემს გზას დაადგებოდა.
24. დაწესებული მოვალეობები რომ არ შემესრულებინა, მთელი სამყარო განადგურდებოდა. მე ვიქნებოდი არასასურველი მოსახლეობის წარმოშობის მიზეზი, რითაც ყოველ ცოცხალ არსებას სიცოცხლეს მოვუსპობდი.
25. როგორც უგუნური ასრულებს საკუთარ მოვალეობებს შედეგებზე მიჯაჭვულობით, სწავლულმაც შეიძლება ასე იმოქმედოს, მაგრამ მიჯაჭვულობის გარეშე, რათა სწორი გზით გაუძღვეს ხალხს.
26. იმისათვის, რომ არ დაარღვიოს დაწესებულ მოვალეობათა კარმიულ შედეგებზე მიჯაჭვული უგუნური გონება, სწავლულმა არ უნდა შეაწყვეტინოს მათ შრომა. ნაცვლად ამისა, ღვთის ერთგულების სულით მოქმედებით, ათასგვარი საქმიანობით უნდა დააკავოს ისინი (კრშნას ცნობიერების თანდათანობით განვითარებისათვის).
27. ცრუ ეგოს გავლენით მოტყუებული სული თვლის, რომ თავად ასრულებს მოქმედებებს, რომლებიც სინამდვილეში მატერიალური ბუნების სამი მოდუსით სრულდება.
28. ვინც იცის აბსოლუტური ჭეშმარიტება, ო მკლავმაგარო, არ არის დაკავებული გრძნობებისა და გრძნობათა დაკმაყოფილების საქმეებით, კარგად ესმის რა განსხვავება უფლისადმი ერთგულებით შრომასა და კარმიული შედეგების გამო შრომას შორის.
29. მატერიალური ბუნების მოდუსებით მოტყუებული უგუნურები მთლიანად მატერიალისტურ საქმიანობებში არიან ჩაბმული და მიჯაჭვული ხდებიან. მაგრამ ბრძენმა არ უნდა შეაწუხოს ისინი, თუმცა შემსრულებლის მცირე ცოდნის გამო ეს მოვალეობები დაბალი დონისაა.
30. ამიტომ, ო არჯუნა, ყოველი საქმიანობა მომიძღვენი მე, იქონიე ჩემზე სრული ცოდნა, უარი თქვი გამორჩენის სურვილებზე, არ განაცხადო უფლება საკუთრებაზე, განაგდე უხალისობა და იბრძოლე.
31. პიროვნებები, რომლებიც ჩემი დანაწესების თანახმად ასრულებენ თავიანთ მოვალეობებს და ამ მოძღვრებას რწმენით, შურის გარეშე მიჰყვებიან, თავისუფლდებიან კარმიულ საქმიანობათა ტყვეობიდან.
32. მაგრამ ისინი, ვინც შურის გამო უგულვებელყოფენ და არ მიჰყვებიან ამ სწავლებებს, უნდა ჩაითვალონ ყოველგვარ ცოდნას მოკლებულად, გასულელებულად და განადგურებულად სრულქმნის თავიანთ მცდელობებში.
33. ცოდნის მქონე ადამიანიც კი საკუთარი ბუნების თანახმად მოქმედებს, ვინაიდან ყველა იმ ბუნებას მისდევს, რომელიც სამი მოდუსისგან აქვს მიღებული. რას მოიტანს დათრგუნვა?
34. არსებობს გრძნობებსა და მათ ობიექტებთან დაკავშირებული მიჯაჭვულობისა და განდეგილობის მომაწესრიგებელი კანონები. ცოცხალი არსება არ უნდა მოექცეს ასეთი მიჯაჭვულობისა და განდეგილობის გავლენის ქვეშ, ვინაიდან ისინი თვითრეალიზაციის გზაზე დამაბრკოლებელი ლოდებია.
35. უმჯობესია შენზედ დაწესებული მოვალეობები შეასრულო, შეცდომითაც კი, ვიდრე სხვისი მოვალეობები – სრულყოფილად. საკუთარი მოვალეობის შესრულებისას დაღუპვა სჯობს სხვისი მოვალეობების შესრულებას, ვინაიდან სახიფათოა სხვის გზაზე დადგომა.
36. არჯუნამ თქვა: ო ვრშნის შთამომავალო, რა უბიძგებს ცოცხალ არსებას ცოდვის ჩასადენად, მისი სურვილის საწინააღმდეგოდაც კი, თითქოსდა რაღაც ძალა ამოქმედებდეს?
37. ღმრთეების უზენაესმა პიროვნებამ თქვა: ეს მხოლოდ ავხორცობაა, არჯუნა, რომელიც ვნების მატერიალურ მოდუსთან ურთიერთობის შედეგად წარმოიშვება და მოგვიანებით მრისხანებად გადაიქცევა, რომელიც ამ სამყაროში ყოვლის შთანმთქმელი მტერია.
38. როგორც ცეცხლი იფარება კვამლით, სარკე – მტვერით ან ჩანასახი – საშვილოსნოთი, ეს ავხორცობაც სხვადასხვაგვარად ფარავს ცოცხალ არსებას.
39. ამდენად, ბრძენი ცოცხალი არსების წმინდა ცნობიერება იფარება მისი მარადიული მტრის, ავხორცობის მიერ, რომელიც მუდამ დაუკმაყოფილებელია და იწვის ვითარცა ცეცხლი.
40. გრძნობები, ჭკუა და გონება ამ ავხორცობის სამყოფელია. მათი გზით ავხორცობა ფარავს ცოცხალი არსების ჭეშმარიტ ცოდნას და აბრიყვებს მას.
41. ამიტომ, პ არჯუნა, ბჰარატათა შორის საუკეთესოვ, გრძნობათა რეგულაციის საშუალებით თავიდანვე ალაგმე ცოდვის ეს დიდი სიმბოლო (ავხორცობა) და განგმირე ცოდნისა და თვითრეალიზაციის ეს დამანგრევლი.
42. მოქმედი გრძნობები დუნე მატერიაზე მაღალია; ჭკუა გრძნობებზე მაღლა დგას; გონება თვით ჭკუას აღემატება; და იგი (სული) გონებაზეც მაღლა დგას.
43. როცა შეიცნობ რომ შენი მეობა მატერიალური გრძნობების, ჭკუისა და გონების მიღმა დგას, ო მკლავმაგარო არჯუნა, უნდა განიმტკიცო ჭკუა ჩაფიქრებული სულიერი გონებით (კრშნას ცნობიერებით) და სულიერი ძალით დაამარცხო ეს დაუცხრომელი მტერი, რომელსაც ავხორცობა ჰქვია.
ირმა
Atman
bf_nonew.gif
Atman
თავი მეოთხე
ტრანსცენდენტული ცოდნა

1. ღმრთეების პიროვნებამ, უფალმა შრი კრიშნამ თქვა: იოგას ეს უკვდავი მეცნიერება მე მზის ღმერთ ვივასვანს ვასწავლე, ვივასვანმა ასწავლა მანუს, კაცობრიობის მამამთავარს, მანუმ კი, თავის მხრივ, იგი იკშავაკუს გადასცა.
2. ეს უმაღლესი მეცნიერება გადაეცემოდა მოწაფეობრივი თანმიმდევრობის ჯაჭვით და წმინდანი მეფეებიც ასე გებულობდნენ მას. მაგრამ დროთა განმავლობაში თანმიმდევრობა დაირღვა, ამიტომ მეცნიერების ჭეშმარიტი სახე დაკარგული ჩანს.
3. დღეს უზენაესთან ურთიერთობის სწორედ ამ უძველეს მეცნიერებას გიყვები, ვინაიდან შენ ჩემი ერთგული და მეგობარი ხარ და ამიტომ ამ მეცნიერების ტრანსცენდენტალი საიდუმლოების გაგება შეგიძლია.
4. არჯუნამ თქვა: მზის ღმერთი ვივასვანი დაბადებით შენზე უფროსია. რას ნიშნავს, რომ თავად შენ ასწავლე მას ეს მეცნიერება?
5. ღმრთეების პიროვნებამ თქვა: მრავალი, მრავალი დაბადება გავიარეთ შენც და მეც. მე მახსოვს ყოველი მათგანი, შენ კი – არა, ო მტრის შემმუსვრელო.
6. თუმცა მე არშობილი ვარ და ჩემი ტრანსცენდენტული სხეული არასოდეს იხრწნება, თუმცა მე ვარ უფალი ყოველი ცოცხალი არსებისა, მაინც ყოველ ეპოქაში ჩემი ტრანსცენდენტული სახით ვევლინები.
7. როდესაც და სადაც ქვეყნად რელიგიური სამსახური ეცემა, იმ დროს მე ვევლინები, ო ბჰარატას შთამომავალო.
8. წმინდანების გასანთავისუფლებლად და არამზადების მოსასპობად, აგრეთვე რელიგიური პრინციპების აღსადგენად მე თავად ვევლინები ეპოქიდან ეპოქაში.
9. ვინც იცის ქვეყნად ჩემი მოვლენისა და საქმიანობების ტრანსცენდენტული ბუნება, სხეულის მიტოვების შემდეგ მატერიალურ სამყაროში აღარ იბადება, არამედ ჩემს მარადიულ სასუფეველში აღწევს, ო არჯუნა.
10. მიჯაჭვულობის, შიშისა და მრისხანებისაგან განთავისუფლებული, მთლიანად ჩემით მოცული, ჩემი თავშესაფრის მიღებით მრავალი და მრავალი პიროვნება განიწმინდა წარსულში ჩემი შეცნობით და ჩემს ტრანსცენდენტალ სიყვარულს მიაღწია.
11. როგორც ყველა მომენდობა მე, მეც ისე ვასაჩუქრებ მათ. ყველა ყოველმხრივ ჩემს გზას მიჰყვება, ო პართჰას შვილო.
12. ადამიანებს ამქვეყნად კარმიულ საქმიანობებში წარმატების მიღწევა სურთ, ამიტომ ნახევარღმერთებს სცემენ თაყვანს. მართლაც, სულ მალე ადამიანები ღებულობენ ამქვეყნად გაწეული კარმიული შრომის შედეგებს.
13. მატერიალური ბუნების სამი მოდუსისა და მათთან დაკავშირებული შრომის თანახმად ადამიანთა საზოგადოებაში ოთხი განაყოფი შევქმენი. და თუმცა ეს სისტემა მე შევქმენი, იცოდე, რომ მაინ ცარ ვმოქმედებ, ვინაიდან უცვლელი ვარ.
14. არ არსებობს შრომა, რომელიც ჩემზე გავლენას ახდენს; მე არც საქმიანობის ნაყოფებს ვესწრაფვი, ვისაც ჩემს შესახებ ეს ჭეშმარიტება ესმის, არც ის იხლართება შრომის კარმიულ რეაქციებში.
15. გარდასულ დროთა ყოველი განთავისუფლებული სული ჩემი ტრანსცენდენტული ბუნების ასეთი გაგებით მოქმედებდა. ამიტომ მათ კვალდაკვალ შენი მოვალეობა უნდა შეასრულო.
16. გონიერიც კი ცდება, იმის განსაზღვრისას, რა არის მოქმედება და რა არის უმოქმედობა. ახლა მე აგიხსნი, რა არის მოქმედება, რისი ცოდნითაც ყოველგვარი განსაცდელისგან განთავისუფლდები.
17. მოქმედების სირთულეები ძნელად გასაგებია. ამიტომ საჭიროა იმის სწორად ცოდნა, თუ რა არის მოქმედება, რა არის აკრძალული მოქმედება და რა არის უმოქმედობა.
18. ის ვინც ხედავს უმოქმედობას მოქმედებაში და მოქმედებას უმოქმედობაში, გონიერია კაცთა შორის და ტრანსცენდენტალ მდგომარეობაში იმყოფება, თუმცა ყოველთვის დაკავებულია სხვადასხვა საქმიანობით.
19. ის, ვისი ყოველი მცდელობაც გრძნობათა დაკმაყოფილების სურვილს მოკლებულია, სრული ცოდნის მქონედ ითვლება. ბრძენებს უთქვამთ მასზე, რომ იგი მოღვაწეა, რომლის შრომის რეაქციები სრულყოფილი ცოდნის ცეცხლით არის დამწვარი.
20. უარს ამბობს რა თავისი საქმიანობის შედეგებისადმი ყოველგვარ მიჯაჭვულობაზე, მუდამ კმაყოფილი და დამოუკიდებელი, იგი არავითარ კარმიულ მოქმედებას არ ჩადის, თუმცა ათასგვარ საქმიანობას ეწევა.
21. ასეთი ცოდნის მქონე ადამიანი სრულიად დამორჩილებული ჭკუითა და გონებით მოქმედებს, უარს ამბობს ყოველგვარი საკუთრების გრძნობაზე და იღწვის მხოლოდ იმისთვის, რაც სიცოცხლისთვის ყველაზე აუცილებელია. ასეთი შრომისას იგი ცოდვითი რეაქციების გავლენაში არ ექცევა.
22. ვისაც აკმაყოფილებს თავისით მოსული მონაპოვარი, ვინც თავისუფალია ორმაგობისა და შურისგან, ვინც ურყევი რჩება წარმატებისა და დამარცხების დროს, მოქმედების მიუხედავად არასოდეს ექცევა ტყვეობაში.
23. შრომა იმ ადამიანისა, რომელიც მიჯაჭვული არ არის მატერიალური ბუნების მოდუსებს და სრულ ტრანსცენდენტალ ცოდნას ფლობს, მთლიანად იძირება ტრანსცენდენციაში.
24. პიროვნება, რომელიც სრულად არის დანთქმული კრშნას ცნობიერებაში, აუცილებლად მიაღწევს სულიერ სასუფეველს, ვინაიდან ყველაფერს წირავს სულიერ საქმიანობებს, რომელშიც შთანთქმულიცაა და შენაწირიც ერთი და იგივე აბსოლუტური სულიერი ბუნებით ხასიათდება.
25. ზოგი იოგი სხვადასხვა მსხვერპლშეწირვებით სრულყოფილად სცემს თაყვანს ნახევარღმერთებს, ზოგიერთს კი უზენაესი ბრაჰმანის ცეცხლში მიაქვს მსხვერპლი.
26. ზოგიერთებს (წმინდა ბრაჰმაჩარებს) ჭკუის მართვის ცეცხლში მოსმენის პროცესი და გრძნობები მიაქვთ მსხვერპლად, სხვებს კი (ვინც მოწესრიგებულ საოჯახო ცხოვრებას ეწევიან) გრძნობათა ცეცხლში გრძნობათა ობიექტები მიაქვთ მსხვერპლად.
27. სხვები, რომლებიც ჭკუისა და გრძნობების მართვის გზით მიიწევენ თვითრეალიზაციისკენ, გრძნობებისა და სასიცოცხლო სუნთქვის ქმედებებს დამორჩილებული ჭკუის ცეცხლს სწირავენ.
28. მკაცრი აღთქმების დადების შედეგად, ზოგი გასხივოსნებას აღწევს საკუთრების მსხვერპლად გაღებით, ზოგი – მკაცრი ასკეტიზმის გავლით, რვასაფეხურიანი მისტიური იოგას შესრულებით ან ვედების შესწავლით, რომლის მიზანიც ტრანსცენდენტული ცოდნის განვითარებაა.
29. სხვები კი, რომელთაც სუნთქვის შეკავების პროცესით ტრანსში დარჩენის მიდრეკილება აქვთ, ამომავალი სუნთქვის მოძრაობას შემომავალს და შემომავალ სუნთქვას ამომავალს სწირავენ და საბოლოოდ ტრანსში რჩებიან, წყვეტენ რა ყოველგვარ სუნთქვას. სხვები კვების პროცესის შემცირებით ამომავალ სუნთქვას ამომავალ სუნთქვასვე სწირავენ.
30. ყოველი შემსრულებელი, რომელმაც მსხვერპლშეწირვის მნიშვნელობა იცის, ცოდვითი რეაქციებისგან იწმინდება და მსხვერპლშეწირვების სიტკბოს გაგების გამო უმაღლეს მარადიულ ატმოსფეროს უახლოვდება.
31. ო კურუთა შორის საუკეთესოვ, მსხვერპლშეწირვის გარეშე ადამიანი ვერასოდეს იქნება ბედნიერი ამ პლანეტაზე ან ამ სიცოცხლეში: მაშ, რაღა ითქმის შემდეგ სიცოცხლეზე?
32. ვედებში ნებადართულია ყველა ეს სხვადასხვა სახის მსხვერპლშეწირვა და ყოველი მათგანი სხვადასხვა სახის შრომით არის შობილი. მათი ამგვარი ცოდნით განთავისუფლებას მიაღწევ.
33. ო მტრის შემმუსვრელო, ცოდნით შესრულებული მსხვერპლშეწირვა ჯობია მატერიალური ქონების უბრალო შეწირვას. სხვას რომ ყველაფერს თავი დავანებოთ, ო პრთჰას შვილო, შრომის ყოველი მსხვერპლშეწირვა მწვერვალს ტრანსცენდენტალ ცოდნაში აღწევს.
34. უბრალოდ სულიერი მოძღვრისადმი მიმართვით სცადე ჭეშმარიტების გაგება. მორჩილად დაუსვი კითხვები და ემსახურე მას. თვითრეალიზებულ სულებს შეუძლიათ გაგინდონ ცოდნა, რამეთუ მათ იხილეს ჭეშმარიტება.
35. თვითრეალიზებული სულისგან ცოდნის მიღების შედეგად, აღარასოდეს მოექცევი ასეთ ილუზიაში, ვინაიდან ამ ცოდნის წყალობით დაინახავ, რომ ყოველი ცოცხალი არსება უზენაესის ნაწილია მხოლოდ. ანუ, სხვა სიტყვებით რომ ვთქვათ, ისინი ჩემი არიან.
36. ყოველ ცოდვილთა შორის უდიდეს ცოდვილადაც რომ ითვლებოდე, ტრანსცენდენტული ცოდნის გემზე ასვლისას ტანჯვის ოკეანეს გადალახავ.
37. როგორც მოგიზგიზე ცეცხლი ფერფლად აქცევს შეშას, ო არჯუნა, ცოდნის ცეცხლიც ფერფლად აქცევს მატერიალურ საქმიანოვ\ბათა ყოველ რეაქციას.
38. ამ სამყაროში არაფრია ტრანსცენდენტალ ცოდნასავით ამაღლებული და წმინდა. ასეთი ცოდნა მთელი მისტიციზმის მწიფე ნაყოფია. და ვინც ერთგულ სამსახურში სრულყოფას მიაღწია, დროთა განმავლობაში საკუთარ თავში დატკბება ამ ცოდნით.
39. რწმენით სავსე ადამიანი, რომელმაც საკუთარი თავი ტრანსცენდენტალ ცოდნას მიუძღვნა და გრძნობებს იმორჩილებს, ასეთი ცოდნის მოპოვების ღირსია და ამის შემდეგ, მალე უმაღლეს სულიერ მშვიდობას მიაღწევს.
40. მაგრამ უგუნური და ურწმუნო პიროვნებები, რომლებსაც განდობილ წერილებში ეჭვი ეპარებათ, ვერ აღწევენ ღმერთის ცნობიერებას;
41. ის, ვინც ერთგულ სამსახურში მოქმედებს, უარს ამბობს თავისი საქმიანობის ნაყოფებზე, და ვისი ეჭვებიც ტრანსცენდენტული ცოდნითაა განადგურებული, ნამდვილად განმტკიცებულია საკუთარ მეობაში. ამრიგად, შრომის რეაქციები არ ბოჭავს მას, ო სიმდიდრის დამპყრობელო.
42. ამიტომ უგუნურების გამო შენს გულში აღმოცენებული ეჭვები ცოდნის იარაღით უნდა ჩაიჩეხოს. იოგათი შეიარაღებული, ო ბჰარატავ, აღსდექ და იბრძოლე.
Atman
თავი მეხუთე
კარმა იოგა – მოქმედება კრშნას ცნობიერებაში

1. არჯუნამ თქვა: ო კრშნა, ჯერ შრომაზე უარის თქმას მეუბნები, შემდეგ კი კვლავ ერთგულებით შრომას მირჩევ. გთხოვ გამარკვიე, რომელია ამ ორთაგან უფრო სასიკეთო?
2. ღმრთეების პიროვნებამ უპასუხა: შრომისაგან განდგომაცა და ერთგულებით შრომაც კარგია განთავისუფლებისთვის. მაგრამ ამ ორიდან ერთგულ სამსახურში შრომა ჯობია შრომისგან განდგომას.
3. ის, ვისაც არც სძულს საკუთარი საქმიანობების შედეგები და არც შენატრის მათ, მუდამ განდეგილად არის ცნობილი. ასეთი პიროვნება, თავისუფალი ყოველგვარი ორმაგობისგან, ადვილად აღწევს თავს მატერიალურ ტყვეობას და სრულიად განთავისუფლებულია, ო მკლავმაგარო არჯუნა.
4. მხოლოდ უგუნურები ანსხვავებენ ერთმანეთისგან ერთგულ მსახურებას (კარმა იოგას) და მატერიალური სამყაროს ანალიტიკურ შესწავლას (სანქჰია-იოგას). სწავლულნი ამბობენ, რომ ერთ-ერთ ამ გზაზე მდგარი ორივეს შედეგს მიაღწევს.
5. ვისაც ესმის, რომ ანალიტიკური შესწავლით მიღწეული მდგომარეობა ერთგული სამსახურითაც მიიღწევა და ამის გამო ანალიტიკურ შესწავლას და ერთგულ სამსახურს ერთ დონეზე აღიქვამს, ჭეშმარიტი სახით ხედავს საგნებს.
6. ყოველგვარ საქმიანობაზე უბრალოდ უარის თქმა, უფლის ერთგული სამსახურის გარეშე, ვერავის გააბედნიერებს. მაგრამ მოაზროვნე ადამიანი, რომელიც ერთგულად ემსახურება უფალს, უმალ აღწევს უზენაესს.
7. ვინც ერთგულ სამსახურში შრომობს, ვინც წმინდა სულია და საკუთარ ჭკუასა და გრძნობებს მართავს, ძვირფასია ყველასთვის და ყველა ძვირფასია მისთვის. ასეთი კაცი, თუმცა მუდამ შრომობს, არასოდეს ექცევა ტყვეობაში.
8-9. თუმცა ღვთაებრივ ცნობიერებაში მყოფი პიროვნება ხედავს, ისმენს, ეხება, ყნოსავს, ჭამს, მოძრაობს, ძინავს და სუნთქავს, შინაგანად მუდამ ესმის, რომ სინამდვილეში იგი არაფერს აკეთებს. ვინაიდან ლაპარაკის, დაცლის, მიღების ან თვალების გახელისა თუ დახუჭვისას მუდამ გაცნობიერებული აქვს, რომ მხოლოდ მატერიალური გრძნობები ურთიერთმოქმედებენ თავიანთ ობიექტებთან და რომ თვითონ განზე დგას მათგან.
10. მასზე, ვინც მიჯაჭვულობის გარეშე ასრულებს საკუთარ მოვალეობას და შედეგებს უზენაეს უფალს უძღვნის, არ მოქმედებს ცოდვითი საქმიანობა, როგორც ლოტოსის ყვავილი არ სველდება წყალში.
11. იოგები, უარს ამბობენ რა მიჯაჭვულობაზე, სხეულით ჭკუით, გონებითა და გრძნობებითაც მხოლოდ განწმენდის მიზნით მოქმედებენ.
12. განუხრელად ერთგული სული ჭეშმარიტ მშვიდობას აღწევს, ვინაიდან მთავაზობს ყოველგვარი საქმიანობის შედეგებს; მაშინ როდესაც პიროვნება, რომელიც ერთიანობაში არ არის ღვთაებასთან და დახარბებულია თავისი შრომის ნაყოფებს, ტყვეობაში ექცევა.
13. როდესაც ხორცშესხმული ცოცხალი არსება ცონტროლს უწევს საკუთარ ბუნებას და ჭკუით უარს ამბობს ყოველგვარ საქმიანობაზე, ბედნიერად ცხოვრობს ცხრაკარიან ქალაქში (მატერიალურ სხეულში), არც შრომობს და არც შრომის მიზეზი ხდება.
14. ხორცშესხმული სული, საკუთარი სხეულის ქალაქის ბატონი, არ მოქმედებს, არც აიძულებს ხალხს იმოქმედოს, არც მოქმედების ნაყოფებს ქმნის. ყოველივე ამას მატერიალური ბუნების მოდუსები ასრულებს.
15. არც უზენაესი უფალი აგებს პასუხს ვინმეს ცოდვილ ან ღვთაებრივ საქმიანობაზე. მაგრამ ხორცშესხმული არსებები გაბრიყვებულნი არიან უგუნურების გამო, რომელიც მათ ჭეშმარიტ ცოდნას ფარავს.
16. მაგრამ როდესაც ცოცხალი არსება უმეცრების გამანადგურებელი ცოდნით გასხოვოსნდება, მისი ცოდნა ნათელს მოჰფენს ყველაფერს, ისევე როგორც მზე ანათებს ყველაფერს დღისით.
17. როდესაც ცოცხალი არსების გონება, ჭკუა, რწმენა ა თავშესაფარი უზენაესშია დაფუძნებული, სრული ცოდნის საშუალებით იგი ბოლომდე იწმინდება ეჭვებისგან და წინ მიიწევს განთავისუფლების გზაზე.
18. თავმდაბალი ბრძენები ჭეშმარიტი ცოდნის წყალობით ერთნაირი თვალით ხედავენ სწავლულსა და კეთილშობილ ბრაჰმანს, ძროხას, სპილოს, ძაღლსა და ძაღლისმჭამელს (უკასტოს)
19. მათ, ვისი ჭკუაც განმტკიცებულია იგივეობასა და წონასწორობაში, უკვე გაიმარჯვეს დაბადებასა და სიკვდილზე. ისინი ბრაჰმანივით უნაკლონი არიან და უკვე იმყოფებიან ბრაჰმანში.
20. პიროვნება, რომელსაც არც სასიამოვნოს მიღება უხარია და არც არასასიამოვნოს მიღებისას გლოვობს, ვინც თვითგონიერია, გაუბრიყვებელია და ესმის მეცნიერება ღმერთზე, უკვე ტრანსცენდენციაში იმყოფება.
21. ასეთ განთავისუფლებულ პიროვნებას არ იზიდავს მატერიალურ გრძნობათა სიამოვნება, არამედ მუდამ ტრანსშია, რამეთუ განცხრომას შინაგანად პოულობს. ამრიგად, თვითრეალიზებული პიროვნება უსაზღვრო ბედნიერებით ტკბება, ვინაიდან ყურადღება უზენაესზე აქვს მიპყრობილი.
22. გონიერი პიროვნება არ ერევა გაჭირვების მიზეზებში, რომლებიც მატერიალურ გრძნობათა ურთიერთობით არის გამოწვეული. ო კუნტის შვილო, ასეთ სიამოვნებებს აქვს დასაწყისი და დასასრული, ამრიგად, ბრძენი კაცი მათგან სიამოვნებას არ ღებულობს.
23. თუკი ცოცხალი არსება ახლანდელი სხეულის მიტოვებამდე მატერიალურ გრძნობათა წადილების მოთმენას და სურვილისა და მრისხანების ძალის შეკავებას შეძლებს, კარგ მდგომარეობაში იმყოფება და ბედნიერია ამქვეყნად.
24. ის, ვისი ბედნიერებაც შინაგანია, ვინც მოქმედია, შინაგანად ტკბება და ვისი მიზანიც შიგნით არის მიმართული, ჭეშმარიტად სრულყოფილი მისტიკოსია.
25. ვინც ეჭვებისგან წარმოშობილ ორმაგობებზე მაღლა დგანან, ვისი ჭკუაც შინაგანად დაკავებულია, ვინც მუდამ შრომობენ ყოველი ცოცხალი არსების საკეთილდღეოდ და თავისუფალი არიან ყოველგვარი ცოდვებისგან, უზენაესში განთავისუფლებას აღწევენ.
26. ვინც თავისუფალი არიან მრისხანებისა და ყოველგვარი მატერიალური სურვილებისგან, ვინც თვითრეალიზებული, თვითდისციპლინირებული არიან და მუდმივად სრულქმნისათვის იღწვიან, უახლოეს მომავალში განაღდებული აქვთ განთავისუფლება უზენაესში.
27-28. არ უშვებს რა შიგნით გარეგან გრძნობათა ობიექტებს, მიმართავს რა თვალებისა და მხედველობის კონცენტრაციას წარბებს შორის, ნესტოებში აკავებს რა ჩასუნთქულ და ამოსუნთქულ ჰაერს და ამგვარად აკონტროლებს ჭკუას, გრძნობებსა და გონებას, ტრანსცენდენტალისტი, რომელიც განთავისუფლებას ესწრაფვის, თავს აღწევს სურვილს, შიშსა და მრისხანებას. ის, ვინც ყოველთვის ამ მდგომარეობაში იმყოფება, უდაოდ განთავისუფლებულია.
29. ჩემს სრულ ცნობიერებაში მყოფი პიროვნება, რომელიც მიცნობს, როგორც ყოველი მსხვერპლშეწირვისა და ასკეზის საბოლოო განმცხრომელს, ყოველი პლანეტისა და ნახევარღმერთის უზენაეს უფალს და ყოველი ცოცხალი არსების კეთილისმყოფელსა და კეთილისმსურველს, მატერიალურ გაჭირვებათა ტანჯვებისგან მშვიდობას აღწევს.
Atman
თავი მეექვსე
დჰიანა - იოგა

1. ღმრთეების უზენაესმა პიროვნებამ თქვა: ის, ვინც მიჯაჭვული არ არის თავისი შრომის ნაყოფებს და ვინც მოვალეობის გამო შრომობს, განდეგილის ცხოვრებას ეწევა. იგია ჭეშმარიტი მისტიკოსი და არა ის, ვინც არც ცეცხლს ანთებს და არც მოვალეობას ასრულებს.
2. ო პანდუს შვილო, იცოდე, რომ განდეგილობა იგივე იოგა, ანუ უზენაესთან დაკავშირებაა, რადგან ადამიანი ვერასოდეს გახდება იოგი, ვიდრე გრძნობათა დაკმაყოფილების სურვილს არ განაგდებს.
3. იოგას რვასაფეხურიან სისტემაში ახალბედასთვის შრომა საშუალებად ითვლება; ხოლო მისთვის, ვინც უკვე მიაღწია იოგას მაღალ საფეხურს, საშუალებას ყოველგვარი მატერიალური საქმიანობის შეწყვეტა წარმოადგენს.
4. პიროვნება იოგას მაღალ საფეხურს აღწევს, როდესაც ყოველგვარ მატერიალურ სურვილზე უარის თქმის გამო არც გრძნობათა დაკმაყოფილებისთვის იღწვის და არც კარმიულ საქმიანობებს ეწევა.
5. ჭკუა ადამიანს განთავისუფლებაში უნდა დაეხმაროს და არა დაცემაში. ჭკუა განპირობებული სულის მეგობარიც არის და მტერიც.
6. მისთვის, ვინც ჭკუის დამორჩილება შეძლო, ჭკუა საუკეთესო მეგობარია; ხოლო ვინც ეს ვერმოახერხა, ჭკუა მისი სამუდამო მტერი იქნება.
7. ვინც ჭკუა დაიმორჩილა, უკვე მიაღწია ზესულს, ვინაიდან სიმშვიდე ჰპოვა. ასეთი კაცისთვის სულ ერთია ბედნიერება და უბედურება, სიცხე და სიცივე, პატივი და უპატივობა.
8. როდესაც ადამიანი მიღწეული ცოდნისა და რეალიზაციის საფუძველზე სრულ კმაყოფილებას განიცდის, შეიძლება ითქვას, რომ მან თვითრეალიზაციას მიაღწია და იოგად იწოდება. ასეთი პიროვნება ტრანსცენდენტალ დონეზე იმყოფება და საკუთარ თავს მართავს. იგი ერთნაირად აღიქვამს ყველაფერს: კენჭებს, ლოდებსა თუ ოქროს.
9. პიროვნება სულიერად კიდევ უფრო ამაღლებულად ითვლება, თუკი ერთნაირად აღიქვამს პატიოსან კეთილმსურველთ, მოსიყვარულე კეთილისმყოფელთ, განზე მდგომთ, შურიანებს, მეგობრებსა და მტრებს, ღვთისმოსავთა და ცოდვილთ.
10. ტრანსცენდენტალისტმა სხეული, ჭკუა, და სული განუწყვეტლივ უზენაესთან ურთიერთობაში უნდა დაასაქმოს; მან ეულმა უნდა იცხოვროს განმარტოებულ ადგილას, მუდამ გულდასმით მართოს ჭკუა და თავი დააღწიოს სურვილებსა და მესაკუთრეობის გრძნობას.
11-12. იოგას შესასრულებლად ადამიანი უკაცრიელ ადგილას უნდა წავიდეს, მიწაზე ბალახი კუშა დააფინოს და შემდეგ ირმის ტყავი და რბილი ქსოვილი გადააფაროს. ადგილი წმინდა უნდა შეარჩიოს, დასაჯდომი არ უნდა იყოს არც ძალიან მაღალი და არც ძალიან დაბალი. შემდეგ იოგი გაუნძრევლად უნდა დაჯდეს და შეასრულოს იოგა, რათა განიწმინდოს გული ჭკუის, გრძნობებისა და მოქმედებების კონტროლირებით და ჭკუის ერთი წერტილისკენ მიმართვით.
13-14. ადამიანმა ტანი, კისერი და თავი ერთ ხაზზე გამართულად უნდა დაიჭიროს და დაჟინებით მიაცქერდეს ცხვირის წვერს. ასეთ მდგომარეობაში აღუშფოთებელი, დამორჩილებული ჭკუით, უშიშრად, სქესობრივი ცხოვრებისგან მთლიანად განთავისუფლებული, გულში ჩემზე უნდა ფიქრობდეს და სიცოცხლის საბოლოო მიზნადაც მე გამიხადოს.
15. ამგვარად სხეულის, ჭკუისა და მოქმედებათა მუდმივი მართვით მისტიკოსი ტრანსცენდენტალისტი დამორჩილებული ჭკუით, მატერიალური ყოფის შეწყვეტის გზით ღმერთის სამეფოს (ანუ კრშნას სავანეს) აღწევს.
16. ო არჯუნა, იოგი ვერასოდეს გახდება ის, ვინც ბევრს ან ცოტას ჭამს, ვისაც ბევრი ან ცოტა ძინავს.
17. მას, ვინც კვება, ძილი, დასვენება და მუშაობა მოწესრიგებულინ აქვს, იოგას სისტემის განხორციელებით ყოველგვარი მატერიალური ტანჯვების შემსუბუქება შეუძლია.
18. როდესაც იოგი იოგას პრაქტიკის გზით ჭკუის მოქმედებებს იმორჩილებს და ტრანსცენდენტალ დონეს აღწევს – თავისუფლდება რა ყოველგვარი მატერიალური სურვილებისგან – ამბობენ, რომ მტკიცედ არის დაფუძნებული იოგაში.
19. როგორც ლამპარი არ ირხევა უქარო ადგილას, ასევე ტრანსცენდენტალისტი, რომელსაც ჭკუა დაუმორჩილებია, გამუდმებით ტრანსცენდენტალ მეობას ჭვრეტს.
20-23. სრულყოფის იმ საფეხურზე, რომელსაც ტრანსი ანუ შამადჰი ეწოდება, ადამიანის ჭკუა პრაქტიკის მეშვეობით მთლიანად შორდება მატერიალურ აზრობრივ მოქმედებებს. სრულყოფის ეს საფეხური ხასიათდება ცოცხალი არსების უნარით წმინდა ჭკუით იხილოს საკუთარი მეობა და საკუთარ თავში დატკბეს. ამგვარ ნეტარებაში ადამიანი უსაზღვრო ტრანსცენდენტალ ბედნიერებას განიცდის, რაც ტრანსცენდენტული გრძნობების მეშვეობით აღიქმება. ამ საფეხურზე მტკიცედ დამკვიდრების შემდეგ იგი არასიდეს შორდება ჭეშმარიტებას და ამის მიღწევის შემდგომ თვლის, რომ ამაზე მეტი მონაპოვარი არ არსებობს. ასეთ მდგომარეობაში მყოფი ადამიანი არასოდეს მერყეობს, უდიდესი სიძნელის წინაშეც კი. ეს მატერიალური ურთიერთობების გამო აღმოცენებული უბედურებისგან ჭეშმარიტ თავისუფლებას წარმოადგენს.
24. ადამიანი იოგას უნდა ასრულებდეს შეუპოვრობითა და რწმენით, ამასთანავე განუხრელად უნდა მიჰყვებოდეს არჩეულ გზას. მან მთლიანად უნდა დათმოს სპეკულაციური მსჯელობის შედეგად აღძრული უკლებლივ ყოველი მატერიალური სურვილი და ამგვარად ჭკუით მართოს ყოველი გრძნობის ყოველი გამოვლინება.
25. თანდათანობით, ნაბიჯ-ნაბიჯ, რწმენით განმტკიცებული გონებით ადამიანმა ტრანსს უნდა მიაღწიოს, ამ გზით ჭკუა მხოლოდ სულისკენ მიიპყროს და სხვა არაფერზე იფიქროს.
26. საითაც არ უნდა გაიქცეს ჭკუა თავისი მერყევი და არამტკიცე ბუნების გამო, ადამიანმა უსათუოდ უნდა დააბრუნოს და დაუმორჩილოს საკუთარ მეს.
27. იოგი, რომლის ჭკუაც ჩემსკენ არის მოპყრობილი, უეჭველად აღწევს ტრანსცენდენტული ბედნიერების უმაღლეს სრულყოფილებას. იგი ვნების მოდუსის მიღმა იმყოფება, ესმის უზენაესთან თავისი თვისობრივი მსგავსება და ამრიგად, წარსულ საქმიანობათა ყოველი რეაქციისგან თავისუფლდება.
28. ამდენად იოგი, რომელიც საკუთარ თავს ფლობს და გამუდმებით იოგას ასრულებს, მატერიალური უწმინდურობისაგან იწმინდება და უფლის ტრანსცენდენტალ სამსახურში სრულყოფილი ბედნიერების უმაღლეს საფეხურს აღწევს.
29. ჭეშმარიტი იოგი ყოველ არსებაში მე მხედავს და ყოველ არსებასაც ხედავს ჩემში. თვითრეალიზებული სული ყველგან და ყველაფერში მხედავს მე, უზენაეს უფალს.
30. ვინც ყველგან მე მხედავს და ყველაფერს ცჰემსჰი აღიქვამს, არასოდეს მკარგავს და ჩემთვისაც არასოდეს იკარგება.
31. ასეთი იოგი, რომელიც თაყვანისცემით ემსახურება ზესულს, რამეთუ იცის, რომ მე და ზესული ერთნი ვართ, ნებისმიერ ვითარებაში მუდამ ჩემში რჩება.
32. ო არჯუნა, სრულყოფილია იოგი, რომელიც საკუთარი მეობის დანარჩენ ცოცხალ არსებებთან შედარებისას მათ ჭეშმარიტ თანასწორობას ხედავს, ბედნიერებაშიც და უბედურებაშიც.
33. არჯუნამ თქვა: ო მადჰუსუდანა, შენს მიერ აღწერილი იოგას სისტემა განუხორციელებელი და აუტანელი მეჩვენება, რამეთუ ჭკუა მოუსვენარი და არამტკიცეა.
34. ო კრშნა, რაკი ჭკუა მოუსვენარი, მშფოთვარე, მოუდრეკელი და მეტად ძლიერია, ვფიქრობ მისი დამორჩილება ქარის დამორჩილებაზე ძნელი იქნება.
35. უფალმა შრი კრშნამ თქვა: ო კუნტის მკლავმაგარო შვილო, მოუსვენარი ჭკუის მოთოკვა უეჭველად ძნელია, მაგრამ შესაფერისი პრაქტიკითა და განდეგილობით ამის მიღწევა შეიძლება.
36. აულაგმავი ჭკუის მქონე პიროვნებისთვის თვითრეალიზაციის მიღწევა რთული საქმეა, მაგრამ ვისაც ჭკუა დაუმორჩილებია და სათანადო გზით იღწვის, უსათუოდ ეწევა წარმატებას. ასეთია ჩემი აზრი.
37. არჯუნამ თქვა: ო კრშნა, რა ელის ხელმოცარულ ტრანსცენდენტალისტს, რომელიც თავდაპირველად რწმენით იწყებს თვითრეალიზაციის პროცესს, მაგრამ მიწიერი ცნობიერების შედეგად უხვევს არჩეული გზიდან და მისტიციზმში სრულყოფას ვერ აღწევს.
38. ო მკლავმაგარო კრშნა, განა ტრანსცენდენციის გზიდან ამცდარისთვის ბოლო ეღება ყოველგვარ სულიერ და მატერიალურ წარმატებას, დაფლეთილი ღრუბელივით ქრება და ვეღარსად ჰპოვებს თავშესაფარს?
39. ასეთია ჩემი ეჭვი, ო კრშნა და გთხოვ სრულიად გამიფანტო იგი. შენს გარდა არავინ მეგულება, ვისაც ამ ეჭვის განადგურება შეეძლოს.
40. ღმრთეების უზენაესმა პიროვნებამ თქვა: პრთჰას შვილო, ტრანსცენდენტალისტს, რომელიც სასიკეთო საქმიანობებს ეწევა, სიკვდილი არც ამ და არც სულიერ სამყაროში უწერია; კეთილისმყოფელს, ჩემო მეგობარო, ვერასოდეს სძლევს ბოროტი.
41. ღვთისმოსავ ცოცხალ არსებათა პლანეტებზე მრავალი წლის მანძილზე განცხრომის შემდეგ ხელმოცარული იოგი ღვთისმოსავთა ან მდიდარ არისტოკრატთა ოჯახში იბნადება.
42. ანდა (თუ იოგას ხანგრძლივი შესრულების შემდეგ წარმატებას ვერ აღწევს) იმ ტრანსცენდენტალისტთა ოჯახში იბადება, რომლებიც უეჭველად დიდი სიბრძნით გამოირჩევიან. ცხადია, ამ სამყაროში ასეთი დაბადება იშვიათად თუ ვინმეს ხვდება წილად.
43. ო კურუს შვილო, ასეთი დაბადების შემდეგ იგი აღიდგენს წინა ცხოვრების ცნობიერებას და სრული წარმატების მოსაპოვებლად კვლავ წინსვლას ცდილობს.
44. წინა ცხოვრების ღვთაებრივი ცნობიერების წყალობით მას თავისთავად, ძიების გარეშე იოგას პრინციპები იზიდავს. ასეთი ცნობისმოყვარე ტრანსცენდენტალისტი ყოველთვის წმინდა წერილთა რიტუალურ პრინციპებზე მაღლა დგას.
45. და როცა ყოველგვარი ჭუჭყისგან განწმენდილი იოგი გულწრფელად ესწრაფვის შემდგომ წინსვლას, საბოლოოდ მრავალი, მრავალი დაბადების განმავლობის პრაქტიკის შემდეგ სრულყოფის შედეგად უზენაეს მიზანს მიაღწევს.
46. იოგი უფრო მაღალია, ვიდრე ასკეტი, უფრო მაღალია, ვიდრე ემპირიკოსი და უფრო მაღალია, ვიდრე კარმიული მოღვაწე. ამიტომ, ო არჯუნა, ყოველთვის იოგი იყავი.
47. დაყ ველა იოგს შორის, ვინც დიდი რწმენით მუდამ ჩემში იმყოფება, შინაგანად ჩემზე ფიქრობს და ტრანსცენდენტული სიყვარულით მემსახურება, ყველაზე მჭიდროდ არის ჩემთან იოგათი დაკავშირებული და უმაღლესია. ასეთია ჩემი აზრი.
Atman
თავი მეშვიდე
აბსოლუტის ცოდნა

1. ღმრთეების უზენაესმა პიროვნებამ თქვა: ახლა მისმინე, ო პრთჰას შვილო, თუ იოგას პრაქტიკით, ჩემი სრული ცნობიერებით, ჩემზედ მიჯაჭვული ჭკუით, ეჭვებისაგან განთავისუფლებული, როგორ შეძლებ სრულად შემიცნო მე.
2. ახლა მე მთელი სისრულით გადმოგცემ ამ ცოდნას, როგორც ფენომენურს, ასევე ღვთაებრივს. ამის შემდეგ, აღარაფერი დაგრჩება შესაცნობი.
3. მრავალი ათასი კაციდან ერთი შეიძლება ესწრაფოდეს სრულქმნას, და მათგან, ვინც სრულქმნას მიაღწია, ერთიც ძლივა მოინახება, რომელიც მე ჭეშმარიტად მიცნობს.
4. მიწა, წყალი, ცეცხლი, ჰაერი, ეთერი, ჭკუა, გონება და ცრუ ეგო – ეს რვა ჩემს განცალკევებულ მატერიალურ ენერგიებს შეადგენს.
5. ამათ გარდა, ო მკლავმაგარო არჯუნა, არსებობს სხვა, ჩემი უმაღლესი ენერგია, რომელიც მოიცავს ცოცხალ არსებებს, რომლებიც ამ მატერიალური, უმდაბლესი ბუნების საშუალებებს იყენებენ.
6. ყოველი შექმნილი არსება დასაბამს ამ ორი ბუნებიდან იღებს. უეჭველად იცოდე, რომ მე ვარ ამ სამყაროში ყოველივე მატერიალურისა და სულიერის დასაბამიც და დასასრულიც.
7. ო სიმდიდრის მომპოვებელო, არ არსებობს ჩემზე მაღალი ჭეშმარიტება. ყველაფერი ჩემზე ძევს, როგორც ძაფზე აცმული მარგალიტები.
8. ო კუნტის შვილო, მე ვარ წყლის გემო, მზისა და მთვარის შუქი, მარცვალი ომ ვედურ მანტრებში; მე ვარ ბგერა ეთერში და უნარი ადამიანში.
9. მე ვარ მიწის თავდაპირველი სურნელი და მე ვარ სითბო ცეცხლისა. მე ვარ ყოველი ცოცხალის სიცოცხლე და მე ვარ ეპითიმია ყოველი ასკეტისა.
10. ო პრთჰას შვილო, იცოდე რომ მე ვარ ყოველი არსებობის თავდაპირველი თესლი, გონიერთა გონიერება და ძლევამოსილთა სიმამაცე.
11. მე ვარ ძალა ძლიერთა, რომელნიც ვნებასა და სურვილს არიან მოკლებული. მე ვარ სქესობრივი ცხოვრება, რომელიც რელიგიურ პრინციპებს არ ეწინააღმდეგება, ო ბჰარატათა მეუფევ (არჯუნა).
12. იცოდე რომ არსებობის ყოველი მდგომარეობა – სათნოების, ვნებისა თუ უგუნურების – ჩემი ენერგიით ვლინდება. ერთის მხრივ, მე ყველაფერი ვარ, მაგრამ დამოუკიდებელი ვრჩები. მე არ ვექცევი მატერიალური ბუნების მოდუსების გავლენაში, ვინაიდან პირიქით, ისინი იმყოფებიან ჩემში.
13. სამი მოდუსით (სათნოებით, ვნებითა და უგუნურებით) მოტყუებული მთელი სამყარო არ მიცნობს მე, მოდუსებზე მაღლა მყოფსა და უშრეტს.
14. ძალიან ძნელია ამ ჩემი ღვთაებრივი ენერგიეს ძლევა, რომელიც მატერიალური ბუნების სამი მოდუსისგან შედგება. მაგრამზე მონდობილებს ადვილად შეუძლიათ მისი გადალახვა.
15. არამზადები, რომლებიც უკიდურესად სულელნი, კაცთა შორის უმდაბლესნი არიან, ვისი ცოდნაც ილუზიით არის განძარცვული და ვინც დემონთა ათეისტურ ბუნებას იზიარებენ, არ მენდობიან მე.
16. ო საუკეთესოვ ბჰარატთა შორის, ოთხი სახის ღვთისმოსავი ხალხი იწყებს ჩემს მსახურებას – ტანჯულნი, ქონების მოსურნენი, ცნობისმოყვარენი და ისინი, ვინც აბსოლუტის შესახებ ცოდნას ეძებენ.
17. მათ შორის ის ვინც სრულ ცოდნას ფლობს და ვინც მუდამ წმინდა ერთგულ სამსახურს ეწევა, საუკეთესოა. ვინაიდან მე მეტად ძვირფასი ვარ მისთვის და ისიც ძვირფასია ჩემთვის.
18. ყოველი ეს ერთგული უდაოდ დიდსულოვანი სულია, მაგრამ მას, ვინც ჩემს ცოდნას ფლობს, არ ვანსხვავებ ჩემგან. ჩემი ტრანსცენდენტული მსხურების გამო იგი აუცილებლად მომაღწევს მე, უმაღლესსა და ყველაზე სრულყოფილ მიზანს.
19. მრავალი დაბადებისა და სიკვდილის შემდეგ, ვინც ჭეშმარიტ ცოდნას ფლობს, მომენდობა მე, მიცნობს რა მე ყოველი მიზეზისა და ყოველივე არსებულის მიზეზად. ასეთი დიადი სული მეტად იშვიათია.
20. ისინი, ვისი გონებაც განძარცვულია მატერიალური სურვილებით, მიენდობიან ნახევარღმერთებს და მიჰყვებიან თავიანთი ბუნების შესაბამის თაყვანისცემის გარკვეულ წესებსა და რეგულაციებს.
21. მე ყველას გულში ვიმყოფები ზესულის სახით. როგორც კი ვინმე მოისურვებს გარკვეული ნახევარღმერთის თაყვანისცემას, მე ვუმტკიცებ რწმენას, რათა ამ ღვთაებას მიუძღვნას თავი.
22. ასეთი რწმენით დაჯილდოებული, იგი ცდილობს თაყვანი სცეს გარკვეულ ნახევარღმერთს და აისრულოს სურვილები. მაგრამ სინამდვილეში ამ შედეგს ვიძლევი მხოლოდ მე.
23. მცირე გონების მქონე ხალხი თაყვანს სცემს ნახევარღმერთებს და მათი ნაყოფები შეზღუდული და წარმავალია, ისინი, ვინც თაყვანს სცემენ ნახევარღმერთებს, მიდიან ნახევარღმერთთა პლანეტებზე, მაგრამ ჩემი ერთგულები საბოლოოდ აღწევენ ჩემს უმაღლეს პლანეტას.
24. უგონო ხალხი, რომელიც სრულყოფილად არ მიცნობს, თვლის, რომ მე, ღმრთეების უზენაესი პიროვნება , კრშნა, უპიროვნო ვიყავი აქამდე, ახლა კი მივიღე ეს პიროვნული ფორმა. თავიანთი მცირე ცოდნის გამო, მა თარ იციან ჩემი მაღალი ბუნება, რომელიც უკვდავია და უზენაესი.
25. მე არასოდეს ვევლინები სულელებსა და უგუნურებს. მათთვის დაფარული ვარ ჩემი შინაგანი პოტენციით, ამიტომ მა თარ იციან, რომ მე უშობელი და უშეცდომო ვარ.
26. ო არჯუნა, როგორც ღმრთეების უზენაესმა პიროვნებამ, მე ვიცი ყველაფერი რაც მომხდარა წარსულში, ყველაფერი რაც ხდება აწმყოში და ყველაფერი რაც უნდა მოხდეს. მე აგრეთვე ვიცნობ ყოველ ცოცხალ არსებას; მაგრამ მე არავინ არ მიცნობს.
27. ო ბჰარატას შთამომავალო, ო მტრის შAემმუსვრელო, ყოველი ცოცხალი არსება იბადება ილუზიაში, სურვილისა და ზიზღისგან წარმოშობილი ორმაგობით მოტყუებული.
28. ისინი, ვინც ღვთაებრივ საქმეებს ჩადიოდნენ წარსულ ცხოვრებებში და ვისი ცოდვითი რეაქციებიც სრულიად აღმოფხვრილია, თავისუფალი არიან ილუზიის ორმაგობებისგან და მტკიცე გადაწყვეტილებით მემსახურებიან მე.
29. გონიერი პიროვნებები, რომლებიც იღწვიან სიბერისა და სიკვდილისაგან განთავისუფლებისათვის, თავშესაფარს პოულობენ ჩემში, ერთგულ სამსახურში. ისინი ჭეშმარიტად ბრაჰმანი არიან, ვინაიდან ბოლომდე იციან ყველაფერი ტრანსცენდენტული საქმიანობების შესახებ.
30. მათ, ვისაც სრული ცნობიერება აქვთ ჩემზე, ვინც მიცნობენ მე, უზენაეს უფალს, როგორც მატერიალური გამოვლინების, ნახევარღმერთებისა და მსხვერპლშეწირვის ყოველი მეთოდის მმართველ პრინციპად, შეუძლიათ შემიცნონ და მიცნობდნენ მე, ღმრთეების უზენაეს პიროვნებას, სიკვდილის ჟამსაც კი.
Atman
თავი მერვე
უზენაესის მიღწევა

1. არჯუნამ იკითხა: ო ჩემო უფალო, ო უზენაესო პიროვნებავ, რა არის ბრაჰმანი? რა არის მეობა? რა არის კარმიული საქმიანობა? რა არისე ს მატერიალური გამოვლინება? და ვინ არიან ნახევარღმერთები? გთხოვ, განმიმარტე ეს.
2. ვინ არის მსხვერპლშეწირვის უფალი და როგორ ცხოვრობს იგი სხეულში, ო მადჰუსუდანა? და როგორ უნდა გიცნობდნენ სიკვდილის ჟამს ისინი, ვინც ერთგული სამსახურით არიან დაკავებული.
3. ღმრთეების უზენაესმა პიროვნებამ თქვა: ურღვევ ტრანსცენდენტალურ ცოცხალ არსებას ბრაჰმანი ჰქვია დამ ის მარადიულ ბუნებას – ადჰიატმა, მეობა. საქმიანობას, რომელიც ცოცხალ არსებათა მატერიალური სხეულების განვითარებას ეხება, ეწოდება კარმა, ანუ საკუთარი სიამოვნებისათვის გამიზნული საქმიანობები.
4. ო საუკეთესოვ ხორცშესხმულ არსებათა შორის, განუწყვეტლივ ცვალებად ფიზიკურ ბუნებას ადჰიბჰუტა (მატერიალური გამოვლინება) ეწოდება. უფლის სამყაროსეული ფორმა, რომელიც მოიცავს ყოველ ნახევარღმერთს, როგორებიც არიან მზისა და მთვარის ნახევარღმერთები, ადჰიდაივად არის ცნობილი. და მე, უზენაეს უფალს, ყოველი ხორცშესხმული არსების გულში ზესულის სახით წარმოდგენილს, მქვია ადჰიიაჯნა (მსხვერპლშეწირვის უფალი).
5. და ვინც სიცოცხლის ბოლოს სხეულს ტოვებს ისე, რომ მხოლოდ მე ვახსოვარ, უმალ აღწევს ჩემს ბუნებას. ამაში ეჭვი არ არის.
6. ყოფიერების რა მდგომარეობაც ახსოვს ცოცხალ არსებას სხეულის დატოვებისას, ო კუნტის შვილო, აუცილებლად იმავე მდგომარეობას მიაღწევს.
7. ამიტომ არჯუნა, მუდამ უნდა იფიქრო ჩემზე, როგორც კრშნაზე და ამავე დროს შეასრულო შენი მოვალეობა – იბრძოლო. ჩემდამი მოძღვნილი საქმიანობით და ჩემზედ მოპყრობილი ჭკუითა და გონებით უეჭველად მოაღწევ ჩემამდე.
8. ის, ვინც ფიქრობს ჩემზე, როგორც ღმრთეების უზენაეს პიროვნებაზე, ვისი ჭკუაც მუდამ ჩემზე ფიქრით არის მოცული და არ უხვევს გზიდან, ო პრთჰა, აუცილებლად მომაღწევს მე.
9. ცოცხალმა არსებამ უზენაეს უფალზე უნდა იფიქროს, როგორც ყოვლისმცოდნეზე, უხუცესზე, განმგებელზე, მასზე, ვინც უმცირესზე მცირეა, ყოვლის მასულდგმულებელზე, ვისაც ვერავითარი მატერიალური წარმოდგენა ვერ სწვდება, როგორც მიუწვდომელზე და როგორც მასზე, ვინც ყოველთვის პიროვნებაა. იგი მზესავით ნათელია და ტრანსცენდენტულია მატერიალური ბუნების მიმართ.
10. ის, ვინც სიკვდილის ჟამს სასიცოცხლო ჰაერს წარბებს შუა ათავსებს და იოგას საშუალებით, განუხრელი ჭკუით და სრული ერთგულებით უზენაესი უფლის მოგონებას იწყებს, აუცილებლად აღწევს ღმრთეების უზენაეს პიროვნებას.
11. ვედებში განსწავლული ადამიანები, რომლებიც ომკარას გამოთქვამენ და განდეგილის წესში დიადი ბრძენები არიან, ბრაჰმანში შედიან. ვისაც ასეთი სრულქმნის მიღწევა სურს, უბიწოებას იცავს. ახლა, მე მოკლედ აგიხსნი გზას, რომლითაც შეიძლება ხსნის მიღწევა.
12. იოგური მდგომარეობა ყოველგვარი გრძნობითი საქმიანობისაგან განდგომას ნიშნავს. გრძნობათა ყოველი კარის დაკეტვით, ჭკუის გულზე მიპყრობითა და სასიცოცხლო ჰაერის თავის წვერზე მოთავსებით ადამიანი იოგაში მკვიდრდება.
13. თუ იოგას ამ პრაქტიკაში ბგერათა უმაღლესი ერთობლიობის წმინდა მარცვლის – ომ-ის ვიბრირებისას ადამიანი ღმრთეების უზენაეს პიროვნებაზე ფიქრით ტოვებს სხეულს, აუცილებლად აღწევს სულიერ პლანეტებს.
14. ვისაც განუწყვეტლივ ვახსოვარ მე, ადვილად მოაღწევს ჩემამდე, ო პრთჰას შვილო, ვინაიდან გამუდმებით ჩემი ერთგული სამსახურით არის დაკავებული.
15. ჩემთან მოსვლის შემდეგ დიადი სულები, რომნლებიც ღვთის ერთგული იოგები არიან, არასოდეს უბრუნდებიან გაჭირვებით აღსავსე ამ წარმავალ სამყაროს, ვინაიდან უმაღლეს სრულქმნას მიაღწიეს.
16. მატერიალურ სამყაროში ყოველი პლანეტა, დაწყებული უმაღლესიდან, დამთავრებული უმდაბლესით, ტანჯვით აღსავსე ადგილია, სადაც განმეორებადი დაბადება და სიკვდილი ბატონობს, მაგრამ ის, ვინც ჩემს სასუფეველს აღწევს, ო კუნტის შვილო, ხელახლა აღარასოდეს იბადება.
17. კაცთა ანგარიშით ერთად აღებული ათასი ეპოქა ბრაჰმას ერთი დღის ტოლია. და ასეთივე ხანგრძლივობისაა მისი ღამეც.
18. ბრაჰმას დღის დასაბამს ყოველი ცოცხალი არსება ვლინდება გამოუვლენელი მდგომარეობიდან და შემდეგ, ღამის დამდეგს, კვლავ გამოუვლენელში შედის.
19. კვლავ და კვლავ, როდესაც დგება ბრაჰმას დღე, ცოცხალი არსებები იწყებენ არსებობას და ბრაჰმას ღამის დადგომასთან ერთად უმწეოდ ნადგურდებიან.
20. და მაინც, არსებობს სხვა გამოუვლენელი ბუნება, რომელიც მარადიული და ტრანსცენდენტულია ამ გამოვლენილი და გამოუვლენელი მატერიის მიმართ. იგი უმაღლესია და არასოდეს ნადგურდება. როდესაც ამ სამყაროში ყველაფერი ისპობა, ეს ნაწილი ხელუხლებელი რჩება.
21. ის, რასაც ვედანტისტები აღწერენ, როგორც გამოუვლენელსა და უნაკლოს, რაც უმაღლეს მიზნად არის ცნობილი, ადგილი, რომლის მიღწევის შემდეგ არასოდეს ბრუნდებიან – ჩემი უმაღლესი სავანე გახლავთ.
22. მხოლოდ წმინდა ერთგულებით შეიძლება ღმრთეების უზენაესი პიროვნების, უდიადესის მიღწევა, თუმცა იგი თავის სავანეში იმყოფება, ყველაფერს გამსჭვალავს და ყველაფერი მასშია.
23. ო ბჰარატათა შორის საუკეთესოვ, ახლა დაგიხასიათებ სხვადასხვა დროებს, როდესაც ამ ქვეყნიდან წასული იოგები უკან ბრუნდებიან ან არ ბრუნდებიან.
24. უზენაესი ბრაჰმანის მცოდნენი აღწევენ ამ უზენაესს, თუკი ამ ქვეყანას ცეცხლის ღმერთის გავლენისას, სინათლეში, დღის საუკეთესო ხანს, სავეს მთვარის ორი კვირის განმავლობაში ტოვებენ, ან იმ ექვსი თვის მანძილზე, როდესაც მზე ჩრდილოეთში მოძრაობს.
25. მისტიკოსი, რომელიც მიდის ამ სამყაროდან კვამლისას, ღამით, მილეული მთვარის ნახევარი თვის, ან იმ ექვსი თვის განმავლობაში, როდესაც მზე სამხრეთში გადის, აღწევს პლანეტა მთვარეს, მაგრამ კვლავ უკან ბრუნდება.
26. ვედური შეხედულების თანახმად, არსებობს ამ ქვეყნიდან წასვლის ორი გზა – ერთი სინათლეში, მეორე კი – სიბნელეში. სინათლეში წასული ცოცხალი არსება აღარ მოდის, მაგრამ სიბნელეში წასული უკანვე ბრუნდება.
27. თუმცა ერთგულებმა იციან ეს ორი გზა, ო არჯუნა, ისინი არასოდეს ცდებიან. ამიტომ ერთგულებაში მუდამ მტკიცე იყავ.
28. ის, ვინც ერთგული სამსახურის გზაზე დგება, მოკლებული არ არის ვედების შესწავლის, რთული მსხვერპლშეწირვების შესრულების, ქველმოქმედების ან ფილოსოფიური და კარმიული საქმიანობების შესრულებით მიღებულ შედეგებს. უბრალოდ ერთგული სამსახურით იღებს ამ ყველაფერს და ბოლოს უმაღლეს მარადიულ სასუფეველს აღწევს.
Atman
თავი მეცხრე
ყველაზე საკრალური ცოდნა

1. ღმრთეების უზენაესმა პიროვნებამ თქვა: ჩემო ძვირფასო არჯუნა, ვინაიდან შენ არასოდეს გსურს ჩემი, მე გაგინდობ ამ ყველაზე საკრალურ ცოდნასა და რეალიზაციას, რომლის ცოდნითაც განთავისუფლდები მატერიალური არსებობის ტანჯვებისგან.
2. ეს ცოდნა განათლების მეფეა, საიდუმლოთა საიდუმლო. წმინდა ცოდნაა და ვინაიდან მისი საშუალებით სული უშუალოდ აღიქმება რეალიზაციის გზით, რელიგიის სრულქმნას წარმოადგენს. იგი სამარადისოა დამ ის შესრულებას ბედნიერება მოაქვს.
3. ვისაც ერთგული სამსახურის არა სწამთ, ვერ აღწევენ ჩემამდე, ო მტრის შემმუსვრელო. ამიტომ უბრუნდებიან დაბადებისა და სიკვდილის გზას მატერიალურ სამყაროში.
4. მე, ჩემი გამოუვლენელი სახით, განვმსჭვალავ მთელ ამ სამყაროს. ყოველი არსება ჩემშია, მაგრამ მე მათში არა ვარ.
5. და მაინც, ყოველი შექმნილი არ განისვენებს ჩემში. შეხედე ჩემს მისტიკურ სიდიადეს! თუმცა მე ყოველ ცოცხალ არსებას ვასულდგმულებ და ყველგან ვარ, არ მივეკუთვნები ამ კოსმოსურ გამოვლინებას, ვინაიდან მე თვითონ ვარ სამყაროს დასაბამი.
6. გესმოდეს, რომ როგორც ყველგან მქროლავი ძლიერი ქარი მუდამ ცაში რჩება, ყოველი შექმნილი არსებაც ჩემში განისვენებს.
7. ო კუნტის შვილო, ეპოქის დასასრულს მთელი მატერიალური გამოვლინება ჩემს ბუნებაში შედის და ახალი ეპოქის დასაბამს, კვლავ ვქმნი მათ, ჩემი პოტენციეს საშუალებით.
8. მთელი კოსმოსური სისტემა მე მემორჩილება. ჩემი ნებით კვლავ და კვლავ თავისთავად ვლინდება და ჩემივე ნებით ისპობა ბოლოს.
9. ო დჰანანჯაია, მთელი ეს შრომა ვერ მბოჭავს მე. მე მუდამ ჩამოცილებული ვარ მატერიალური საქმიანობებისაგან, თითქოს განზე მდგომი ვიყო.
10. ეს მატერიალური ბუნება, რომელიც ჩემს ერთ-ერთ ენერგიეს წარმოადგენს, ჩემი ზედამხედველობით მოქმედებს, ო კუნტის შვილო და ყოველ მოძრავ და უძრავ არსებას წარმოქმნის. მისი განმგებლობით ეს გამოვლენა კვლავ და კვლავ ვლინდება და ნადგურდება.
11. სულელები დამცინიან მე, როდესაც ადამიანის სახით ვეშვები. მათ არ იციან ჩემი, როგორც ყოველივე არსებულის უზენაესი უფლის ტრანსცენდენტული ბუნება.
12. ამგვარად მოტყუებულთ დემონური და ათეისტური შეხედულებები იზიდავთ. ასეთ შეცბუნებულ მდგომარეობაში მათი განთავისუფლების იმედები, კარმიული საქმიანობა და ცოდნის განვითარება მარცხით მთავრდება.
13. ო პრთჰას შვილო, ღვთაებრივი მფარველობის ქვეშ იმყოფებიან ის დიადი სულები, რომლებიც არ ტყუვდებიან. ისინი ბოლომდე დაკავებულნი არიან ერთგული სამსახურით, ვინაიდან მიცნობენ მე, როგორც ღმრთეების უზენაეს პიროვნებას, თავდაპირველსა და უშრეტს.
14. ეს დიადი სულები, რომლებიც მუდამ ჩემს დიდებას გალობენ და დიდი შეუპოვრობით იღწვიან, ქედს იხრიან ჩემს წინაშე და განუწყვეტლივ ერთგულებით თაყვანს მცემენ.
15. სხვები, რომლებიც მსხვერპლშეწირვას ცოდნის განვითარების გზით ასრულებენ, თაყვანს სცემენ უფალს, როგორც განუმეორებელს, მრავალფეროვანს მრავალთა შორის და კოსმოსურ ფორმაში.
16. მაგრამ სწორედ მე ვარ რიტუალი, მსხვერპლშეწირვა, შესაწირი წინაპართათვის, სამკურნალო ბალახი, ტრანსცენდენტული საგალობელი. მე ვარ კარაქი, ცეცხლი და შესაწირი.
17. მე ვარ სამყაროს მამა, დედა, ბურჯი და წინაპარი. მე ვარ ცოდნის საგანი, განმსპეტაკებელი და მარცვალი ომ. მე ვარ აგრეთვე რიგ, სამა და იაჯურ ვედები.
18. მე ვარ მიზანი, მასულდგმულებელი, მბრძანებელი, მოწმე, სავანე, განსასვენებელი და უძვირფასესი მეგობარი. მე ვარ შექმნა და განადგურება, საფუძველი ყოვლისა, განსასვენებელი ადგილი და მარადიული თესლი.
19. ო არჯუნა, მე ვიძლევი სითბოს და მე ვაკავებ და ვაგზავნი წვიმას. მე ვარ უკვდავება და მე ვარ განსახიერებული სიკვდილი. სულიცა და მატერიაც ჩემშია.
20. ისინი, ვინც სწავლობენ ვედებს და სვამენ წვეთ სომას, ელტვიან რა ზეციურ პლანეტებს, არაპირდაპირი გზით მე მეთაყვანებიან. ცოდვითი რეაქციებისგან განწმენდილნი, ინდრას ღვთაებრივ ზეციურ პლანეტაზე იბადებიან, სადაც ტკბებიან ღმერთთა განცხრომით.
21. როდესაც ისინი ასე დატკბებიან გრძნობათა უზარმაზარი ზეციური სიამოვნებით და მათი ღვთაებრივი საქმიანობების შედეგები ამოიწურება, კვლავ ამ მოკვდავ პლანეტას უბრუნდებიან. ამდენად, ისინი, ვინც გრძნობათა სიამოვნებას ელტვიან, იცავენ რა სამი ვედის პრინციპებს, მხოლოდ განმეორებად დაბადებასა და სიკვდილს აღწევენ.
22. მაგრამ მათ, ვინც მუდამ გამორჩეული ერთგულებით მეთაყვანებიან, ჩემს ტრანსცენდენტალ ფორმაზე ფიქრობენ – მე ვაძლევ იმას, რაც აკლიათ და ვუნარჩუნებ, რაც აქვთ.
23. ისინი, ვინც სხვა ღმერთების ერთგულები არიან და მათ ეთაყვანებიან, სინამდვილეში მხოლოდ მე მცემენ თაყვანს, ო კუნტის შვილო, მაგრამ ამას არასწორად ასრულებენ.
24. მე ვარ ყოველი მსხვერპლშეწირვის ერთადერთი განმცხრომელი და მბრძანებელი. ამიტომ ისინი, ვინც ჩემს ჭეშმარიტ ტრანსცენდენტალ ბუნებას არ აღიარებენ, ეცემიან.
25. ნახევარღმერთების თაყვანისმცემლები იბადებიან ნახევარღმერთთა შორის; წინაპართა თაყვანისმცემლები წინაპრებთან წავლენ; მოჩვენებებისა და სულების თაყვანისმცემელნი ასეთ არსებებთან იბადებიან; და ისინი, ვინც მე მცემენ თაყვანს, ჩემთან იცხოვრებენ.
26. თუკი ადამიანი სიყვარულითა და ერთგულებით შემომთავაზებს ფოთოლს, ყვავილს, ნაყოფსა თუ წყალს, მე მივიღებ.
27. რასაც აკეთებ, რასაც ჭამ, რასაც თავაზობ ან გასცემ და რა ასკეზებსაც ასრულებ – გაიღე ჩემს ძღვნად, ო კუნტის შვილო.
28. ამრიგად თავს დაიხსნი შრომის ტკივილებისგან და მისი სასიკეთო და არასასიკეთო შედეგებისგან. თუკი ასეთი განდეგილობით მომაპყრობ ჭკუას, განთავისუფლდები და ჩემთან მოხვალ.
29. მე არავინ მძულს და არც არავიზე ვარ მიკერძოებული. ერთნაირად ვექცევი ყველას, მაგრამ ის, ვინც ერთგულებით მემსახურება, ჩემი მეგობარია, ჩემშია და მეც მისი მეგობარი ვარ.
30. თუკი ცოცხალი არსება ერთგული სამსახურითაა დაკავებული, ყველაზე საძაგელი საქმეც რომ ჩაიდინოს, წმინდანად უნდა ჩაითვალოს, ვინაიდან სწორი მიზანი აქვს დასახული.
31. იგი მალე ხდება ღვთისმოსავი და აღწევს მარადიულ სიმშვიდეს. ო კუნტის შვილო, თამამად განაცხადე, რომ ჩემი ერთგული არასოდეს იღუპება.
32.ო პრთჰას შვილო, მდაბიო წარმოშობის ხალხს – ქალებს, ვაიშიებს (ვაჭრებს) და შუდრებსაც კი (მუშებსაც) – რომლებიც ჩემს თავშესაფარს პოულობენ, შეუძლიათ დანიშნულების უმაღლეს ადგილას მიღწევა.
33. მაშ, რამდენად მართებულია ეს ღვთისმოსავი ბრაჰმანებისათვის, ერთგულებისა და წმინდა მეფეებისათვის. ამიტომ მოსულხარ რა ამ წარმავალ, გაჭირვებით აღსავსე სამყაროში, სიყვარულით მემსახურე მე.
34. ყოველთვის ჩემზე იფიქრე, გახდი ჩემი ერთგული, ემთხვიე მიწას ჩემს წინაშე და თაყვანი მეცი. თუკი სრულიად დაინთქმები ჩემში, აუცილებლად მოაღწევ ჩემამდე.
Atman
თავი მეათე
აბსოლუტის სიდიადე

1. ღმრთეების უზენაესმა პიროვნებამ თქვა: კვლავ მისმინე, ო მკლავმაგარო არჯუნა. ვინაიდან ჩემი ძვირფასი მეგობარი ხარ, შენდა სასიკეთოდ უფრო მეტს მოგიყვები და მოგცემ ცოდნას, რომელიც უკეთესია იმაზე, რაც აქამდე განმიმარტავს.
2. არც ნახევარღმერთთა დასმა და არც დიადმა ბრძენებმა არ იციან ჩემი წარმოშობა ან სიდიადეები, ვინაიდან მე ვარ ნახევარღმერთთა და ბრძენთა დასაბამი ყოველმხრივ.
3. ის, ვინც მიცნობს მე, როგორც არშობილს, როგორც დაუსაბამოს, როგორც ყოველი სამყაროს უზენაეს უფალს – მხოლოდ ის, კაცთა შორის შეუმცდარი, განწმენდილია ყოველი ცოდვისგან.
4-5. გონიერება, ცოდნა, ეჭვებისა და შეცდომებისგან თავისუფლება, მიმტევებლობა, სიმართლე, გრძნობათა მართვა, ჭკუის მართვა, ბედნიერება და უბედურება, დაბადება, შიში, უშიშრობა, არაძალმომრეობა, წონასწორობა, კმაყოფილება, ასკეტიზმი, ქველმოქმედება, სახელი და უსახელობა – ცოცხალ არსებათა ეს თვისებები მხოლოდ ჩემს მიერ არის შექმნილი.
6. შვიდი დიდი ბრძენი და, მათ მოვლენამდე ოთხი დანარჩენი დიდი ბრძენი და მანუები (კაცობრიობის მამამთავრები) მომდინარეობენ ჩემგან, შობილი არიან ჩემი ჭკუიდან და ყოველი ცოცხალი არსება, რომელიც სხვადასხვა პლანეტაზე სახლობს, მათგან მოდის.
7. ვინც მართლაც დარწმუნებულია ამ ჩემს სიდიადესა და მისტიურ ძალაში, წმინდა ერთგული სამსახურით მემსახურება მე; და ამაში ეჭვი არ არსებობს.
8. მე ვარ ყოველი სულიერი და მატერიალური სამყაროს დასაბამი. ყველაფერი ჩემგან მომდინარეობს. ბრძენები, რომელთაც სრულყოფილად იციან ეს, ერთგულად მემსახურებიან მე და მთელი გუილტა და სულით თაყვანს მცემენ.
9. ჩემი წმინდა ერთგულების ფიქრები მომართულია ჩემსკენ, მათი ცხოვრება ბოლომდე ჩემს მსახურებას ეძღვნება და ერთმანეთის გასხივოსნებითა და ჩემზე საუბრით ისინი დიდ კმაყოფილებასა და ნეტარებას განიცდიან.
10. მათ, ვინც მუდამ სიყვარულით მემსახურებიან, შეცნობის უნარს ვაძლევ, რომლითაც ჩემამდე მოაღწევენ.
11. განსაკუთრებული მადლყ რომ მოვფინო მათ, მე, რომელიც მათ გულებში ვიმყოფები, ცოდნის კაშკაშა ჩირაღდნით ვსპობ უგუნურებით შობილ წყვდიადს.
12-13. არჯუნამ თქვა: შენ ხარ ღმრთეების უზენაესი პიროვნება, საბოლოო სავანე, უწმინდესი, აბსოლუტური ჭეშმარიტება. შენ ხარ მარადიული, ტრანსცენდენტული, თავდაპირველი პიროვნება, არშობილი, უდიადესი, ყოველი დიადი ბრძენი, როგორებიც არიან ნარადა, ასიტა, დევალა და ვიასა ადასტურებენ ამ ჭეშმარიტებას შენს შესახებ და ახლა შენ თავად მიცხადებ ამას.
14. ო კრშნა, მე სრულ ჭეშმარიტებად ვაღიარებ ყოველ შენს ნათქვამს. ვერც ნახევარღმერთებს და ვერც დემონებს, ო უფალო, არ შეუძლიათ შენი პიროვნების შეცნობა.
15. სინამდვილეში შენ თავს მხოლოდ შენ იცნობ შენივე შინაგანი უნარის საშუალებით, ო უზენაესო პიროვნებავ, ყოვლის დასაბამო, ყოველი არსების უფალო, ღმერთთა ღმერთო, სამყაროს მეუფეო.
16. გთხოვ დაწვრილებით მომიყევი იმ შენი ღვთაებრივი სიდიადეების შესახებ, რომლითაც ყოველ სამყაროს განმსჭვალავ.
17. ო კრშნა, უდიადესო მისტიკოსო, როგორ ვიფიქრო გამუდმებით შენზე და როგორ შეგიცნო შენ? რომელი სხვადასხვა სახით მახსოვდე, ო ღმრთეების უზენაესო პიროვნებავ?
18. ო ჯანარდანა, გთხოვ კვლავ დაწვრილებით დამიხასიათე შენი სიდიადეების იდუმალი ძალა, მე ვერასოდეს დავკმაყოფუილდები შენს შესახებ მოსმენით, ვინაიდან რაც მეტს ვისმენ, მით უფრო მეტად მსურს ვიგემო შენი სიტყვების ნექტარი.
19. ღმრთეების უზენაესმა პიროვნებამ თქვა: დიახ, მე მოგიყვები ჩემი დიდებული გამოვლინებების შესახებ, მაგრამ მხოლოდ ყველაზე მთავარს, ო არჯუნა, რამეთუ ჩემი სიდიადე უსაზღვროა.
20. ო არჯუნა, მე ვარ ყოველი ცოცხალი არსების გულში მყოფი ზესული. მე ვარ თავი, შუაგული და ბოლო ყოველი არსებისა.
21. ადიტიათა შორის მე ვარ ვიშნუ, მნათობთა შორის – მოკაშკაშე მზე, მარუტთა შორის – მარიჩი, ვარსკვლავთა შორის კი მთვარე ვარ.
22. ვედათა შორის სამა ვედა ვარ; ნახევარღმერთთა შორის ვარ ინდრა, ზეცის მეუფე; გრძნობათა შორის მე ვარ ჭკუა; ცოცხალ არსებათა შორის კი – სასიცოცხლო ძალა (ცნობიერება).
23. მთელ რუდრათა შორის მე ვარ უფალი შივა, იაკშასებსა და რაკშასებს შორის მე ვარ სიმდიდრის უფალი (კუვერა), ვასუებს შორის მე ვარ ცეცხლი (აგნი) და მთათა შორის მე ვარ მერუ.
24. იცოდე, ო არჯუნა, რომ მღვდელთმსახურთა შორის მე ვარ მთავარი, ბრჰასპატი ვარ. მხედართმთავართაგან მე ვარ კარტიკეა, წყალთა შორის კი მე ვარ ოკეანე.
25. დიად ბრძენთა შორის მე ვარ ბჰრგუ; ვიბრაციათა შორის - ტრანსცენდენტული ომ. მსხვერპლშეწირვათა შორის ვარ წმინდა სახელთა გალობა (ჯაპა), უძრავ საგანთა შორის კი – ჰიმალაები.
26. ყოველ ხეს შორის მე ბანიანის ხე ვარ, ნახევარღმერთთა შორის ბრძენთაგან კი მე ვარ ნარადა. განდჰარვთა შორის მე ვარ ჩიტრარათჰა, სრულქმნილ არსებათა შორის კი – ბრძენი კაპილა.
27. იცოდე, რომ ცხენთა შორის მე ვარ უჩჩაიჰშრავა, ნექტარის ოკეანის დღვებისას წარმოშობილი. სამეფო სპილოთა შორის მე ვარ აირავიტა, ადამიანთა შორის კი – მონარქი.
28. იარაღთა შორის მე ვარ მეხი; ძროხათა შორის – სურაბჰი. გამრავლების მიზეზთა შორის კანდარპა, სიყვარულის ღმერთი ვარ, გველთა შორის კი – ვასუკი.
29. მრავალთავიან ნაგათა შორის მე ვარ ანანტა, წყლის არსებათა შორის – ნახევარღმერთი ვარუნა. გარდაცვლილ წინაპართა შორის მე ვარ არიამა, კანონის აღმსრულებელთა შორის კი – იამა, სიკვდილის მეუფე.
30. დემონ დაიტიათა შორის მე ვარ ერთგული პრაჰლადა, შემმუსვრელთა შორის მე ვარ დრო, ცხოველთა შორის – ლომი, ფრინველთა შორის კი – გარუდა.
31. განმსპეტაკებელთა შორის მე ვარ ქარი, იარაღის მფლობელთა შორის – რამა, თევზთა შორის ზვიგენი ვარ, მდინარეთა შორის კი – განგა.
32. მთელ ქმნილებეთა შორის მე ვარ თავი, ბოლო, შუაგული, ო არჯუნა. მეცნიერებათა შორის მე ვარ სულიერი მეცნიერება მეობის შესახებ, ყოველ ლოგიკოსთა შორის კი – დასკვნითი ჭეშმარიტება.
33. ასოთა შორის მე ვარ “ა”, შედგენილ სიტყვათა შორის კი – ორმაგი შედგენილი სიტყვა. მე ვარ უშრეტი დროც, შემოქმედთა შორის კი ბრაჰმა.
34. მე ვარ ყოვლის გამანადგურებელი სიკვდილი და წარმომქმნელი საწყისი ყოვლისა, რასაც დაბადება უწერია. ქალთა შორის მე ვარ დიდება, იღბალი, ლამაზი მეტყველება, მეხსიერება, გონიერება, სიმტკიცე და მოთმინება.
35. სამა Vედას ჰიმნების შორის მე ვარ ბრჰატ-სამა, პოეზიიდან – გაიატრი. თვეებიდან მარგაშირშა (ნოემბერი-დეკემბერი) ვარ, წელიწადის დროთა შორის კი – აყვავებული გაზაფხული.
36. ტყუილთა შორის მე აზარტული თამაში ვარ და დიდებულთა შორის – დიდებულება. მე ვარ გამარჯვება, რისკი და ძალა ძლიერის.
37. ვრშნის შთამომავალთა შორის მე ვარ ვასუდევა, პანდავთა შორის – არჯუნა. ბრძენთა შორის ვიასა ვარ, დიად მოაზროვნეთა შორის კი უშანა.
38. უკანონობის ყოველგვარ დათრგუნვათა შორის მე ვარ სასჯელი, გამარჯვების მაძიებელთა შორის – ზნეობა. საიდუმლოებათა შორის სიჩუმე ვარ, ბრძენთა შორის კი – სიბრძნე.
39. უფრო მეტიც, ო არჯუნა, მე ვარ ყოველი არსებობის გამრავლების თესლი. არ არის არსება – მოძრავი თუ უძრავი – ჩემს გარეშე რომ სულდგმულობდეს.
40. ო მტრის ძლევამოსილო შემმუსვრელო, ბოლო არა აქვს ჩემს ღვთაებრივ გამოვლინებებს. რაც მე მოგიყევი, უბრალო მინიშნებაა ჩემს უსასრულო სიდიადეებზე.
41. იცოდე, რომ ყოველი დიადი, მშვენიერი და დიდებული ქმნილება ჩემი დიდებულების მხოლოდ ნაპერწკალიდან აღმოცენდება.
42. მაგრამ რა საჭიროა, არჯუნა, მთელი ეს დაწვრილებითი ცოდნა? ჩემი ერთი ნაწილაკით განვმსჭვალავ და ვასულდგმულებ მთელ სამყაროს.
Atman
თავი მეთერთმეტე
სამყაროსეული ფორმა

1. არჯუნამ თქვა: ყველაზე საკრალური სულიერი საკითხების შესახებ შენს მიერ მოწყალედ მოცემულ რჩევა-დარიგებათა მოსმენის შემდეგ ჩემი ილუზია უკვე გაიფანტა.
2. ო ლოტოსის თვალებავ, მე დაწვრილებით მოვისმინე შენგან ყოველი ცოცხალი არსების მოვლენისა და გაუჩინარების შესახებ და შევიცანი შენი უშრეტი დიდება.
3. ო პიროვნებათა შორის საუკეთესოვ, ო უზენაესო ფორმავ, თუმცა ახლა შენი ჭეშმარიტი სახით გხედავ, როგორც შენ თვითონ დაიხასიათე თავი, მსურს ვიხილო, როგორ შედიხარ ამ სამყაროსეულ გამოვლინებაში. მსურს ვიხილო ეს შენი ფორმა.
4. თუკი თვლი, რომ უნარი შემწევს ვიხილო შენი სამყაროსეული ფორმა, ო ჩემო უფალო. ო მთელი მისტიური ძალების მბრძანებელო. გთხოვ მიჩვენე ეს უსასრულო სამყაროსეული სახე.
5. ღმრთეების უზენაესმა პიროვნებამ თქვა: ჩემო ძვირფასო არჯუნა, ო პრთჰას შვილო, იხილე ჩემი დიდებულება, ასეულ ათასობით მრავალგვარი, ღვთაებრივი და ათასფერადი ფორმა.
6. ო ბჰარატათა შორის საუკეთესოვ, იხილე აქ ადიტიები, ვასუები, რუდრები, აშვინიკუმარები და დანარჩენი ნახევარღმერთები. შეხედე მრავალ საოცრებას, რომელიც აქამდე არავის უნახავს ან გაუგონია.
7. ო არჯუნა, რისი ხილვაც გსურს, ერთბაშად დაინახავ, ამ ჩემს სხეულში. ეს სამყაროსეული ფორმა გიჩვენებს, რისი დანახვაც გინდა და რისი ნახვაც მომავალში შეიძლება მოისურვო. ყველაფერი, მოძრავიცა და უძრავიც, აქ ერთად არის.
8. მაგრამ ახლანდელი თვალებით მე ვერ დამინახავ. ამიტომ მე ღვთაებრივ თვალებს მოგცემ. აი ჩემი მისტიური ძალა!
9. სანჯაიამ თქვა: ო მეფეო, ამის თქმის შემდეგ მთელ მისტიურ ძალთა უზენაესმა უფალმა, ღმრთეების პიროვნებამ არჯუნას თავისი სამყაროსეული ფორმა უჩვენა.
10-11. ამ სამყაროსეულ ფორმაში არჯუნამ იხილა უსასრულო პირები, უსასრულო თვალები, უსასრულო საოცარი სანახაობები. ფორმა მრავალი ზეციური სამკაულით იყო მორთული და მრავალი შემართული იარაღი ეჭირა. იგი ზეციურ ყვავილთა ასხმებსა და სამოსელს ატარებდა, მის სხეულს მრავალი ღვთაებრივი სუნამო ეცხო. ყველაფერი განსაცვიფრებელი, ბრწყინვალე და ყოვლისგამოჭოლი გახლდათ.
12. ერთბაშად ასეულ ათასობით მზე რომ ამოსულიყო ცაზე, მათი კაშკაში თუ შეედრებოდა უზენაესი პიროვნების ამ სამყაროსეული ფორმის ციალს.
13. ამ დროს არჯუნამ უფლის სამყაროსეულ ფორმაში დაინახა სამყაროს უსასრულო ექსპანსიები, რომლებიც ერთ ადგილას იმყოფებოდა, თუმცაღა მრავალ ათას ნაწილად იყო დაყოფილი.
14. მაშინ გაოგნებულმა და განცვიფრებულმა და განცვიფრებულმა არჯუნამ, რომელსაც თმები ყალყზე ედგა, თაყვანისცემის ნიშნად ქედი მოიხარა და ხელდაკრეფილმა ლოცვანი აღუვლინა უზენაეს უფალს.
15. არჯუნამ თქვა: ჩემო ძვირფასო უფალო კრშნა, შენს სხეულში შეკრებილს ვხედავ ყოველ ნახევარღმერთსა და დანარჩენ ცოცხალ არსებებს. ვხედავ ბრაჰმას, რომელიც ლოტოსის ყვავილზე ზის, უფალ შივასა და ყოველ ბრძენსა და ღვთაებრივ გველს.
16. ო სამყაროს უფალო, ო სამყაროსეულო ფორმავ, შენს სხეულში მე ვხედავ უამრავ ხელს, მუცელს, პირსა და თვალს, რომლებიც უსაზღვროდაა მოფენილი ყველგან. შენში ვერ ვხედავ ვერც დასასრულს, ვერც შუაგულსა და ვერც დასაწყისს.
17. ძნელია შენი სახის დანახვა მისი თვალისმომჭრელი ციალის გამო, რომელიც მოგიზგიზე ცეცხლისა თუ მზის განუზომელი კაშკაშის მსგავსად ყოველ მხარეს ვრცელდება. და მაინც, მე ყველგან ვხედავ ამ თვალისმომჭრელ ფორმას, რომელიც ათასგვარი გვირგვინით, კვერთხითა და დისკოთია დამშვენებული.
18. შენ ხარ უმაღლესი თავდაპირველი მიზანი. შენ ხარ მთელი სამყაროს საბოლოო განსხვავების ადგილი. შენ ხარ უშრეტი და შენ ხარ უხუცესი. შენ ხარ მარადიული რელიგიის მასულდგმულებელი, ღმრთეების პიროვნება. ასეთია ჩემი აზრი.
19. შენ არა გაქვს დასაბამი, შუაგული ან ბოლო. შენი დიდება უსაზღვროა, ურიცხვი ხელები გაქვს, მზე და მთვარე კი შენი თვალებია. გხედავ შენ, რომელსაც პირიდან მოგიზგიზე ცეცხლი ამოგდის, შენი კაშკაშით რომ წვავ მთელ სამყაროს.
20. თუმცა ერთი ხარ, მთელ ცაზე, პლანეტებზე და მათ შორის სივრცეზე ხარ განფენილი. ო უდიადესო, ამ სასწაული და საშიში ფორმის ხილვისას მთელი პლანეტარული სისტემები შეშფოთებულია.
21. ნახევარღმერთთა ყოველი დასი გემორჩილება შენდ ა შენში შედის. ზოგიერთი მათგანი დიდი შიშის გამო დაკრეფილი ხელებით აღავლენს ლოცვებს. დიად ბრძენთა და სრულყოფილ არსებათა დასები გასძახიან “სრული მშვიდობა!” და ვედური საგალობლებით გევედრებიან.
22. უფალ შივას, ადიტიების ვასუების, სადჰიების, ვიშვედების, ორი აშვის, მარუტების, წინაპრების, განდჰარვების, იაკშასების, ასურების, ასურებისა და სრულქმნილი ნახევარღმერთების სხვადასხვა გამოვლინებები განცვიფრებულნი შემოგყურებენ.
23. ო მკლავმაგარო, მრავალი სახის, თვალის, ხელის, ბარძაყის, ფეხის, მუცლისა და მრავალი შიშისმომგვრელი კბილის მქონე შენი დიადი ფორმის დანახვაზე შეშფოთებულია ყოველი პლანეტა თავიანთი ნახევარღმერთებით; და მათ მსგავსად, მეც შეშფოთებული ვარ.
24. ო ყოვლისშემძლე ვიშნუ, როდესაც ვხედავ შენს მრავალ მოკაშკაშე ფერს, რომლებიც ცას ეხება, შენს დაღებულ პირებსა და დიდ თვალისმომჭრელ თვალებს, გონება მერევა შიშისგან. ვეღარ ვინარჩუნებ ჭკუის სიმტკიცესა და ჭკუის წონასწორობას.
25. ო უფალთა უფალო, ო სამყაროთა თავშესაფარო, გთხოვ მოწყალება გაიღე ჩემდამი. თავს ვერ ვიკავებ შენი თვალისმომჭრელი სახეებისა და შიშისმომგვრელი კბილების დანახვაზე. სადაც არ უნდა გავიხედო, ყველაფერი საგონებელში მაგდებს.
26-27. დჰრტარაშტრას შვილები, მოკავშირე მეფეებთან ერთად, ბჰიშმა, დრონა, კარმა და ჩვენი მთავარი მეომრებიც შენ საშიშ პირებში მიექანებიან. და მე ვხედავ, რომ რომ ზოგიერთი მათგანი გაჩეჩქვილი თავებით არის შენ კბილებში გაჩხერილი.
28. ისევე როგორც მდინარეთა უამრავი ტალღა ჩაედინება ოკეანეში, ყოველი ეს დიადი მეომარიც შედის ცეცხლმოკიდებული შენ პირებში.
29. მე ვხედავ, რომ მთელი ხალხი დიდი სისწრაფით მიექანება შენს პირებში, ისევე როგორც ჩრჩილები მიქრიან მოგიზგიზე ცეცხლში მოსასპობად.
30. ო ვიშნუ, გხედავ ცეცხლიანი პირებით როგორ სპობ ყოველი მხრიდან მთელ ხალხს. მთელ სამყაროს შენი ციალი ფარავს და შენც საშიში, მწველი სხივების სახით ვლინდები.
31. ო უფალთა უფალო, მრისხანების განსახიერებავ, გთხოვ, მითხრა, ვინა ხარ, მე ქედს ვიხრი შენს წინაშე; გთხოვ, მოწყალება გაიღე ჩემდამი. შენ ხარ თავდაპირველი უფალი. მსურს ვიცოდე შენს შესახებ, ვინაიდან არ მესმის, რა არის შენი მისია.
32. ღმრთეების უზენაესმა პიროვნებამ თქვა: მე ვარ დრო, სამყაროთა უდიდესი გამანადგურებელი და მოვედი, რათა მთელი ხალხი გავანადგურო. თქვენს (პანდავებს) გარდა, აქ ორივე მხრიდან ყოველი მეომარი დაიხოცება.
33. ამიტომ აღსდექ. მოემზადე ბრძოლისთვის და მოიპოვე დიდება. დაამარცხე მტერი და დატკბი აყვავებული სამეფოთი. მე ისე მოვაწყე ყველაფერი, რომ ისინი უკვე მკვდრები არიან. შენ კი, ო სავიასაჩი, შეგიძლია მხოლოდ იარაღი იყო ბრძოლაში.
34. მე უკვე მოვსპე დრონა, ბჰიშმა, ჯაიადრათჰა, კარმა და დანარჩენი დიადი მებრძოლები. ამიტომ მოკალი ისინი და ნუ შეშფოთდები. უბრალოდ იბრძოლე და მტერს ბრძოლაში დაამარცხებ.
35. სანჯაიამ უთხრა დჰრტარაშტრას: ო მეფეო, ღმრთეების უზენაესი პიროვნებისგან ამ სიტყვების მოსმენის შემდეგ, აცახცახებული არჯუნა კვლავ და კვლავ ქედს იხრიდა დაკრეფილი ხელებით. შეშინებულმა აკანკალებული ხმით ასე მიმართა უფალ კრშნას.
36. არჯუნამ თქვა: ო გრძნობათა მეუფევ, სამყაროს უხარია შენი სახელის მოსმენა და ამდენად ყველა შენ შემოგნატრის. თუმცა სრულყოფილი არსებები მოკრძალებით გცემენ თაყვანს, დემონებს ეშინიათ და აქეთ-იქით გარბიან. ეს ყველაფერი სამართლიანია.
37. ო დიადო უფალო, თვით ბრაჰმაზეც უდიადესო, შენ ხარ თავდაპირველი შემოქმედი. მაშ მოწიწებით თაყვანი რატომ არ უნდა გცენ მათ? ო უსასრულოვ, ღმერთთა ღმერთო, სამყაროს თავშესაფარო! შენ ხარ უძლეველი წყარო, ყოველ მიზეზთა მიზეზი, ამ მატერიალური გამოვლინების მიღმა მყოფი.
38. შენ ხარ ღმრთეების თავდაპირველი პიროვნება, უხუცესი, ამ გამოვლენილი კოსმოსური სამყაროს საბოლოო განსასვენებელი. შენ იცი ყველაფერი და ხარ ყველაფერი, რაც შეცნობადია. შენ ხარ უმაღლესი თავშესაფარი, მატერიალურ მოდუსებზე მაღლა მყოფი. ო უსაზღვრო ფორმავ! მთელი ეს სამყაროსეული გამოვლენა შენით არის გამსჭვალული!
39. შენ ხარ ჰაერი და შენ ხარ უმაღლესი განმგებელი! შენ ხარ ცეცხლი, წყალი და მთვარ! შენ ხარ ბრაჰმა, პირველი ცოცხალი ქმნილება და შენ ხარ ბაბუის მამა, ამიტომ ათასჯერ და კვლავ და კვლავ მოწიწებით ქედს ვიხრი შენს წინაშე!
40. თაყვანს გცემ წინიდან, უკნიდან და ყოველი მხრიდან! ო უსაზღვრო ძალავ, შენ ხარ მეუფე უსასრულო ძლევამოსილებისა! შენ ხარ ყოვლისგამჭოლი და შენ ხარ ყველაფერი!
41-42. გთვლიდი რა ჩემს მეგობრად, დაუდევრად მოგმართავდი: “ო კრშნა”, “ო იადავა”. “ ო ჩემო მეგობარო”, არ ვიცოდი რა შენი დიდება. გთხოვ მაპატიე, რაც სიგიჟის ან სიყვარულის გამო გამიკეთებია. ბევრჯერ უპატივცემულოდ მოგექეცი, გეხუმრებოდი დასვენებისას, ერთ საწოლში წოლისას, ჯდომისას ან ერთად ჭამისას, ზოგჯერ მარტო, ზოგჯერ კი მრავალ მეგობარს შორის. ო შეუცდომელო, გთხოვ, მაპატიე ეს შეურაცხყოფები.
43. შენ ხარ მამა მთელი კოსმოსური გამოვლინებისა, მოძრავთა და უძრავთა, შენ ხარ სათაყვანებელი მეთაური, უზენაესი სულიერი მოძღვარი. არავინ არის შენი თანასწორი, არც არავინ არის შენთან ერთიანი. მაშინ ვინ უნდა იყოს შენზე დიადი სამ სამყაროში, ო განუზომელო ძალის უფალო?
44. შენ ხარ უზენაესი უფალი, სათაყვანებელი ყოველი ცოცხალი არსებისთვის. ამიტომ მიწას ვემხობი, რათა თაყვანი გცე და მოწყალება გთხოვო, როგორც მამა ითმენს შვილის თავხედობას, მეგობარი – მეგობრის კადნიერებას, ან ცოლი – მეუღლის მოურიდებლობას, გთხოვ მოითმინე შეცდომები, რომლებიც შენს მიმართ დამიშვია.
45. სამყაროსეული ფორმის ხილვის შემდეგ, რომელიც აქამდე არ მინახავს, გახარებული ვარ, მაგრამ, ამავე დროს, ჩემი ჭკუა შეპყრობილია შიშით. ამიტომ გთხოვ, გაიღე ჩემდამი წყალობა და კვლავ გამინდე ღმრთეების პიროვნების შენი ფორმა, ო უფალთა უფალო, ო სამყაროს განსასვენებელო.
46. ო სამყაროსეულო ფორმავ, ო ათასხელიანო უფალო, მსურს ვიხილო შენი ოთხხელიანი ფორმა, მუზარადით თავზე და კვერთხით, ბორბლით, ნიჟარითა და ლოტოსის ყვავილით ხელებში. შენი ამ ფორმის ნახვა მსურს.
47. ღმრთეების უზენაესმა პიროვნებამ თქვა: ჩემო ძვირფასო არჯუნა, ჩემი შინაგანი პოტენციით სიხარულით გაჩვენე ეს უზენაესი სამყაროსეული ფორმა ამ მატერიალურ სამყაროში. შენამდე არავის უნახავს ეს უმაღლესი ფორმა, უსასრულო და თვალისმომჭრელი სიკაშკაშით აღსავსე.
48. ო კურუს მეომართა შორის საუკეთესოვ, შენამდე არავის უნახავს ჩემი სამყაროსეული ფორმა, რადგან არც ვდების შესწავლით, არც მსხვერპლშეწირვებით, არც ქველმოქმედებით, არც მკაცრი ეპითემიებით არ შეიძლება ამ მატერიალურ სამყაროში ჩემი ამ ფორმის ხილვა.
49. შენ შეგაშფოთა და საგონებელში ჩაგაგდო ამ ჩემი საშინელი ნიშან-თვისებების ხილვამ. დაე ბოლო მოეღოს ამას. ჩემო ერთგულო, კვლავ განთავისუფლდი ყოველგვარი მღელვარებისგან. დამშვიდებული ჭკუით ახლა იმ ფორმას იხილავ, რომელიც გსურს.
50. სანჯაიამ უთხრა დჰრტარაშტრას: არჯუნასათვის ამის თქმის შემდეგ ღმრთეების უზენაესმა პიროვნებამ, კრშნამ გამოავლინა თავისი ოთხხელიანი ფორმა და ბოლოს თავისი ორხელიანი ფორმა უჩვენა, რითაც გაამხნევა შეშინებული არჯუნა.
51. როდესაც არჯუნამ კრშნა მის მშვენიერ თავდაპირველ ფორმაში იხილა, თქვა: ო ჯანარდანა, ამ მშვენიერი ადამიანისმაგვარი ფორმის შემყურეს ჭკუა დამიწყნარდა და ჩემს თავდაპირველ ბუნებას დავუბრუნდი
52. ღმრთეების უზენაესმა პიროვნებამ თქვა: ჩემო ძვირფასო არჯუნა, ჩემი ეს ფორმა, რომელსაც ახლა ხედავ მეტად ძნელი დასანახია. ნახევარღმერთებიც კი მუდამ მისი ხილვის შესაძლებლობას ეძებენ, რომელიც ესოდენ ძვირფასია.
53. იმ ფორმის შეცნობა, რომელსაც შენი ტრანსცენდენტული თვალებით ხედავ, შეუძლებელია უბრალოდ ვედების შესწავლით, სერიოზული ეპითემიების გავლით, ქველმოქმედებით ან თაყვანისცემით. ამგვარად ჩემი ჭეშმარიტი სახის დანახვა შეუძლებელია.
54. ჩემო ძვირფასო არჯუნა, მხოლოდ განუყპოფელი ერთგული სამსახურით შეიძლება ჩემი რეალური შეცნობა იმ სახით, რომლითაც შენს წინაშე ვდგავარ და ამგვარად ჩემი უშუალოდ დანახვა. მხოლოდ ამ გზით შეგიძლია შეაღწიო ჩემი შემეცნების საიდუმლოებაში.
55. ჩემო ძვირფასო არჯუნა, ის ვინც წმინდა ერთგულებით მემსახურება, ვინც განწმენდილია კარმიული საქმიანობისა და სპეკულაციური მსჯელობების უწმინდურებისაგან, ვინც ჩემთვის შრომობს, ვინც სიცოცხლის უმაღლეს მიზნად მხდის და მეგობრობს ყოველ ცოცხალ არსებასთან, აუცილებლად მოაღწევს ჩემამდე.
Atman
თავი მეთორმეტე
ერთგული სამსახური

1. არჯუნამ იკითხა: ვინ ითვლება უფრო სრულყოფილად, ის, ვინც ყოველთვის ჯეროვანი ერთგულებით გემსახურება, თუ ის, ვინც თაყვანს სცემს გამოუვლენელს – უპიროვნო ბრაჰმანს?
2. ღმრთეების უზენაესმა პიროვნებამ თქვა: ვისი ჭკუაც ჩემი პიროვნული ფორმისადმია მოპყრობილი და ყოველთვის დიდი და ტრანსცენდენტული რწმენით მცემს თაყვანს, მას ყველაზე სრულყოფილად ვაღიარებ.
3-4. მაგრამ ისინი, ვინც ბოლომდე თაყვანს სცემენ გამოუვლენელს, გრძნობათა აღქმის მიღმა მყოფს, ყოვლისგამჭოლს, წარმოუდგენელს, უცვლელს, ურყევსა და უძრავს – აბსოლუტური ჭეშმარიტების იმპერსონალურ კონცეფციას – იმით, რომ მართავენ სხვადასხვა გრძნობებს და თანაბრად არიან განწყობილნი ყველადადმი და ყველას სასიკეთოდ მოქმედებენ, საბოლოოდ მაინც ჩემთან მოდიან.
5. ძალიან უჭირთ წინსვლა იმათ, ვისი ჭკუაც უზენაესის გამოუვლენელ, იმპერსონალურ ნიშან-თვისებაზეა მიპყრობილი. ხორცშესხმულთათვის ყოველთვის ძნელია ამ წვრთნაში წინსვლა.
6-7. მაგრამ ისინი, ვინც თაყვანს მცემენ მე, მთელ საქმიანობებს მე მიძღვნიან, განუხრელად თავდადებულნი არიან ჩემთვის, ერთგულად მემსახურებიან, ყოველთვის ჩემზე არიან დაუნჯებულნი და ჭკუა ჩემსკენ აქვთ მოპყრობილი, ო პრთჰას შვილო, ისინი მალე ამომყავს დაბადებისა და სიკვდილის ოკეანიდან.
8. მხოლოდ მე, ღმრთეების უზენაეს პიროვნებას მომაპყრე ჭკუა და მთელი შენი გონება ჩემით დაასაქმე. ამდენად, მუდამ ჩემში იცხოვრე, უეჭველად.
9. ჩემო ძვირფასო არჯუნა, ო სიმდიდრის მომპოვებელო, თუკი განუხრელად ვერ მომაპყრობ ჭკუას, მაშინ შეასრულე ბჰაკტი-იოგას განაწესები და ამგვარად განივითარე ჩემამდე მოღწევის სურვილი.
10. თუკი არ შეგიძლია ბჰაკტი-იოგას რეგულაციების შესრულება, მაშინ უბრალოდ ეცადე იშრომო ჩემთვის, ვინაიდან ჩემთვის შრომით სრულქმნის საფეხურამდე მიხვალ.
11. მაგრამ თუკი ჩემზე ასეთი ცნობიერით შრომა არ შეგიძლია, მაშინ შეეცადე უარი თქვა შრომის მთელ შედეგებზე და თვითმყოფობა დაიმკვიდრო.
12. თუკი არ შეგიძლია ამ პრაქტიკის შესრულება, მაშინ ცოდნა განივითარე, მაგრამ ცოდნას მედიტაცია ჯობს, მედიტაციას კი – საქმიანობის ნაყოფებისგან აღკვეთა, ვინაიდან ასეთი აღკვეთის შედეგად ადამიანი ჭკუის სიმშვიდეს მიაღწევს.
13-14. ის, ვინც არ მტრობს არავის, არამედ ყველა ცოცხალი არსების კეთილი მეგობარია, ვინც თვლის, რომ მას არაფერი ეკუთვნის და თავისუფალია ცრუ ეგოსგან, ის, ვინც ერთნაირად შეჰყურებს ბედნიერებასაც და გაჭირვებასაც, ვინც მომთმენია და მუდამ კმაყოფილი, ვინც ფლობს საკუთარ თავს და შეურყევლად ერთგულად მემსახურება, ვისი ჭკუაც და გონებაც ჩემზეა მოპყრობილი, ასეთი ერთგული ძალიან ძვირადღირებულია ჩემთვის.
15. ის, ვინც სხვისი დაბრკოლების მიზეზი არ ხდება და ვისაც ვერავინ აწუხებს, ვინც ერთნაირია ბედნიერებასა და უბედურებაში, შიშსა და მღელვარებაში, მეტად ძვირფასია ჩემთვის.
16. ჩემი ერთგული, რომელიც არ არის დამოკიდებული საქმეთა ჩვეულებრივ მსვლელობაზე, რომელიც წმინდა, გამოცდილი, უდარდელი და ყოველგვარი ტკივილისგან თავისუფალია და რაიმე შედეგისთვის არ იღწვის, მეტად ძვირფასია ჩემთვის.
17. ის, ვინც არც ხარობს და არც დარდობს, არც გლოვობს და არც ნატრობს და უარს ამბობს სასიკეთოსა და არასასიკეთოზე – ასეთი ერთგული მეტად ძვირფასია ჩემთვის.
18-19. ის, ვინც ერთნაირია მეგობრებისა და მტრების მიმართ, ვინც წინასწარობას არ ჰკარგავს პატივსა და უპატივცემულობაში, სითბოსა და სიცივეში, ბედნიერებასა და უბედურებაში, სახელსა და უსახელობაში, ვინც მუდამ ჩამოცილებულია უწმინდურ ურთიერთობებს, მუდამ ჩუმია და ყველაფრით კმაყოფილი, ვინცარ ზრუნავს საცხოვრებელ ადგილზე, განმტკიცებულია ცოდნაში და ერთგულად მემსახურება – ასეთი პიროვნება ძალიან ძვირფასია ჩემთვის.
20. ისინი, ვინც ერთგული სამსახურის ამ უკვდავ გზას მიჰყვებიან და რწმენით მთლიანად არიან დასაქმებული, მხდიან რა საბოლოოდ უმაღლეს მიზნად მე, უაღრესად ძვირფასი არიან ჩემთვის.
Atman
თავი მეცამეტე
ბუნება, განმცხრომელი და ცნობიერება

1-2. არჯუნამ თქვა: ო ჩემო ძვირფასო კრშნა, მე მსურს ვიცოდე, რა არის პრაკრიტი (ბუნება), პურუშა (განმცხრომელი), ველი და ვეილს მცოდნე, ცოდნა და ცოდნის მიზანი.
უზენაესმა პიროვნებამ თქვა: ამ სხეულს, ო კუნტის შვილო, ველი ეწოდება, მა სკი, ვინც ამ სხეულს იცნობს – ვეილს მცოდნე.
3. ო ბჰარატას შთამომავალო, იცოდე რომ მეც ვიმყოფები ყოველ სხეულში, როგორც მცოდნე და ამ სხეულისა და მისი მცოდნის გაგებას ცოდნა ეწოდება. ასეთია ჩემი აზრი.
4. მომისმინე, გეთაყვა, ახლა მოკლედ დაგიხასიათებ მოქმედების ამ ველსა დამ ის აგებულებას, რა ცვლილებებს გადის იგი, საიდან წარმოიქმნება, ვინ არის მოქმედებების ვეილს მცოდნე და როგორია მისი ზეგავლენა.
5. სხვადასხვა ბრძენებმა სხვადასხვა ვედურ ნაწარმოებებში აღწერეს ეს ცოდნა მოქმედებების ველისა და მოქმედებების მცოდნის შესახებ. იგი განსაკუთრებული სახით არის წარმოდგენილი ვედანტა სუტრაში, მიზეზ-შედეგობრიობით მსჯელობის საფუძველზე.
6-7. ხუთი დიდი სტიქია, ცრუ ეგო, გონება, გამოუვლენელი, ათი გრძნობა და ჭკუა, გრძნობათა ხუთი ობიექტი, სურვილი, ზიზღი, ბედნიერება, უბედურება, ერთობლიობა, სიცოცხლის ნიშნები და დარწმუნებულობა – ესენი, საერთო ჯამში, მოქმედების ველად დამ ის ურთიერთქმედებად ითვლება.
8-12. მორჩილება; თავმდაბლობა; არაძალმომრეობა; მოთმინება; უბრალოება; ჭეშმარიტი სულიერი მოძღვრის მიმართვა; სისუფთავე; სიმტკიცე; თავშეკავება; გრძნობათა დაკმაყოფილების ობიექტებისაგან აღკვეთა; ცრუ ეგოს არქონა; ცოდნა იმისა, რომ დაბადება, სიკვდილი, სიბერე და ავადმყოფობა ბოროტებაა; განჯაჭვულობა; თავისუფლება შვილების, ცოლის სახლისა და სხვა დანარჩენის ტყვეობისაგან; სიმშვიდე სასიამოვნო და არასასიამოვნო შემთხვევების დროს; ჩემდამი მუდმივი და წმინდა ერთგულება; განმარტოებულ ადგილას ცხოვრების სურვილი; ხალხთა მასებს ჩემოცილება; თვითრეალიზაციის მნიშვნელობის შეგნება და აბსოლუტური ჭეშმარიტების ფილოსოფიური ძიება – მე ვაცხადებ, რომ ყველაფერი ეს ცოდნაა, ამის გარდა კი რაც არ უნდა იყოს უგუნურებას წარმოადგენს.
13. ახლა აგიხსნი შესაცნობს, რომლის ცოდნითაც მარადისობას იგემებ. დაუსაბამო და ჩემზე დამოკიდებული ბრაჰმანი, სული, ამ მატერიალური სამყაროს მიზეზ-შედეგობრიობის მიღმაა.
14. ყველგან მისი ხელები და ფეხები, მისი თვალები და სახეებია, და მისი ყურებიც ყველგანაა, ასე არსებობს ზესული, ფარავს რა ყველაფერს.
15. თუმცა ზესული ყოველი გრძნობის პირველწყაროა, მას გრძნობები არა აქვს. იგი მიჯაჭვული არ არის, თუმცა ყოველ ცოცხალ არსებას ასულდგმულებს. ბუნების მოდუსებს მიღმა დგას და თანაც მატერიალური ბუნების ყოველ მოდუსს განაგებს.
16. უზენაესი ჭეშმარიტება არის ყოველი ცოცხალი არსების, მოძრავისა და უძრავის შიგნით და გარეთ. რაკი ნატიფია, მატერიალური გრძნობებით მისი დანახვა ან შეცნობა შეუძლებელია. თუმცა ძალიან შორსაა, ყველასთან ახლოსაცაა.
17. თუმცა ჩანს რომ ზესული მთელკ ასებათა შორის გაყოფილია, არასოდეს იყოფა. იგი ერთია. თუმცა ყოველ ცოცხალ არსებას ასულდგმულებს, უნდა გვესმოდეს, რომ იგი სპობს და ანვითარებს ყველაფერს.
18. იგია ყოველი მანათობელი საგნის სინათლის წყარო. მატერიის წყვდიადს მიღმაა და გამოუვლენელია. იგია ცოდნა, ცოდნის საგანი და ცოდნის მიზანი. იგი ყველას გულში იმყოფება.
19. ამრიგად მოკლედ დაგიხასიათე მოქმედებათა ველი (სხეული), ცოდნა და შესაცნობი. მხოლოდ ჩემს ერთგულს შეუძლია ბოლომდე გაიგოს ეს და ასე მოაღწიოს ჩემს ბუნებას.
20. იცოდე, რომ მატერიალურ ბუნებას და ცოცხალ არსებებს საწყისი არა აქვთ. მათი გარდაქმნები და მატერიის მოდუსები მატერიალური ბუნების ნაწარმს წარმოადგენს.
21. ამბობენ, რომ ბუნება ყოველი მატერიალური მიზეზისა და შედეგის მიზეზია, მაშინ როდესაც ცოცხალი არსება ამ სამყაროში ათასგვარი ტანჯვისა და სიამოვნების მიზეზს წარმოადგენს.
22. ამრიგად, მატერიალურ ბუნებაში მყოფი ცოცხალი არსება მიჰყვება ცხოვრების გზებს, ტკბება რა ბუნების სამი მოდუსით. ამის მიზეზი ისაა, რომ მატერიალურ ბუნებასთან არის დაკავშირებული. ამდენად, იგი კარგსა და ცუდს ხვდება სხვადასხვა სახეობებში.
23. მაგრამ ამ სხეულში არის სხვა, ტრანსცენდენტული განმცხრომელი, რომელიც უფალია, უმაღლესი მესაკუთრეა, ზედამხედველი და ნების დამრთველია და ცნობილია ზესულის სახით.
24. ის, ვისაც ესმის ეს ფილოსოფია მატერიალური ბუნების, ცოცხალი არსებისა და ბუნების მოდუსების ურთიერთქმედების შესახებ, აუცილებლად განთავისუფლდება. მიუხედავად მისი ახლანდელი მდგომარეობისა, იგი აქ აღარ დაიბადება.
25. ზოგი საკუთარ თავში ზესულს მედიტაციით აღიქვამს, ზოგი – ცოდნის განვითარებით, ზოგი კი – კარმიული სურვილების გარეშე შრომით.
26. მაგრამ არსებობენ ისინიც, ვინც, თუმცა არ არიან სულიერ მოძღვრებაში განსწავლული, სხვებისგან მოსმენის შედეგად იწყებენ უზენაესი პიროვნების თაყვანისცემას; რადგან ავტორიტეტებისგან მოსმენის მიდრეკილება აქვთ, ისინიც გადალახავებ დაბადება-სიკვდილის გზას.
27. ო ბჰარატათა შორის მთავარო, იცოდე, რომ რაც კი არსებობს, მოძრავიცაა და უძრავიც, მოქმედებათა ველისა და ვეილს მცოდნის ნაერთია მხოლოდ.
28. ჭეშმარიტად ხედავს ის, ვინც ხედავს ზესულს, რომელიც ყველას სხეულში ინდივიდუალურ სულს ახლავს თან და ვისაც ესმის, რომ არც სული და არც რღვევად სულში მყოფი ზესული არასოდეს ნადგურდებიან.
29. იგი, ვინც ხედავს, რომ ზესული ყველგან, ყოველ ცოცხალ არსებაში ერთნაირად იმყოფება, თავისი ჭკუით არ დეგრადირდება. ამრიგად,იგი უახლოვდება ტრანსცენდენტალ მიზანს.
30. ჭეშმარიტად ხედავს ის, ვინც ხედავს, რომ ყოველ მოქმედებას მატერიალური ბუნებისგან შემდგარი სხეული ასრულებს, სული კი სრულიად უმოქმედოა.
31. როდესაც გონიერი ადამიანი ვეღარ ხედავს სხვადასხვა პიროვნებებს, მათი განსხვავებული მატერიალური სხეულების გამო და ხედავს თუ როგორ არიან არსებები გაერთიანებული ყველგან, იგი ბრაჰმანის გაგებას აღწევს.
32. ვინც მარადისობას აღიქვამენ, ხედავენ, რომ უკვდავი სული ტრანსცენდენტულია, მარადიული და ბუნების მოდუსებს მიღმა მყოფი. მატერიალურ სხეულთან კავშირის მიუხედავად, ო არჯუნა, სული არც მოქმედებს და არც იხლართება.
33. თუმცა სული ყოვლისგამჭოლია, თავისი ნატიფი ბუნების გამო არაფერში ერევა და სწორედ ასევე, ბრაჰმანის მხედველი სული არ ერევა სხეულს, თუმცა ამ სხეულში იმყოფება.
34. ო ბჰარატას შვილო, ისევე როგორც ერთი მზე ანათებს მთელ სამყაროს, ასევე სხეულში მყოფი ერთი ცოცხალი არსებაც ანათებს მთელ სხეულს ცნობიერებით.
35. ისინი, ვინც ცოდნის თვალებით ხედავენ განსხვავებას სხეულსა და სხეულის მცოდნეს შორის და მატერიალურ სამყაროში ტყვეობიდან განთავისუფლების გზის გაგება შეუძლიათ, უმაღლეს მიზანს აღწევენ.
Atman
თავი მეთოთხმეტე
მატერიალური ბუნების სამი მოდუსი

1. ღმრთეების უზენაესმა პიროვნებამ თქვა: მე კვლავ განგიცხადებ ამ უმაღლეს სიბრძნეს, საუკეთესო ცოდნას, რომლითაც ყოველმა ბრძენმა უმაღლეს სრულქმნას მიაღწია.
2. ის ვინც ამ ცოდნაში მტკიცდება, ჩემი ბუნების მსგავს ტრანსცენდენტალ ბუნებას იძენს. ის, ვინც ამგვარადაა განმტკიცებული, შექმნისას არ იბადება და არც განადგურებისას წუხდება.
3. მთელი მატერიალური სუბსტანცია, რომელსაც ბრაჰმანი ეწოდება, დაბადების სათავეა და სწორედ ამ ბრაჰმანში ჩავსახავ მე სიცოცხლეს, რითაც შესაძლებელს ვხდი ყოველი ცოცხალი არსების დაბადებას, ო ბჰარატას შთამომავალო.
4. იცოდე, რომ სიცოცხლის ყოველი სახეობა, ო კუნტის შვილო, ამ მატერიალურ ბუნებაში იბადება და რომ მე ვარ თესლის მიმცემი მამა.
5. მატერიალური ბუნება შედგება სამი მოდუსისაგან: სათნოების, ვნებისა და უგუნურებისაგან. როდესაც ცოცხალი არსება ბუნებას უკავშირდება, ო მკლავმაგარო არჯუნა, იგი განპირობებული ხდება ამ მოდუსებით.
6. ო უცოდველო, სათნოების მოდუსს, როგორც სხვებზე წმინდას, სინათლე მოაქვს და ათავისუფლებს ცოცხალ არსებას ყოველი ცოდვითი რეაქციისგან. ამ მოდუსში მყოფნი ბედნიერებითა და ცოდნით ხდებიან განპირობებულნი.
7. ვნების მოდუსი უსაზღვრო სურვილებისა და წადილისაგან არის წარმოშობილი, ო კუნტის შვილო, რის გამოც ცოცხალი არსება მატერიალურ საქმიანობებზეა მიჯაჭვული.
8. ო ბჰარატას შვილო, იცოდე, რომ უგუნურებისაგან შობილ წყვდიადის მოდუსში ყოველი ხორცშესხმული ცოცხალი არსება მოტყუებულია. ამ მოდუსის შედეგებია სიზარმაცე, სიგიჟე და ძილი, რაც ატყვევებს სულს.
9. ო ბჰარატას შვილო, სათნოების მოდუსი ბედნიერებით განაპირობებს არსებას; ვნება – კარმიული საქმიანობით; უგუნურება კი სიამოვნებას მიაჯაჭვავს იმით, რომ ცოცხალი არსების ცოდნას ფარავს.
10. ზოგჯერ სათნოების მოდუსი ჭარბობს, ამარცხებს რა ვნებისა და უგუნურების მოდუსებს, ო ბჰარატას შვილო, ზოგჯერ ვნების მოდუსი ჯობნის სათნოებასა და უგუნურებას. ზოგჯერ კი უგუნურება ერევა სათნოებასა და ვნებას. ამგვარად, მუდამ პაექრობაა პირველობისთვის.
11. სათნოების მოდუსი ვლინდება მაშინ, როდესაც სხეულის ყოველი კარი ცოდნითაა განათებული.
12. ო მთავარო ბჰარატათა შორის, როდესაც ვნების მოდუსი მატულობს, ვითარდება დიდი მიჯაჭვულობის, კარმიული საქმიანობის, ძლიერი ძალისხმევის და დაუოკებელი სურვილისა და წადილის ნიშნები.
13. როდესაც უგუნურების მოდუსი მატულობს, ო კურუს შვილო, ვლინდება წყვდიადი, უმოქმედობა, სიგიჟე და ილუზია.
14. როდესაც ცოცხალი არსება სათნოების მოდუსში გარდაიცვლება, დიადი ბრძენების წმინდა, მაღალ პლანეტებს აღწევს.
15. როდესაც ცოცხალი არსება ვნების მოდუსში გარდაიცვლება, იბადება მათ შორის, ვინც კარმიულ საქმიანობებს ეწევიან; და როდესაც არსება უგუნურების მოდუსში გარდაიცვლება, იბადება ცხოველთა სამყაროში.
16. ღვთაებრივი საქმიანობის შედეგი წმინდაა და ამბობენ, რომ სათნოების მოდუსს მიეკუთვნება, მაგრამ ვნების მოდუსში შესრულებულ საქმიანობას მოჰყვება ტანჯვა, უგუნურების მოდუსში შესრულებულს კი - სიგიჟე.
17. სათნოების მოდუსიდან ვითარდება ჭეშმარიტი ცოდნა, ვნების მოდუსიდან – სიხარბე, უგუნურების მოდუსიდან კი – ჭკუასუსტობა, სიგიჟე და ილუზია.
18. ისინი, ვინც სათნოების მოდუსში იმყოფებიან, თანდათანობით მაღალ პლანეტებზე აღიმართებიან, ვნების მოდუსში მყოფნი დედამიწის მაგვარ პლანეტებზე იცხოვრებენ; ისინი კი, ვინც უგუნურების შემზარავ მოდუსში არიან, ჯოჯოხეთის სამყაროებში ეშვებიან.
19. როდესაც ცოცხალი არსება სწორად ხედავს, რომ მოქმედებენ მხოლოდ ბუნების მოდუსები და ცნობს უზენაეს უფალს, რომელიც მთელ ამ მოდუსებზე მაღლა დგას, ჩემს სულიერ ბუნებას აღწევს.
20. როდესაც ხორცშესხმული არსება მატერიალურ სხეულთან დაკავშირებულ ამ სამ მოდუსზე ამაღლდება, თავს აღწევს დაბადებას, სიკვდილს, სიბერესა და გაჭირვებებს და ამ ცხოვრებაშიც იგემებს ნექტარს.
21. არჯუნამ იკითხა: ო ჩემო ძვირფასო უფალო! რა ნიშნებით უნდა იცონ ის, ვინც გადალახა ეს სამი მოდუსი? როგორ იქცევა და როგორ გადალახავს ბუნების მოდუსებს?
22-25. ღმრთეების უზენაესმა პიროვნებამ თქვა: ო პანდუს შვილო, ის, ვისა ცარ სძულს გასხივოსნების, მიჯაჭვულობისა და ილუზიის მოსვლა და ვინც არ შენატრის მათ, როდესაც ქრებიან; მატერიალური თვისებების ნებისმიერი ურთიერთქმედების მიმართ შეუდრეკელი და უშფოთველია, ნეიტრალური და ტრანსცენდენტული, ვისაც კარგად ესმის, რომ მხოლოდ მატერიალური მოდუსები მოქმედებენ; ვისი ყურადღებაც საკუთარ მეობაზეა მიპყრობილი და ვინც თანაბრად ხვდება ბედნიერებასა და უბედურებას; ვინც მუჭა მიწას, ქვასა და ოქროს ნაჭერს ერთი თვალით შეჰყურებს; ვინც თანაბრად შეჰყურებს სასურველსა და არასასურველს, ვინც მტკიცეა, ვინც ერთნაირად ექცევა შექებასაც და საყვედურსაც, პატივსაც და ლანძღვასაც; ვინც ერთნაირად ექცევა მეგობრებსაც და მტრებსაც; და აღკვეთილია ყოველგვარი მატერიალური საქმიანობისაგან – ამბობენ, რომ ასეთმა პიროვნებამ გადალახა ბუნების მოდუსები.
26. ის, ვინც ნებისმიერ ვითარებაში უცვლელად, სრული ერთგული სამსახურით მემსახურება მე, უმალ გადალახავს მატერიალური ბუნების მოდუსებს და ასე აღწევს ბრაჰმანის დონეს.
27. და მე ვარ ფუძე უპიროვნო ბრაჰმანისა, რომელიც უკვდავი, უხრწნადი, მარადიული და საბოლოო ბედნიერების კონსტიტუციური მდგომარეობაა.
Atman
თავი მეთხუთმეტე
უზენაესი პიროვნების იოგა

1. ღმრთეების უზენაესმა პიროვნებამ თქვა: ნათქვამია, რომ არსებობს ბანიანის უკვდავი ხე, რომლის ფესვებიც ზემოთ იზრდება, ტოტები კი ქვემოთ, ხოლო მისი ფოთლები ვედური ჰიმნებია. ვინც ეს ხე შეიმეცნა, იგი ვედათა მცოდნეა.
2. ამ ხის ტოტები ზემოთ და ქვემოთაა გაშვერილი და მატერიალური ბუნების მოდუსებით იკვებება. შტოები გრძნობათა ორგანოებია. ამ ხეს ქვევით მიმართული ფესვებიც აქვს, რომლებიც ადამიანთა საზოგადოების კარმიულ მოქმედებებთან არის გადახლართული.
3-4. ამ სამყაროში შეუძლებელია ამ ხის ჭეშმარიტი სახის შეცნობა. არავის ძალუძს გაიგოს, სად აქვს მას ბოლო, თავი ან საფუძველი. მაგრამ ადამიანმა განდგომის იარაღით, შემართებით უნდა მოჰკვეთოს მძლავრად ფესვგადგმული ხე. შემდგომ ამისა მოიძიოს ის ადგილი, სადაც წასული, უკან არასოდეს დაბრუნდება და იქ მიენდოს ღმრთეების უზენაეს პიროვნებას, ვისგანაც ყველაფერი დაიწყო და უხსოვარი დროიდან მომდინარეობს ყოველი.
5. ამ მარადიულ სამეფოს ჰპოვებენ ისინი, ვინც მოჩვენებით სახელს, ილუზიასა დაყ ალბ ურთიერთობას თავი დააღწიეს, რომელთაც შეიმეცნეს მარადიული და ბოლო მოუღეს მატერიალურ ვნებას, განთავისუფლკდნენ ბედნიერებისა და უბედურების ორმაგობებისაგან და ვინც უშეცდომოდ იციან როგორ მიენდონ უზენაეს პიროვნებას.
6. ამ ჩემს უმაღლეს სავანეს არც მზე და არც მთვარე, არც ცეცხლი და არც ელექტრობა არ ანათებს. ის, ვინც მას მიაღწევს, არასოდეს უბრუნდება მატერიალურ სამყაროს.
7. განპირობებულ სამყაროში მყოფი ცოცხალი არსებები ჩემი მარადიული, განუყოფელი ნაწილაკები არიან. განპირობებული სიცოცხლის გამო ისინი გაშმაგებით ებრძვიან ექვს გრძნობას, რომელთა რიცხვსაც ჭკუა მიეკუთვნება.
8. როგორც ჰაერს გადააქვს სურნელები, ასევე გადააქვს მატერიალურ სამეფოში ცოცხალ არსებას სიცოცხლეზე სხვადასხვა წარმოდგენები სხეულიდან სხეულში. ამგვარად, იგი ღებულობს ერთი სახის სხეულს და მერე ტოვებს მას, რათა სხვა შეიძინოს.
9. ახალი უხეში სხეულის ამგვარად მიღების შემდეგ ცოცხალი არსება გარკვეული სახის ყურებს, თვალებს, ენას, ცხვირს და შეხების ორგანოებს იძენს, რომლებიც ჭკუის გარშემო არის თავმოყრილი. ასე ტკბება იგი განსაზღვრული ჯგუფის გრძნობათა ობიექტებით.
10. უგუნურთათვის ძნელია იმის წარმოდგენა, თუ როგორ ტოვებს ცოცხალი არსება სხეულს, ვერც იმას ხვდებიან, თუ ბუნების მოდუსებით მოჯადოებული, როგორი სხეულით ტკბება იგი. მაგრამ ყოველივე ამის დანახვა ძალუძს მას, ვისაც ცოდნით აეხილა თვალი.
11. გულმოდგინე ტრანსცენდენტალისტებს, რომელთაც სრულყვეს თვითრეალიზაცია, ყველაფერ ამის სწორი აღქმის უნარი შესწევთ, ხოლო ის, ვისაც განუვითარებელი ჭკუა აქვს და თვითრეალიზაციის საფეხურზე არ იმყოფება, მოვლენათა არსს ვერ წვდება, თუმცა ცდას შეიძლება არც აკლებდეს.
12. მთელი სამყაროს წყვდიადის გამფანტველი მზის ბრწყინვალება ჩემგან მოდის და მე ვარ წყარო მთვარის შუქისაც და ცეცხლის ელვარებისაც.
13. მე ყოველ პლანეტაში შევდივარ და ჩემი ენერგიის წყალობით ისინი ორბიტაზე რჩებიან. მე მთვარედ ვიქცევი და ამ გზით მთელ ბოსტნეულს სასიცოცხლო წვენით ვავსებ.
14. მე ვარ მონელების ცეცხლი ცოცხალ არსებათა სხეულებში და ოთხი სახის საკვების გადასამუშავებლად მე ვერწყმი შემავალსა და გამავალ სასიცოცხლო აირს.
15. მე ვარ ყველას გულში. ხსოვნა, ცოდნა და დავიწყება ჩემგან მომდინარეობს. მთელი ვედების მიზანი ჩემი შეცნობაა. სინამდვილეში მე ვარ ვედანტას შემდგენელი და მე ვარ ვედების მცოდნე.
16. არსებობს ორი სახის არსებები – შეცდომებს დაქვემდებარებულნი და შეუცდომელნი. მატერიალურ სამყაროში ყოველი არსება ცდება, სულიერ სამყაროში კი ყველა შეუცდომელია.
17. ამ ორის გარდა არსებობს უდიადესი პიროვნება, ზესული, თავად მარადიული უფალი, რომელიც სამივე სამყაროშია შესული და ასულდგმულებს მათ.
18. რამეთუ მე ტრანსცენდენტული ვარ შემცდართა და შეუცდომელთა მიმართ, ჩემი სიდიადის გამო, სამყარო და ვედები ხოტბას მასხამენ, როგორც უზენაეს პიროვნებას.
19. ყოვლისმცოდნეა ის, ვინც ეჭვგარეშე მიცნობს ღმრთეების უზენაეს პიროვნებად. ამის გამო იგი, ო ბჰარატის შვილო, სრული ერთგულებით მემსახურება.
20. ეს ვედურ წმინდა წერილთა ყველაზე იდუმალი ნაწილია, ო უცოდველო, და შენ გიმჟღავნებ მას. ვინც კი მას შეიცნობს, სიბრძნით აღივსება და მისი მცდელობები სრულყოფილებით დასრულდება.
Atman
თავი მეთექვსმეტე
ღვთაებრივი და დემონური ბუნებანი

1-3. ღმრთეების უზენაესმა პიროვნებამ თქვა: უშიშრობა; საკუთარი არსებობის განწმენდა; სულიერი ცოდნის გაღრმავება; ქველმოქმედება; თვითკონტროლი; მსხვერპლშეწირვა; ვედების შესწავლა; ასკეტიზმი; უბრალოება; არაძალმომრეობა; სიმართლე; ბრაზისაგან თავისუფლება; განდეგილობა; სიმშვიდე; სხვათა ნაკლის ძიებისგან თავისუფლება; ყოველი ცოცხალი არსებისადმი სიბრალული; გაუმაძღრობისაგან თავისუფლება; სიკეთე; თავშეკავება; შეუდრეკელობა; სიძლიერე; შემწყნარებლობა; სიმამაცე; სიწმინდე; შურისაგან და პატივისაკენ სწრაფვისგან თავისუფლება – ამ ტრანსცენდენტული თვისებებით შემკულნი, ო ბჰარატას შვილო, ღვთაებრივი ბუნებით დაჯილდოებული ღვთისმოსავი ადამიანები არიან.
4. სიამაყე, მედიდურობა, პატივმოყვარეობა, ბრაზი, უხეშობა და უმეცრება დემონური ბუნების მატარებელი თვისებებია, ო პრთჰას შვილო.
5. ტრანსცენდენტული თვისებები ხელს უწყობს განთავისუფლებას, ხოლო დემონური – ტყვეობას. ნუ სწუხარ, ო პანდუს შვილო, რამეთუ შენ ღვთაებრივი თვისებებით ხარ შობილი.
6. ო პრთჰას შვილო, ამ სამყაროში არსებობენ ორი სახის შექმნილი არსებები. ერთნი ღვთაებრივად იწოდებიან, მეორენი კი – დემონურებად. ღვთაებრივი თვისებები მეტად დაწვრილებით აგიხსენი, ახლა დემონური თვისებების შესახებ ისმინე.
7. დემონებმა არ იციან, რისი გაკეთება შეიძლება და რისი არა. მათგან შორსა დგას სიწმინდე, ღირსეული ქცევა და სიმართლე.
8. ისინი ფიქრობენ, რომ ეს სამყარო არარეალურია, უსაფუძვლოა და ღმერთი არ განაგებს მას. ისინი ამბობენ, თითქოსდა იგი სქესობრივი სურვილისგან წარმოიშვა და ვნების გარდა სხვა მიზეზი არა გააჩნია რა.
9. ასეთი დასკვნების გამო დემონები, თავი რომ დაკარგეს და გონიერებაც არ გააჩნიათ, სამყაროს დამანგრეველ, უსარგებლო, საზარელ საქმეებს ჩადიან.
10. აფარებენ რა თავს დაუოკებელ ვნებას და ეფლობიან პატივმოყვარეობაში, ამპარტავნობასა და მოჩვენებით სახელში, დემონები ილუზიის გამო მუდამ უწმინდური საქმის აღთქმას იძლევიან, რამეთუ წარმავალი ხიბლავთ.
11-12. მათი რწმენით, გრძნობათა დაკმაყოფილება ადამიანთა ცივილიზაციის უპირველესი აუცილებლობაა. ამდენად, მათი მღელვარება განუზომელია. სიცოცხლის ბოლომდე ასიათასობით სურვილის ხლართებში გაბმულნი, ჟინსა და ბრაზში ჩაძირულნი, გრძნობათა დაკმაყოფილების მიზნით არაკანონიერი გზით შოულობენ ფულს.
13-15. დემონი ფიქრობს: “დღეს ამდენი სიმდიდრე მაქვს, ცემი გეგმებით ხვალ უფრო მეტს მოვიპოვებ. ახლა დიდძალი ქონების პატრონი ვარ, მომავალში სულ უფრო გაიზრდება. ის ჩემი მტერია და სიცოცხლეს გამოვასალმებ, სხვა ჩემი მტრებიც მოიკვლებიან. მე ვარ ყოვლის მბრძანებელი, მე ვარ განმცხრომელი, სრულყოფილი; ძლიერი და ბედნიერი ვარ. მე ვარ არისტოკრატი ნათესავებით გარემოცული, ყველაზე შეძლებული. ჩემზე ძლევამოსილი და ბედნიერი არავინ არის. მე გავიღებ მსხვერპლს, გავცემ მოწყალებას და ამით გავიხარებ”. ასე იტყუებს ამგვარ ხალხს უგუნურება.
16. ათასგვარი შფოთვით თავგზააბნეულნი და ილუზიის ხლართებში გაბმულნი, ისინი ძლიერ ეჯაჭვებიან გრძნობათა განცხრომას და ჯოჯოხეთში ვარდებიან.
17. თვითკმაყოფილნი და მუდამ კადნიერნი, სიმდიდრითა და ცრუ პრესტიჟით მოტყუებულნი, ზოგჯერ ამაყად ასრულებენ მსხვერპლშეწირვებს, მხოლოდ სახელისთვის, რაიმე წესისა თუ რეგულაციის შეუსრულებლად.
18. ცრუ ეგოთი, ძალით, სიამაყით, ავხორცობითა და ბრაზით მოტყუებულნი, დემონები ემტერებიან ღმრთეების უზენაეს პიროვნებას, რომელიც მათ სხეულებში და სხვათა სხეულებშიც იმყოფება და ლანძღავენ ჭეშმარიტ რელიგიას.
19. ბოროტებს და მავნებლებს, რომლებიც კაცთა შორის უმდაბლესნი არიან, მე გამუდმებით ვაგდებ მატერიალური ყოფიერების ოკეანეში, სიცოცხლის სხვადასხვა დემონურ სახეობებში.
20. დემონურ სახეობებში დაბადების გამო, ო კუნტის შვილო, ეს ხალხი მე არასოდეს მიახლოვდება. თანდათანობით ისინი არსებობის უსაძაგლეს სახემდე ეშვებიან.
21. არსებობს ჯოჯოხეთისაკენ მიმავალი სამი გზა – ავხორცობა, ბრაზი და სიხარბე. ყოველმა საღმა ადამიანმა უნდა მიატოვოს ისინი, რადგან სულის დაცმას იწვევენ.
22. ადამიანი, რომელიც ჯოჯოხეთის ამ სამ კარს გაექცევა, ო კუნტის შვილო, თვითრეალიზაციის სასიკეთო საქმეებს ჩადის და ამით თანდათანობით აღწევს უმაღლეს დანიშნულებას.
23. ის, ვინც წმინდა წერილთა დანაწესებს უარყოფს და თვითნებურად მოქმედებს, ვერ აღწევს ვერც სრულყოფილებას, ვერც ბედნიერებას და ვერც უმაღლეს დანიშნულებას.
24. ამიტომ საჭიროა იმის გაგება, თუ წმინდა წერილთა რეგულაციებით რა არის მოვალეობა და რა არ არის მოვალეობა. ამ წესებისა და რეგულაციების ცოდნით საჭიროა ისე მოქმედება, რომ ადამიანი თანდათანობით ამაღლდეს.
Atman
თავი მეჩვიდმეტე
რწმენის ნაირსახეობანი

1. არჯუნამ იკითხა: ო კრშნა, რა მდგომარეობაში არიან ისინი, ვინც არ მისდევენ წმინდა წერილთა კანონებს, მაგრამ თაყვანს სცემენ თავიანთ წარმოდგენის თანახმად? სათნოებაში არიან ისინი, ვნებასა თუ უგუნურებაში?
2. ღმრთეების უზენაესმა პიროვნებამ თქვა: ხორცშესხმული სულის მიერ შეძენილი ბუნების მოდუსების თანახმად ცოცხალი არსების რწმენა შეიძლება იყოს სამი სახის: სათნოებაში, ვნებასა ან უგუნურებაში. ახლა მოისმინე ამის შესახებ.
3. ო ბჰარატას შვილო, ბუნების გარკვეულ მოდუსებში ყოფნის შესაბამისად ცოცხალი არსება გარკვეული სახის რწმენას ინვითარებს. ამბობენ, რომ ცოცხალ არსებას გარკვეული რწმენა მის მიერ შეძენილი მოდუსების თანახმად აქვს.
4. სათნოების მოდუსში მყოფი ხალხი ნახევარღმერთებს ეთაყვანება; ისინი, ვინც ვნების მოდუსში იმყოფებიან, თაყვანს სცემენ დემონებს; უგუნურების მოდუსში კი თაყვანს სცემენ მოჩვენებებსა და სულებს.
5-6. იცოდე, რომ ისინი, ვინც სიამაყისა და ეგოიზმის გამო გადიან მკაცრ ასკეზებსა და ეპითემიებს, რომლებიც არ არის მოწოდებული წმინდა წერილებში, ვინც ვნებითა და მიჯაჭვულობით არიან შეგულიანებული, ვინც სულელები არიან და აწამებენ სხეულის მატერიალურ ელემენტებსა და მათში მყოფ ზესულს – დემონებია.
7. თითოეული პიროვნების მიერ შერჩეული საკვებიც კი სამი სახისაა, მატერიალური ბუნების სამი მოდუსის შესაბამისად. იგივე ითქმის მსხვერპლშეწირვაზეც, ასკეზებზეცა და ქველმოქმედებაზეც. ახლა მოისმინე ჩემგან ამ განსხვავებების შესახებ.
8. საკვები, რომელიც ძვირფასია მათთვის, ვინც სათნოების მოდუსში იმყოფება, ზრდის ცხოვრების ხანგრძლივობას, ასპეტაკებს არსებობას და იძლევა ძალას, ჯანმრთელობას, ბედნიერებასა და კმაყოფილებას. ასეთი საკვები, წვნიანი, ცხიმიანი, სასარგებლოა და გულისთვის სასიამოვნო.
9. საჭმელი, რომელიც მეტისმეტად მწარე, მეტისმეტად მჟავე, მარილიანი, ცხელი, ცხარე, მშრალი და მწველია, ძვირფასია მათთვის, ვინც ვნების მოდუსში იმყოფება. ასეთი საჭმელი იწვევს გაჭირვებას, ტანჯვასა და ავადმყოფობას.
10. საჭმელი, რომელიც მომზადებულია ჭამამდე სამი საათით ადრე, უგემური, გახრწნილი და აყროლებულია და რაც ნარჩენებისა და ხელშეუხებადი საჭმლისაგან შედგება, ძვირფასია მათთვის, ვინც წყვდიადის მოდუსში იმყოფებიან.
11. მსხვერპლშეწირვათა შორის, ის მსხვერპლშეწირვა, რომელიც წმინდა წერილთა მითითებების თანახმად, მოვალეობის გამო სრულდება, მათ მიერ, ვისაც არაფერი სურთ სანაცვლოდ, სათნოების ბუნებისაა.
12. მაგრამ იცოდე, რომ მსხვერპლშეწირვა, რომელიც გარკვეული მატერიალური მოგებისთვის ან სიამაყის გამო სრულდება, ო ბჰარატთა შორის საუკეთესოვ, ვნების მოდუსშია.
13. ნებისმიერი მსხვერპლშეწირვა, რომელიც სრულდება წმინდა წერილთა დანაწესების გაუთვალისწინებლად, პრასადის (სულიერი საკვების) დარიგების, ვედური ჰიმნების, მღვდელმსახურთა დასაჩუქრებისა და რწმენის გარეშე, უგუნურების მოდუსს მიეკუთვნება.
14. სხეულის ასკეტიზმს მიეკუთვნება უზენაესი უფლის, ბრაჰმანების, სულიერი მოძღვრის და უფროსი თაობის წარმომადგენლების, კერძოდ, დედისა და მამის თაყვანისცემა, აგრეთვე სიწმინდე, სისადავე, უბიწოება და არაძალმომრეობა.
15. მეტყველების ასკეტიზმი ნიშნავს იმ სიტყვების წარმოთქმას, რომლებიც მართალი, სასიამოვნო და სასიკეთოა, რომელიც არ აღაგზნებს სხვებს, აგრეთვე ვედური ლიტერატურის რეგულარულად ციტირებას.
16. ხოლო კმაყოფილება, სისადავე, სერიოზულობა, თავშეკავება და საკუთარი ყოფიერების განწმენდა წარმოადგენს ჭკუის ასკეტიზმს.
17. ამ სამმაგ ასკეტიზმს, ტრანსცენდენტული რწმენით მათ მიერ შესრულებულს, ვინც არ ელიან მატერიალურ მოგებას, არამედ მხოლოდ უზენაესისთვის მოქმედებენ, ეწოდება ასკეტიზმი სათნოებაში.
18. ითვლება, რომ ეპითიმია, შესრულებული სიამაყის გამო და პატივის, სახელისა და თაყვანისცემის მოსაპოვებლად, ვნების მოდუსშია. იგი არც ურყევია და არც მუდმივი.
19. ნათქვამია, რომ ეპითიმია, შესრულებული სისულელის გამო, თვითგვემით ან სხვების განადგურებითა თუ დასახიჩრებით, უგუნურების მოდუსში იმყოფება.
20. ითვლება, რომ მოწყალება, გაღებული მოვალეობის გამო, ანაზღაურების მოლოდინის გარეშე, სათანადო დროსა და ადგილას, ღირსეული პიროვნებისადმი, სათნოების მოდუსშია.
21. მაგრამ ნათქვამია, რომ ქველმოქმედება, რომელიც სანაცვლოს მიღების მოლოდინით, ან კარმიული შედეგების სურვილით, ან უხალისო განწყობილებით სრულდება, არის ქველმოქმედება ვნების მოდუსში.
22. ნათქვამია, რომ ის ქველმოქმედება კი, რომელიც უწმინდურ ადგილას, არასწორ დროს, უღირსი პიროვნებებისადმი ან სათანადო ყურადღებისა და პატივისცემის გარეშე სრულდება, უგუნურების მოდუსს მიეკუთვნება.
23. სამყაროს დასაბამიდან სამი სიტყვა – ომ ტატ სატ – უზენაესი აბსოლუტური ჭეშმარიტების აღსანიშნავად გამოიყენებოდა. ამ სამ სიმბოლურ განსახიერებას იყენებდნენ ბრაჰმანები ვედური ჰიმნების გალობისას და უზენაესის დაკმაყოფილებისათვის განკუთვნილი მსხვერპლშეწირვების დროს.
24. ამიტომ როდესაც ტრანსცენდენტალისტები წმინდა დანაწესის თანახმად ასრულებენ მსხვერპლშეწირვებს, ქველმოქმედებასა და ეპითიმიას, მუდამ იწყებენ სიტყვით “ომ”, რათა უზენაესს მიაღწიონ.
25. ადამიანმა კარმიული შედეგების სურვილის გარეშე უნდა შეასრულოს ათასგვარი მსხვერპლშეწირვა, ეპითიმია და ქველმოქმედება სიტყვით “ტატ”. ასეთი ტრანსცენდენტული საქმიანობის მიზანი არის მატერიალური ტყვეობიდან თავის დაღწევა.
26-27. აბსოლუტური ჭეშმარიტება არის ერთგული სამსახურის მსხვერპლშეწირვის მიზანი და იგი აღნიშნულია სიტყვით “სატ”. ასეთი მსხვერპლშეწირვის შემსრულებელიც არის “სატ”, ისევე როგორც მსხვერპლშეწირვის, ეპითიმიისა და ქველმოქმედების ყოველი ქმედება, რომელიც თავისი ჭეშმარიტი აბსოლუტური ბუნების წყალობით უზენაესი პიროვნების დასაკმაყოფილებლად სრულდება, ო პრთჰას შვილო.
28. ის, რაც სრულდება მსხვერპლშეწირვის, ქველმოქმედების ან ეპითიმიის სახით, უზენაესის რწმენის გარეშე, ო პრთჰას შვილო, წარმავალია. მას ეწოდება “ასატ” და უსარგებლოა როგორც ამ, ასევე შემდეგ ცხოვრებაშიც.
Atman
თავი მეთვრამეტე (ბოლო თავი)
დასკვნა – განდეგილობის სრულქმნა

1. არჯუნამ თქვა: ო მკლავმაგარო, მე მსურს ვიცოდე რა არის განდეგილობის (ტიაგის) და განდეგილის ცხოვრების წესის (სანიასას) მიზანი, ო დემონ კეშის მკვლელო, გრძნობათა მეუფევ.
2. ღმრთეების უზენაესმა პიროვნებამ თქვა: დიადი სწავლულები მატერიალურ სურვილზე დამყარებულ საქმიანობაზე უარის თქმას განდეგილის ცხოვრების წესს (სანნიასას) უწოდებენ. ყოველი საქმიანობის შედეგებზე უარის თქმას კი ბრძენები უწოდებენ განდეგილობას (ტაიგას).
3. ზოგიერთი სწავლული აცხადებს, რომ რაკი ყოველი კარმიული საქმიანობა მანკიერია, ადამიანმა უარი უნდა თქვას მათზე. სხვა ბრძენები კი ადასტურებენ, რომ ადამიანმა არასოდეს უნდა მიატოვოს მსხვერპლშეწირვა, ქველმოქმედება და ეპითიმია.
4. ო ბჰარატთა შორის საუკეთესოვ, ახლა ისმინე ჩემი დასკვნა განდეგილობის შესახებ. ო ვეფხვო კაცთა შორის, წმინდა წერილებში ნათქვამია, რომ სამი სახის განდეგილობა არსებობს.
5. არ შეიძლება მსხვერპლშეწირვის, ქველმოქმედებისა და ეპითიმიის მიტოვება; ისინი უნდა შეასრულო, სინამდვილეში, მსხვერპლშეწირვა, ქველმოქმედება და ეპითიმია დიად სულებსაც კი ასპეტაკებს.
6. ყოველი ეს საქმიანობა უნდა შესრულდეს მიჯაჭვულობისა და რაიმე შედეგის მოლოდინის გარეშე. ისინი მოვალეობის გამო უნდა შესრულდეს, ო პრთჰას შვილო. ასეთია ჩემი საბოლოო აზრი.
7. დაწესებულ მოვალეობებზე უარის თქმა არასოდეს არ შეიძლება. თუკი ადამიანი ილუზიის გამო უარს ამბობს მასზე დაწესებულ მოვალეობებზე, ნათქვამია, რომ ასეთი განდეგილობა უგუნურების მოდუსს მიეკუთვნება.
8. ის, ვინც უარს ამბობს დაწესებულ მოვალეობებზე მათი სირთულის ან სხეულისეული უხერხულობის შიშის გამო, განდეგილია ვნების მოდუსში. ასეთი ქმედება არასოდეს აამაღლებს მას განდეგილობაში.
9. ო არჯუნა, როდესაც ადამიანი თავის დაწესებულ მოვალეობას მხოლოდ იმიტომ ასრულებს, რომ ეს შესრულებული უნდა იქნას და უარს ამბობს ყოველგვარ მატერიალურ ურთიერთობასა და ნაყოფზე ყოველგვარ მიჯაჭვულობაზე, მისი განდეგილობა სათნოების მოდუსშია.
10. სათნოების მოდუსში მყოფ გონიერ განდეგილს, რომელსაც არც არასასიკეთო შრომა სძულს და არც სასიკეთო შრომაზეა მიჯაჭვული, ეჭვი არ ეპარება შრომის შესახებ.
11. ხორცშესხმულ არსებას მართლაც არ შეუძლია ყოველგვარ საქმიანობაზე უარის თქმა, მაგრამ მას, ვინც უარს ამბობს ქმედების ნაყოფებზე, ჭეშმარიტად განდეგილი ეწოდება.
12. მასთან, ვინც განდეგილი არ არის, სიკვდილის შემდეგ მოქმედების სამმაგი ნაყოფები მოდის: სასურველი, არასასურველი და შერეული. მაგრამ მათ, ვინც განდეგილის ცხოვრებას ეწევიან, არ უწერიათ ასეთი შედეგით ტანჯვა ან დატკბობა.
13. ო მკლავმაგარო არჯუნა, ვედანტას თანახმად ნებისმიერი საქმიანობის შესრულებისთვის ხუთი მიზეზი არსებობს. ახლა მე გასწავლი მათ.
14. მოქმედების ხუთი ფაქტორია მოქმედების ადგილი (სხეული), მომქმედი, სხვადასხვა გრძნობები, სხვადასხვა მცდელობა და საბოლოო ჯამში, ზესული.
15. ნებისმიერი სწორი თუ არასწორი საქმიანობა, რომელსაც ადამიანი სხეულით, ჭკუითა თუ მეტყველებით ასრულებს, ამ ხუთი ფაქტორითაა გამოწვეული.
16. ამიტომ ის, ვინც საკუთარ თავს ერთადერთ შემსრულებლად თვლის და არ ითვალისწინებს ხუთ ფაქტორს, უდაოდ უგუნურია დ ავერ ხედავს საგნებს ჭეშმარიტ შუქში.
17. ის, ვისი მოქმედებაც ცრუ ეგოთი არ არის გამოწვეული, ვისი გონებაც თავისუფალია, არავის კლავს, თუმცაღა კლავს ხალხს ამ სამყაროში. მას ვერც ქმედებები ატყვევებს.
18. ცოდნა, ცოდნის ობიექტი და მცოდნე – ეს ის სამი ფაქტორია, რომლებიც ქმედებას განაპირობებს; გრძნობები, შრომა და შემსრულებელი ქმედების სამი შემადგენელი ნაწილია.
19. მატერიალური ბუნების სხვადასხვა მოდუსების თანახმად არსებობს სამი სახის ცოდნა, მოქმედება და მოქმედების შემსრულებელი. ახლა ჩემგან მათ შესახებ მოისმინე.
20. იცოდე, რომ ცოდნა, რომლის საშუალებითაც ცოცხალი არსება ერთ განუყოფელ სულიერ ბუნებას ხედავს ყოველ ცოცხალ არსებაში, თუმცა ისინი ურიცხვ სახეებად არიან დაყოფილი, სათნოების მოდუსს მიეკუთვნება.
21. იცოდე, რომ ცოდნა, რომლის საშუალებითაც ცოცხალი არსება ყოველ განსხვავებულ სხეულში სხვადასხვა სახის ცოცხალ არსებას ხედავს, ვნების მოდუსში იმყოფება.
22. ის ცოდნა კი, რომლითაც ცოცხალი არსება მთლიანად მიჯაჭვულია ერთი სახის შრომაზე, რომელიც მოკლებულია ცოდნას ჭეშმარიტის შესახებ და მეტად შეზღუდულია, სიბნელის მოდუსს მიეკუთვნება.
23. მოწესრიუგებული საქმიანობა, რომელიც მიჯაჭვულობის, სიყვარულისა თუ სიძულვილის და კარმიული შედეგების სურვილის გარეშე სრულდება, მიეკუთვნება სათნოების მოდუსს.
24. მაგრამ იმ მოქმედებას, რომელსაც დიდი ძალისხმევით ასრულებს საკუთარი სურვილების დაკმაყოფილების მოსურნე და ცრუ ეგოს შეგრძნებით მოქმედი პიროვნება, ეწოდება მოქმედება ვნების მოდუსში.
25. ის მოქმედება, რომელიც სრულდება ილუზიაში, წმინდა წერილთა დანაწესების უგულვებელყოფით და იმაზე წუხილის გარეშე, რომ ამას მომავალი ტყვეობა, ძალმომრეობა ან სხვა ტანჯვა მოჰყვება, უგუნურების მოდუსშია.
26. ის, ვინც საკუთარ მოვალეობას მატერიალური ბუნების მოდუსებთან დაუკავშირებლად, ცრუ ეგოს გარეშე, შეუპოვრობითა და ენთუზიაზმით, და წარმატებასა თუ მარცხში შეურყევლად ასრულებს, ამბობენ, რომ სათნოების მოდუსში შრომობს.
27. მშრომელი, რომელიც მიჯაჭვულია შრომასა და შრომის ნაყოფებს, რომელსაც სურს ამ ნაყოფებით დატკბობა და ხარბი, მუდამ შურიანი და ჭუჭყიანია, ვისაც სიხარული და მწუხარება ამოძრავებს, ამბობენ, რომ ვნების მოდუსში იმყოფება.
28. იმ მშრომელს, რომელიც მუდამ წმინდა წერილთა დანაწესების საწინააღმდეგო საქმეს ასრულებს, რომელიც მატერიალისტური, ჯიუტი, მატყუარა და სხვების შეურაცხყოფაში გაწაფულია, ზარმაცი, მუდამ მოღუშული და გამჭიანურებელია, უგუნურების მოდუსში მშრომელი ეწოდება.
29. ო სიმდიდრის მომპოვებელო, ახლა გთხოვ, ისმინე, დაწვრილებით როგორ დაგიხასიათებ მატერიალური ბუნების სამი მოდუსის შესაბამისად სხვადასხვა სახის გაგებასა და შეუპოვრობას.
30. ო პრთჰას შვილო, ის გაგება, რომლის საშუალებითაც ადამიანს ესმის, რა უნდა შესრულდეს და რა არ უნდა შესრულდეს, რისი უნდა ეშინოდეს და რისი არ უნდა ეშინოდეს, რა ითრევს და რა ანთავისუფლებს, სათნოების მოდუსშია.
31. ო პრთჰას შვილო, ის გაგება, რომლითაც ცოცხალი არსება ვერ არჩევს რელიგიას არარელიგიურობისაგან, ქმედებას, რომელიც უნდა შესრულდეს, იმ ქმედებისგან, რომლის შესრულებაც არ შეიძლება, ვნების მოდუსშია.
32. გაგება, რომლითაც არარელიგიურობა რელიგიადაა მიჩნეული, რელიგია კი არარელიგიურობად, რომელიც ილუზიის გავლენასა და წყვდიადში იმყოფება და მუდამ არასწორი მიმართულებითაა მიმართული, ო პრთჰა, უგუნურების მოდუსშია.
33. ო პრთჰას შვილო, შეუპოვრობა, რომელიც შეუწყვეტელია, რომელიც იოგას პრაქტიკის სიმტკიცით საზრდოობს და ამგვარად მართავს ჭკუას, სიცოცხლესა და გრძნობების ქმედებებს, სათნოების მოდუსში მყოფი შეუპოვრობაა.
34. მაგრამ შეუპოვრობა, რომლითაც ცოცხალი არსება ჩაჭიდებულია რელიგიას, ეკონომიკური განვითარებისა და გრძნობათა დაკმაყოფილების კარმიულ შედეგებს, ვნების ბუნებისაა, ო არჯუნა.
35. ის შეუპოვრობა კი, რომელიც სიზმარს, შიშს, გლოვას, გულჩათხრობილობასა და ილუზიას ვერ სცდება – ასეთი არაგონივრული შეუპოვრობა, ო პრთჰას შვილო, წყვდიადის მოდუსშია.
36. ო ბჰარატთა შორის საუკეთესოვ, ახლა გთხოვ ისმინე ჩემგან სამი სახის ბედნიერების შესახებ, რომლითაც განპირობებული სული ტკბება და რომლითაც ზოგჯერ ყოველგვარ გაჭირვებას ასრულებს.
37. იმას, რაც დასაწყისში შეიძლება შხამს ჰგავდეს, მაგრამ ბოლოს ნექტარად იქცევა და თვითრეალიზაციისთვის აღვიძებს ცოცხალ არსებას, ეწოდება ბედნიერება სათნოების მოდუსში.
38. იმ ბედნიერებას, რომელიც გრძნობებისა და მათი ობიექტების ურთიერთობისგან მიიღება და დასაწყისში ნექტარს ჰგავს, ბოლოს კი შხამია, ვნების ბუნების ბედნიერება ეწოდება.
39. იმ ბედნიერებას კი, რომელიც თვითრეალიზაციის მიმართ ბრმაა, თავიდან ბოლომდე შეცდომაა და ძილის, სიზარმაცისა და ილუზიისგან აღმოცენდება, უგუნურების ბუნების მქონე ბედნიერება ეწოდება.
40. არც აქ, არც მაღალ პლანეტარულ სისტემებზე დასახლებულ ნახევარღმერთთა შორის არ არსებობს არსება, რომელიც თავისუფალია მატერიალური ბუნებისგან შობილი ამ სამი მოდუსისგან.
41. მატერიალური მოდუსების შესაბამისი თავიანთი ბუნებისაგან შობილი თვისებებით ბრაჰმანები, კშატრიები, ვაიშიები და შუდრები განსხვავდებიან ერთმანეთისგან, ო მტრის შემმუსვრელო.
42. სიმშვიდე, თავშეკავება, ასკეტიზმი, სიწმინდე, მოთმინება, პატიოსნება, ცოდნა, სიბრძნე და რელიგიურობა ის ბუნებრივი თვისებებია, რომლებითაც ბრაჰმანები შრომობენ.
43. გმირობა, ძალა, შეუპოვრობა, საზრიანობა, ბრძოლაში სიმამაცე, გულუხვობა და წინამძღოლობა, ბუნებრივი თვისებებია კშატრიათა შრომისთვის.
44. მიწათმოქმედება, ძროხების დაცვა და ვაჭრობა ვაიშიების ბუნებრივი საქმიანობაა, შუდრებისთვის კი შრომა და სხვათა სამსახურია განკუთვნილი.
45. თავისი შრომის თვისებების შესრულებით ყოველ ადამიანს შეუძლია სრულქმნის მიღწევა. ახლა გთხოვ მისმინე, როგორ შეიძლება ამის მიღწევა.
46. უფლის თაყვანისცემით, რომელიც ყოველი არსების წყარო და ყოვლისგამჭოლია, ადამიანს სრულქმნას შეუძლია მიაღწიოს საკუთარი შრომის შესრულებით.
47. უმჯობესია აკეთო საკუთარი საქმიანობა, არასრულყოფილადაც კი, ვიდრე სხვისი საქმე ითავო და სრულყოფილად შეასრულო. საკუთარი ბუნებისადმი დაწესებულ მოვალეობებზე არასოდეს მოქმედებს ცოდვითი რეაქციები.
48. ყოველი ძალისხმევა ისევეა გარკვეული ნაკლით დაფარული, როგორც ცეცხლია დაფარული კვამლით. ამიტომ ადამიანმა არ უნდა მიატოვოს საკუთარი ბუნებისგან შობილი სამუშაო, ო კუნტის შვილო, მაშინაც კი, თუკი ასეთი შრომა ნაკლოვანებითაა სავეს.
49. მას, ვინც მართავს საკუთარ თავს, განჯაჭვულია და არაფრად აგდებს არავითარ მატერიალურ სიამოვნებას, განდეგილობის პრაქტიკით რეაქციებისგან თავისუფლების უმაღლეს სრულქმნის საფეხურის მიღწევა შეუძლია.
50. ო კუნტის შვილო, ისწავლე ჩემგან, თუ როგორ ადის სრულქმნის უმაღლეს დონეზე, ბრაჰმანზე, უმაღლეს ცოდნის საფეხურზე ის, ვინც ამ სრულქმნას იმ გზით მიაღწია, რომელსაც ახლა შევაჯამებ.
51-53. ვინც საკუთარი გონებით განწმენდილია და სიმტკიცით მართავს ჭკუას, უარს ამბობს გრძნობათა დაკმაყოფილების საგნებზე, განწმენდილია მიჯაჭვულობისა და სიძულვილისაგან, ვინც განმარტოებულ ადგილას ცხოვრობს, ცოტას ჭამს, მართავს საკუთარ სხეულს, ჭკუასა და მეტყველების უნარს, ვინც მუდამ ტრანსშია და განჯაჭვული, თავისუფალია ცრუ ეგოს, ცრუ ძალის, ცრუ სიამაყის, ვნებისა და მრისხანებისაგან და ვინც არ ღებულობს მატერიალურ საგნებს, ვინც თავისუფალია საკუთრების ცრუ გრძნობისაგან და მშვიდია – ასეთი პიროვნება უდაოდ თვითრეალიზაციის მდგომარეობამდეა ამაღლებული.
54. ვინც ასეთ ტრანსცენდენტალ მდგომარეობაში იმყოფება, უმალ შეიცნობს უზენაეს ბრაჰმანს და სიხარულით აღსავსე ხდება. არასოდეს გლოვობს ან ნატრობს რაიმეს. ერთნაირად არის განწყობილი ყოველი ცოცხალი არსებისადმი. ასეთ მდგომარეობაში იგი ჩემს წმინდა ერთგულ სამსახურს აღწევს.
55. ჩემი ჭეშმარიტი სახის, როგორც ღმრთეების უზენაესი პიროვნების შეცნობა მხოლოდ ერთგული სამსახურით შეიძლება და როდესაც ცოცხალი არსება ასეთი ერთგულებით ბოლომდე შემიცნობს მე, შეძლებს ღმერთის სასუფეველში შეღწევას.
56. თუმცა ჩემი წმინდა ერთგული ყოველგვარ საქმიანობას ეწევა, ჩემი მფარველობის გამო ჩემი წყალობით მარადიულ და უკვდავ სავანეს აღწევს.
57. ყოველ საქმეში უბრალოდ ჩემი იმედი გქონდეს და მუდამ ჩემი მფარველობის ქვეშ იმოქმედე. ასეთ ერთგულ სამსახურში ბოლომდე გამაცნობიერე მე.
58. თუკი გაცნობიერებული გეყოლები მე, ჩემი წყალობით განპირობებული სიცოცხლის ყოველ დაბრკოლებას გადალახავ. მაგრამ თუკი იმოქმედებ არა ასეთი ცნობიერებით, არამედ ცრუ ეგოთი და არ მომისმენ მე, დაიკარგები.
59. თუკი ჩემი ხელმძღვანელობით არ იმოქმედებ და არ იბრძოლებ, არასწორ გზას დაადგები. შენივე ბუნებით, იძულებული იქნები იბრძოლო.
60. ილუზიის გამო უარს ამბობს ბრძოლაზე, მაგრამ შენი ბუნებისგან სობილი სრომის გამო მაინც იძულებული იქნები იმოქმედო, ო კუნტის შვილო.
61. უზენაესი უფალი ყველას გულში იმყოფება, ო არჯუნა, და წარმართავს ყოველი ცოცხალი არსების ხეტიალს, რომლებიც თითქოსდა მატერიალური ენერგიისგან შექმნილ მანქანაში სხედან.
62. ო ბჰარატას შთამომავალო, ბოლომდე მიენდე მას, მისი წყალობით შენ ტრანსცენდენტალ სიმშვიდეს და უმაღლეს და მარადიულ სავანეს მოიპოვებ.
63. ამრიგად, მე კიდევ უფრო, საკრალური ცოდნა გადმოგეცი. ბოლომდე აწონ-დაწონე და შემდეგ გააკეთე, რაც გსურს.
64. ვინაიდან შენ ჩემი ძვირფასი მეგობარი ხარ, მე ჩემს უმაღლეს დარიგებას გაძლევ, ყველაზე საკრალურ ცოდნას მთელ ცოდნათა შორის. მისმინე, ვინაიდან ამას შენი სიკეთისთვის ვლაპარაკობ.
65. მუდამ იფიქრე ჩემზე, გახდი ჩემი ერთგული, თაყვანი მეცი და ემთხვიე მიწას ჩემს წინაშე. ასე უცილობლად მოხვალ ჩემთან. მე გპირდები ამას, ვინაიდან შენ ჩემი მეტად ძვირფასი მეგობარი ხარ.
66. მიატოვე ყოველი სახის რელიგია და უბრალოდ მე მომენდე. მე გიხსნი ყოველგვარი ცოდვითი რეაქციებისგან. ნუ გეშინია.
67. ეს საკრალური ცოდნა არასოდეს უნდა აუხსნა მათ, ვინც არ არიან ასკეტურნი, ერთგულნი, ვინც ერთგულ სამსახურს არ ასრულებენ ან მათ, ვისაც ჩემი შურთ.
68. მას, ვინც ამ უმაღლეს საიდუმლოს უხსნის ერთგულებს, განაღდებული აქვს წმინდა ერთგული სამსახური და საბოლოოდ იგი ჩემთან ბრუნდება.
69. ამ სამყაროში ჩემთვის მასზე ძვირფასი მსახური არ არსებობს და ვერც ვერავინ იქნება ოდესმე მასზე ძვირფასი.
70. და მე ვაცხადებ, რომ ის, ვინც ამ ჩვენს საკრალურ საუბარს სწავლობს, გონებით თაყვანს მცემს მე.
71. ის კი, ვინც რწმენითა და შურის გარეშე ისმენს, იწმინდება ცოდვითი რეაქციებისაგან და აღწევს სასიკეთო პლანეტებს, სადაც ღვთისმოსავნი ცხოვრობენ.
72. ო პრთჰას შვილო, ო სიმდიდრის მომპოვებელო, ყურადღებით მოისმინე? უკვე გაქარწყლდა შენი უგუნურება და ილუზია?
73. არჯუნამ თქვა: ჩემო ძვირფასო კრშნა, ო შეუცდომელო, უკვე გაქრა ჩემი ილუზია. შენი წყალობით მეხსიერება დამიბრუნდა. ახლა ვერაფერი შემარყევს. ეჭვი არა მაქვს და მზადა ვარ შენი დარიგებების შესასრულებლად.
74. სანჯაიამ თქვა: ასე მოვისმინე ორი დიადი სულის, კრშნასა და არჯუნას საუბარი. და იმდენად საოცარია ეს ეპისტოლე, რომ თმები ყალყზე მიდგება.
75. ვიასას წყალობით მე მოვისმინე ეს ყველაზე საკრალური საუბრები, უშუალოდ მთელი მისტიციზმის მბრძანებლის, კრშნასაგან, რომელიც პირადად არჯუნას ელაპარაკებოდა.
76. ო მეფეო, როდესაც კვლავ და კვლავ ვიგონებ კრშნასა და არჯუნას ამ საოცარ და წმინდა საუბარს, გული მითრთის და ყოველ წამს სიამოვნებას ვგრძნობ.
77. ო მეფეო, როგორც კი უფალი კრშნას საოცარ სახეს ვიხსენებ, უფრო და უფრო აღფრთოვანებული ვარ და კვლავ და კვლავ ვხარობ.
78. სადაც არის კრშნა, მთელი მისტიციზმის მეუფე და სადაც არის არჯუნა, უდიდესი მშვილდოსანი, იქ აუცილებლად იქნება სიდიადე, გამარჯვება, არნახული ძალა და ზნეობა. ასეთია ჩემი აზრი.
Atman
ესეც ვორდის ფაილი:

http://www.bin.ge/file/132580/Bhagavat-Gita-S-P-.doc.html
DISCIPLINE
ყველაზე მეტად ეს ფრაზა მომეწონა მთელ წიგნში. : )

"Worshippers of the celestial controllers go to the celestial controllers, the worshippers of the ancestors go to the ancestors, and the worshippers of the ghosts go to the ghosts, but My devotees come to Me, and are not born again. (9.25)"
serafinapekkala
ამ თემაში გაერთიანდა Atman-ის და tikoroma-ას ორი, ერთიდაიგივე შინაარსის თემა. არ იფიქროთ რომ რაიმე წაშლილია.

smile.gif
Atman
serafinapekkala

სწორი სახელი მაინც დაარქვი... ბჰაგავად გიტა და არა ბჰაგავადატგიტა biggrin.gif
serafinapekkala
Atman

უკაცრავად, მაგრამ თემის სათაური არ დამირედაქტირებია და როგორც იყო გახსნილი ისე დავტოვე.
Atman
serafinapekkala
QUOTE(galadriel @ 23rd April 2010 - 10:30 AM) *
უკაცრავად, მაგრამ თემის სათაური არ დამირედაქტირებია და როგორც იყო გახსნილი ისე დავტოვე.


ხო ვიცი ეგრე რო ერქვა და იმიტომ გეუბნები იქნებ შეუცვალო.
serafinapekkala
Atman

კი, შევეცდები. უბრალოდ მოდერირების ყველა ფუნქციაში არ გავრკვეულვარ ჯერ.
jgvenza
serafinapekkala
პირველი პოსტი გახსენი და იქ დაარედაქტირე სახელწოდებაwink.gif
Atman
serafinapekkala

გაიხარე! smile.gif
tikoroma
http://files.ge/file/482433/gitas-komentarebi-doc.htm

პირველი ლინკი არ მუშაობს..

ეს გიტას კომენტარებია, თავიდან ავტვირთე
tikoroma
ატმან.

30. ო ბჰარატას შთამომავალო, შეუძლებელია იმის მოკვლა, ვინც ამ სხეულში ცხოვრობს. ამიტომ ნურც ერთ ცოცხალ არსებაზე ნუ იდარდებ. ეს კრიშნას სიტყვები ხომაა.
ვინ წყვეტს როდისაა საჭირო ბრძოლა და როდის არა კაც კლას - შესრულება...

38. იბრძოლე ბრძოლისათვის. ნუ იფიქრებ ბედნიერებისა და უბედურებაზე, ზარალსა და მოგებაზე, გამარჯვებასა და მარცხზე. ამ გზით არასოდეს დაიდებ ცოდვას.

ეს რა მოწოდებებია?
გიტა რაღაცის გაგრძელებაა ხომ? ცოტა გასაგებ ენაზე ამიხსენი რა საჭირო იყო ეს ბრძოლა, ვის ებრძვიან...

და კიდევ, ინდოეთში ხომ კასტებადაა დაყოფილი და დაბალ კასტას აკრძალული რომ აქვს ყველაფერი, მაგასაც ეთანხმები?

ისე, ამ ტექსტებს რომ ვკითხულობ, ბევრი პარალელია სახარებასთან, მამა პაისთან, ლაზარევთან და რავი რაც წავიკითხე რა ამ ბოლოს, ეხმიანება ერთმანეთს... ნუ როგორ უნდა იცხოვროს ადამიანმა, საერთო ფორმულა ერთია მაინც...

მიჯაჭვულობის მოხსნა და საკუთარი თავის უფლისთვის მიძღვნა _ ესაა პირველ რიგში ქრისტიანობაშიც
daat
QUOTE(tikoroma @ May 2 2010, 08:32 PM) *
ატმან.

30. ო ბჰარატას შთამომავალო, შეუძლებელია იმის მოკვლა, ვინც ამ სხეულში ცხოვრობს. ამიტომ ნურც ერთ ცოცხალ არსებაზე ნუ იდარდებ. ეს კრიშნას სიტყვები ხომაა.
ვინ წყვეტს როდისაა საჭირო ბრძოლა და როდის არა კაც კლას - შესრულება...

38. იბრძოლე ბრძოლისათვის. ნუ იფიქრებ ბედნიერებისა და უბედურებაზე, ზარალსა და მოგებაზე, გამარჯვებასა და მარცხზე. ამ გზით არასოდეს დაიდებ ცოდვას.

ეს რა მოწოდებებია?
გიტა რაღაცის გაგრძელებაა ხომ? ცოტა გასაგებ ენაზე ამიხსენი რა საჭირო იყო ეს ბრძოლა, ვის ებრძვიან...

და კიდევ, ინდოეთში ხომ კასტებადაა დაყოფილი და დაბალ კასტას აკრძალული რომ აქვს ყველაფერი, მაგასაც ეთანხმები?

ისე, ამ ტექსტებს რომ ვკითხულობ, ბევრი პარალელია სახარებასთან, მამა პაისთან, ლაზარევთან და რავი რაც წავიკითხე რა ამ ბოლოს, ეხმიანება ერთმანეთს... ნუ როგორ უნდა იცხოვროს ადამიანმა, საერთო ფორმულა ერთია მაინც...

მიჯაჭვულობის მოხსნა და საკუთარი თავის უფლისთვის მიძღვნა _ ესაა პირველ რიგში ქრისტიანობაშიც


გიტაში აღწერილია ბრძლა კურუკშეტრაში ეს დაახლოებით ესე უნდა გავიგოთ ჩემი აზრით:" 7. და იქმნა ბრძოლაჲ ცათა შინა: მიქაელ და ანგელოზნი მისნი ჰბრძოდეს ვეშაპსა მას, და ვეშაპი და ანგელოზნი მისნი ებრძოდეს მათ. 8. და ვერ შეუძლო და არცაღა ეპოვა მას ადგილი ცათა შინა. 9. და გარდამოვარდა ვეშაპი იგი დიდი, გუელი დასაბამისაჲ, რომელსა ეწოდების ეშმაკი და სატანა, რომელი აცთუნებს ყოველსა სოფელსა; გარდამოვარდა ქუეყანად და ანგელოზნი მისნი მის თანა გარდამოცჳვეს. 10. და მესმა ჴმაჲ დიდი ცათა შინა, რომელი იტყოდა, ვითარმედ: აწ იქმნა მაცხოვარებაჲ და ძალი და სუფევაჲ ღმრთისა ჩუენისაჲ და ჴელმწიფებაჲ ქრისტეს მისისაჲ, რამეთუ გარდამოვარდა შემასმენელი ძმათა ჩუენთაჲ, რომელი შეასმენდა მათ წინაშე ღმრთისა ჩუენისა დღე და ღამე. 11. და მათ სძლეს მას სისხლითა მით კრავისაჲთა და სიტყჳთა წამებისა მისისაჲთა და არა შეიყუარნეს სულნი მათნი ვიდრე სიკუდილადმდე. 12. ამისათჳს იხარებდით ცანი და ყოველნი დამკჳდრებულნი მას შინა. ვაჲ არს ქუეყანისა და ზღჳსა, რამეთუ გარდამოჴდა ეშმაკი თქუენდა მომართ სავსე გულისწყრომითა დიდითა, რამეთუ უწყის, ვითარმედ მცირედი ჟამი უც მას."(გამოცხადებაჲ იოვანესი თავი 12)
Atman
tikoroma
QUOTE(tikoroma @ 25th April 2010 - 07:08 PM) *
http://files.ge/file/482433/gitas-komentarebi-doc.htm

პირველი ლინკი არ მუშაობს..

ეს გიტას კომენტარებია, თავიდან ავტვირთე


ეგ გიტას კომენტარები კი არა სისულელეა, ძველბიჭური ტერმინოლოგიით გაჟღენთილი biggrin.gif
წავშალე, ასე რომ ვეღარ ავტვირთავ.

QUOTE(tikoroma @ 2nd May 2010 - 09:32 PM) *
30. ო ბჰარატას შთამომავალო, შეუძლებელია იმის მოკვლა, ვინც ამ სხეულში ცხოვრობს. ამიტომ ნურც ერთ ცოცხალ არსებაზე ნუ იდარდებ. ეს კრიშნას სიტყვები ხომაა.
ვინ წყვეტს როდისაა საჭირო ბრძოლა და როდის არა კაც კლას - შესრულება...

38. იბრძოლე ბრძოლისათვის. ნუ იფიქრებ ბედნიერებისა და უბედურებაზე, ზარალსა და მოგებაზე, გამარჯვებასა და მარცხზე. ამ გზით არასოდეს დაიდებ ცოდვას.

ეს რა მოწოდებებია?
გიტა რაღაცის გაგრძელებაა ხომ? ცოტა გასაგებ ენაზე ამიხსენი რა საჭირო იყო ეს ბრძოლა, ვის ებრძვიან...



მთელი მაჰაბჰარატა ამ ბრძოლის წინაისტორია და ისტორიაა... ეს რომ ავხსნა ძალიან ბევრი უნდა ვილაპარაკო. მოკლედ იმას ვიტყვი, რომ პანდავებმა, ანუ არჯუნას მხარემ, ყველაფერი გააკეთეს იმისთვის, რომ ეს ბრძოლა არ მომხდარიყო, თავად კრშნაც კი იყო მისული კეთილი ნების ელჩად მეორე მხარესთან და მოუწოდა ძმათა შორის ომისგან თავი შეეკავებინათ, მაგრამ მეორე მხარემ (რომლის მმართველებიც დემონური ცნობიერების ხალხი იყო ძირითადად) არ ისმინეს ეს ყველაფერი. მოკლედ აბსოლუტურად სამართლიანი ბრძოლა იყო და მითუმეტეს ყველა დემონისთვის ეს მარცხი მადლი იყო, იმიტომ რომ სიკვდილის წინ კრშნას ხედავდნენ და ეს კი პირდაპირი გზაა სულიერ სამყაროში. ანუ ეს ერთგვარი ღვთაებრივი თამაში იყო...


QUOTE(tikoroma @ 2nd May 2010 - 09:32 PM) *
და კიდევ, ინდოეთში ხომ კასტებადაა დაყოფილი და დაბალ კასტას აკრძალული რომ აქვს ყველაფერი, მაგასაც ეთანხმები?


თანამდეროვე ინდოეთი და ვედური კულტურა უკვე დიდად განსხვავდება ერთმანეთისგან, ხოლო ძველად არც ერთი კასტის წევრი არ იყო უკმაყოფუილო თავის მდგომარეობით და ყველა თავის ფუნქციას ასრულებდა. ოღონდ ახლანდელისგან განსხვავებით ბრაჰმანობაც და კშატრიობაც პირველ რიგში დამსახურებებით და ღვაწლით განისაზღვრებოდა და არა წარმომავლობით. ინიცირებამდე "ბრაჰმანს" ბრაჰმანის ნათესავად მოიხსენებდნენ" ანუ მხოლოდ მეორედ დაბადების (ინიცირების) შემდეგ ხდებოდა იგი ბრაჰმანი.

შუდრებმა რომ სახელმწიფოს სათავეში მოინდომეს მოსვლა და სიმდიდრის "ძმურად გაყოფა" ეგ იყო ზუსტად კომუნიზმი...

ვაიშიებმა (ვაჭრებმა და ბიზნესმენებმა) რომ გადაწყვიტეს მსოფლიოს მართვა ეგაა ზუსტად კაპიტალიზმი...

ჭეშმარიტი მეფე ღირსეული კშატრია უნდა იყოს, სხვა შემთხვევაში სახელმწიფო ადრე თუ გვიან განწირულია...

QUOTE(tikoroma @ 2nd May 2010 - 09:32 PM) *
ისე, ამ ტექსტებს რომ ვკითხულობ, ბევრი პარალელია სახარებასთან, მამა პაისთან, ლაზარევთან და რავი რაც წავიკითხე რა ამ ბოლოს, ეხმიანება ერთმანეთს... ნუ როგორ უნდა იცხოვროს ადამიანმა, საერთო ფორმულა ერთია მაინც...


ამ ტექსტებიდან მოდის ყველა ცოდნა. ესაა ის პირვანდელი საწყისი ცოდნა, სადამდეც ხელი მიგვიწვდება და ჩაწერილია. თუმცა ჩემთვის პირადად ბიბლიაც ვედაა (ანუ ცოდნა) ვეფხისტყაოსანიც და "ალუდა ქეთელაურიც" (მაგრამ ყველა რელიგიის წმინდა წერუილი სხვადასხვა სულიერი განვითარების ხალხისთვის არის განკუთვნილი).
tikoroma
ტრანსცენდეტალი - რას ნიშნავს?
და მოდუსიც რა არის?

ციტატა(atman @ 3rd May 2010 - 01:13 PM) *
ეგ გიტას კომენტარები კი არა სისულელეა, ძველბიჭური ტერმინოლოგიით გაჟღენთილი
წავშალე, ასე რომ ვეღარ ავტვირთავ.

კაი,თუ არ ვარგა, ნუ იქნება... მე თარგმანი მეგონა
Atman
tikoroma
QUOTE(tikoroma @ 4th May 2010 - 11:44 PM) *
ტრანსცენდეტალი - რას ნიშნავს?


ბევრნაირად შეიძლება მაგ სიტყვის ახსნა. ტრანსცენდენტალური უფრო იმას ნიშნავს, რაც მატერიალური გრძნობების აღქმის მიღმა იმყოფება...

QUOTE(tikoroma @ 4th May 2010 - 11:44 PM) *
და მოდუსიც რა არის?


კრშნაზე უკეთეს პასუხს ვინ გაგცემს ამაზე smile.gif

მოვიყვან თავს "ბჰაგავად გიტადან" სადაც მოდუსების ბუნებაა ახსნილი:

თავი მეთოთხმეტე
მატერიალური ბუნების სამი მოდუსი


1. ღმრთეების უზენაესმა პიროვნებამ თქვა: მე კვლავ განგიცხადებ ამ უმაღლეს სიბრძნეს, საუკეთესო ცოდნას, რომლითაც ყოველმა ბრძენმა უმაღლეს სრულქმნას მიაღწია.
2. ის ვინც ამ ცოდნაში მტკიცდება, ჩემი ბუნების მსგავს ტრანსცენდენტალ ბუნებას იძენს. ის, ვინც ამგვარადაა განმტკიცებული, შექმნისას არ იბადება და არც განადგურებისას წუხდება.
3. მთელი მატერიალური სუბსტანცია, რომელსაც ბრაჰმანი ეწოდება, დაბადების სათავეა და სწორედ ამ ბრაჰმანში ჩავსახავ მე სიცოცხლეს, რითაც შესაძლებელს ვხდი ყოველი ცოცხალი არსების დაბადებას, ო ბჰარატას შთამომავალო.
4. იცოდე, რომ სიცოცხლის ყოველი სახეობა, ო კუნტის შვილო, ამ მატერიალურ ბუნებაში იბადება და რომ მე ვარ თესლის მიმცემი მამა.
5. მატერიალური ბუნება შედგება სამი მოდუსისაგან: სათნოების, ვნებისა და უგუნურებისაგან. როდესაც ცოცხალი არსება ბუნებას უკავშირდება, ო მკლავმაგარო არჯუნა, იგი განპირობებული ხდება ამ მოდუსებით.
6. ო უცოდველო, სათნოების მოდუსს, როგორც სხვებზე წმინდას, სინათლე მოაქვს და ათავისუფლებს ცოცხალ არსებას ყოველი ცოდვითი რეაქციისგან. ამ მოდუსში მყოფნი ბედნიერებითა და ცოდნით ხდებიან განპირობებულნი.
7. ვნების მოდუსი უსაზღვრო სურვილებისა და წადილისაგან არის წარმოშობილი, ო კუნტის შვილო, რის გამოც ცოცხალი არსება მატერიალურ საქმიანობებზეა მიჯაჭვული.
8. ო ბჰარატას შვილო, იცოდე, რომ უგუნურებისაგან შობილ წყვდიადის მოდუსში ყოველი ხორცშესხმული ცოცხალი არსება მოტყუებულია. ამ მოდუსის შედეგებია სიზარმაცე, სიგიჟე და ძილი, რაც ატყვევებს სულს.
9. ო ბჰარატას შვილო, სათნოების მოდუსი ბედნიერებით განაპირობებს არსებას; ვნება – კარმიული საქმიანობით; უგუნურება კი სიამოვნებას მიაჯაჭვავს იმით, რომ ცოცხალი არსების ცოდნას ფარავს.
10. ზოგჯერ სათნოების მოდუსი ჭარბობს, ამარცხებს რა ვნებისა და უგუნურების მოდუსებს, ო ბჰარატას შვილო, ზოგჯერ ვნების მოდუსი ჯობნის სათნოებასა და უგუნურებას. ზოგჯერ კი უგუნურება ერევა სათნოებასა და ვნებას. ამგვარად, მუდამ პაექრობაა პირველობისთვის.
11. სათნოების მოდუსი ვლინდება მაშინ, როდესაც სხეულის ყოველი კარი ცოდნითაა განათებული.
12. ო მთავარო ბჰარატათა შორის, როდესაც ვნების მოდუსი მატულობს, ვითარდება დიდი მიჯაჭვულობის, კარმიული საქმიანობის, ძლიერი ძალისხმევის და დაუოკებელი სურვილისა და წადილის ნიშნები.
13. როდესაც უგუნურების მოდუსი მატულობს, ო კურუს შვილო, ვლინდება წყვდიადი, უმოქმედობა, სიგიჟე და ილუზია.
14. როდესაც ცოცხალი არსება სათნოების მოდუსში გარდაიცვლება, დიადი ბრძენების წმინდა, მაღალ პლანეტებს აღწევს.
15. როდესაც ცოცხალი არსება ვნების მოდუსში გარდაიცვლება, იბადება მათ შორის, ვინც კარმიულ საქმიანობებს ეწევიან; და როდესაც არსება უგუნურების მოდუსში გარდაიცვლება, იბადება ცხოველთა სამყაროში.
16. ღვთაებრივი საქმიანობის შედეგი წმინდაა და ამბობენ, რომ სათნოების მოდუსს მიეკუთვნება, მაგრამ ვნების მოდუსში შესრულებულ საქმიანობას მოჰყვება ტანჯვა, უგუნურების მოდუსში შესრულებულს კი - სიგიჟე.
17. სათნოების მოდუსიდან ვითარდება ჭეშმარიტი ცოდნა, ვნების მოდუსიდან – სიხარბე, უგუნურების მოდუსიდან კი – ჭკუასუსტობა, სიგიჟე და ილუზია.
18. ისინი, ვინც სათნოების მოდუსში იმყოფებიან, თანდათანობით მაღალ პლანეტებზე აღიმართებიან, ვნების მოდუსში მყოფნი დედამიწის მაგვარ პლანეტებზე იცხოვრებენ; ისინი კი, ვინც უგუნურების შემზარავ მოდუსში არიან, ჯოჯოხეთის სამყაროებში ეშვებიან.
19. როდესაც ცოცხალი არსება სწორად ხედავს, რომ მოქმედებენ მხოლოდ ბუნების მოდუსები და ცნობს უზენაეს უფალს, რომელიც მთელ ამ მოდუსებზე მაღლა დგას, ჩემს სულიერ ბუნებას აღწევს.
20. როდესაც ხორცშესხმული არსება მატერიალურ სხეულთან დაკავშირებულ ამ სამ მოდუსზე ამაღლდება, თავს აღწევს დაბადებას, სიკვდილს, სიბერესა და გაჭირვებებს და ამ ცხოვრებაშიც იგემებს ნექტარს.
21. არჯუნამ იკითხა: ო ჩემო ძვირფასო უფალო! რა ნიშნებით უნდა იცონ ის, ვინც გადალახა ეს სამი მოდუსი? როგორ იქცევა და როგორ გადალახავს ბუნების მოდუსებს?
22-25. ღმრთეების უზენაესმა პიროვნებამ თქვა: ო პანდუს შვილო, ის, ვისა ცარ სძულს გასხივოსნების, მიჯაჭვულობისა და ილუზიის მოსვლა და ვინც არ შენატრის მათ, როდესაც ქრებიან; მატერიალური თვისებების ნებისმიერი ურთიერთქმედების მიმართ შეუდრეკელი და უშფოთველია, ნეიტრალური და ტრანსცენდენტული, ვისაც კარგად ესმის, რომ მხოლოდ მატერიალური მოდუსები მოქმედებენ; ვისი ყურადღებაც საკუთარ მეობაზეა მიპყრობილი და ვინც თანაბრად ხვდება ბედნიერებასა და უბედურებას; ვინც მუჭა მიწას, ქვასა და ოქროს ნაჭერს ერთი თვალით შეჰყურებს; ვინც თანაბრად შეჰყურებს სასურველსა და არასასურველს, ვინც მტკიცეა, ვინც ერთნაირად ექცევა შექებასაც და საყვედურსაც, პატივსაც და ლანძღვასაც; ვინც ერთნაირად ექცევა მეგობრებსაც და მტრებსაც; და აღკვეთილია ყოველგვარი მატერიალური საქმიანობისაგან – ამბობენ, რომ ასეთმა პიროვნებამ გადალახა ბუნების მოდუსები.
26. ის, ვინც ნებისმიერ ვითარებაში უცვლელად, სრული ერთგული სამსახურით მემსახურება მე, უმალ გადალახავს მატერიალური ბუნების მოდუსებს და ასე აღწევს ბრაჰმანის დონეს.
27. და მე ვარ ფუძე უპიროვნო ბრაჰმანისა, რომელიც უკვდავი, უხრწნადი, მარადიული და საბოლოო ბედნიერების კონსტიტუციური მდგომარეობაა.
tikoroma
აჰ, მეთოთხმეტე თავამდე არ ვიყავი მისული ეგ რომ ვიკითხე. laugh.gif მეცამეტეზე ვარ... 10-11-12-ე მაგარი იყო
Atman
tikoroma

თუ რომელიმე სუტრის განმარტება განსაკუთრებით დაგაინტერესებს მითხარი და პირადად შრილა პრაპჰუპადას კომენტარს დაგიდებ smile.gif
This is a "lo-fi" version of our main content. To view the full version with more information, formatting and images, please click here.
Invision Power Board © 2001-2024 Invision Power Services, Inc.